2 KORINTUS 5

Ayu Idi Ulun Roh Déi' Surga

1Ngaceku kai kali' idi kudeng ruma' luk inan tau tudo bang tana' ini uen ngusag, tau miak ngalap aceh ruma' ratnan Allah, ieh ineh su luk inan tudo, baken inau' ku ticu', iamo' meruked déi' surga. 2Idi nekini tau ngarod idi geregan sikal uen ngayung ku ruma' tau luk rat surga ineh. 3Kudeng tau inayung na tau miak lubpa peh. 4Kareb tau bang ruma' ini, tau ngarod ku babeh luk meberat ineh; na tau pian patad ratnan burur tau, iamo' tau pian uen ngayung ku burur luk rat surga, pad luk miak maté ineh uen ngelabin ku ulun. 5Allah luk nenganau' netau temina' ngalap isu'. Idi Ieh nemaré RohNeh mangun ku etu ratnan luk tinina'Neh kuan tau.

6Kai megéi' mekuu', ngaceku kai kali', idi laba' kai tudo bang burur ini, kai mado ratnan Tuhan. 7Kai mulun ngaceku anu, baken ngaceku luk siren. 8Kai mekuu' idi pelaba pian mepatad ratnan burur, pad tudo dengan Tuhan. 9Meluun teh kai mekél maya' pianNeh, do' bang burur ini idi mado ratnan burur pana'. 10#Rum 14.10 Ngaceku na miak na amung tau kumin pa atun kerusi besara' Keristus, pad anid-anid lemulun ngalap ua', maya' luk pangeh inau'neh bang ulunneh, do' kian dat lek.

Rurum Dengan Allah Ngaceku Keristus

11Kai kali' ilungneh matot nan Tuhan. Ini punneh kai ngubuk lemulun. Allah kali' dengan meriput luk bang niat kai. Kudeng ineh teh ui merapet nemuyuh pana' kali' luk bang niatku. 12Kai na ngubur burur kai pa kiung muyuh sekua' teh. Iamo' kai ngacing kuan muyuh aceh punneh muyuh uen ngedita' ngaceku kai, pad muyuh miak ngor bala lemulun luk ngedita' bururdeh ratnan ayu lemulun, iamo' baken ratnan niatneh. 13Kudeng ayuneh kai meruden, ieh ineh ngaceku Allah; idi kudeng kai lutep terawé, ieh ineh ngaceku muyuh. 14Ngaceku awa Keristus ineh ngegio niat kai, ngaceku ini luk tirawé kai, idi seburur pangeh naté ngaceku amung-amung lemulun, ini punneh amung-amungdeh pangeh naté. 15Idi Ieh pangeh naté ngaceku amung-amung lemulun, pad lemulun luk mulun ineh na mulun kuan bururdeh sebuleng teh, iamo' kuanNeh ineh luk pangeh naté idi netumui teh ngaceku lemulun ineh.

16Ngaceku ineh, rat pad sini na kai ngesala' seburur pana' maya' ayu lemulun. Sagan pana' kai pangeh ngiti Keristus maya' ayu lemulun, iamo' nekini na kai ngiti Neneh mepad kudeng ineh teh. 17Kareb selemulun mulun bang Keristus, idi ieh ineh aceh pudut luk mebaruh, idi amung-amung luk mon ineh pangeh tila', idi amung-amung luk mebaruh pangeh nacing. 18Amung ini inau' Allah, luk pangeh nenguit netau pedo' Neneh, ngaceku ratnan Keristus, idi Ieh nemaré netau kekamen nguit nelun baken pedo'. 19Allah bang Keristus ineh nemaré uang tana' ini pedo' Neneh idi na Ieh ngiap sala'deh. Ieh pangeh nemaré kuan kai bala ratnan nguit pedo' ineh.

20Ngaceku ineh kai mangun ku lun duken Keristus, ayuneh Allah mutuh dengan dila' kai. Bang ngadan Keristus, kai mutuh nemuyuh pedo' dengan Allah. 21Keristus na mesala', iamo' Allah nenganau' Neneh mangun ku sala' ngaceku tau, pad tau ini ruen Allah matu bang Keristus ineh.

Currently Selected:

2 KORINTUS 5: BLD

Highlight

Copy

Compare