2 KORINTUS 6
6
1Iamo' kai luk pad-pad ngakem dengan Allah mutuh nemuyuh teh, pad muyuh na ngalap katu Allah mo'-mo'. 2#Yes 49.8 Ngaceku Allah pebala,
“Kareb aco luk petulu Ui neninger balamu.
Idi kareb aco ulun Ui nengedengan namu.”
Setuneh nekini karebneh luk petulu ineh, idi matu aco ulun pangeh macing.
3Na kai nganau' anun-anun luk ngesabeng nelun, pad kekamen kai na uen ngilang peh. 4Iamo' bang amung-amung luk ruen kai, kai ngegala' ratnan kai ini demulun Allah, ieh ineh dengan mulai niat kai tuman ratnan dereh, susa', idi sabeng pana'. 5#Kek 16.23 Kai pangeh bibal, tinutup, idi pidereh lun mula'. Kai merur ngaceku mula' kekamen, na petap rudap, idi na petap akan. 6Kai ngegala' nekai demulun Allah ratnan ligan, ileh, ulai niat, idi katu kai; idi teh ngaceku pedengan ratnan Roh Meligan, idi awa kai luk matu, 7ratnan bada' kai luk matu, idi ratnan lalud Allah. Luk matu mangun ku repapeh kai kareb pebunu', idi ku matar burur kai. 8Kai uen ngerayeh idi uen ngigu'; kai uen ngedat idi buren. Sagan pana' kai mala luk matu, kai tetanen lun mebalih; 9ayuneh kai na mebala, iamo' setuneh kai mebala; ayuneh kai maté, iamo' setuneh kai mulun. Sagan pana' kumin, iamo' na kai pitayen. 10Sagan pana' kai uen ngesusa', iamo' kai megéi' mawang niat; ayuneh kai masi', iamo' kai nganau' mula' lemulun mangun ku lun do'. Ayuneh kai na binaweh, iamo' setuneh kai inan luk amung-amung.
11O lun Korintus, kai pangeh nemada' nemuyuh dengan megala', idi kai mawa nemuyuh. 12Kai pangeh mawa nemuyuh dengan na ngalum anun-anun, iamo' muyuh na mawa nekai kudeng ineh. 13Ui pebala kudeng kuan anak-anakku: do' muyuh mawa nekai teh, mepad kudeng kai pangeh mawa nemuyuh!
Aleg Maya' Lawé Lun Luk Na Manu
14Aleg muyuh peruyung ngakem dengan lemulun luk na manu. Kudeng apehké luk matu idi luk na matu perurum? Idi kudeng apehké acang idi dacem pamung? 15Kudeng apehké Keristus idi Iblis perurum? Idi anunké rurum arang lun manu dengan lun luk na manu? 16#1 Kor 3.16; 6.19; Uk 26.12; Yeh 37.27 Anunké rurum arang ruma' Allah dengan akang? Ngaceku tau ini ruma' Allah luk mulun, maya' kudeng bala Allah,
“Ui sikal tudo idi mudeng arangdeh ineh;
Ui mangun ku Tuhandeh,
idi ideh mangun ku pupuKu.”
17 #
Yes 52.11
Ngaceku ineh, kebala Tuhan,
“Remuat muyuh rat arangdeh,
idi patad rat nedeh.
Aleg ngakem anun-anun luk melutak,
idi Ui sikal ngalap nemuyuh.
18 #
2 Sem 7.14; 1 In 17.13; Yes 43.6; Yer 31.9 Ui mangun ku Taman muyuh,
idi muyuh mangun ku anak-anakKu, do' deléi idi decur teh,
kebala Tuhan luk Melalud.”
Currently Selected:
2 KORINTUS 6: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
