2 KORINTUS 4
4
Ratnan Binaweh Luk Buren Bang Luk Inau' Ratnan Tana'
1Dengan éi'Neh Allah pangeh nemaré kuan kai, pad kai na metalang niat. 2Kai pangeh nenala' amung-amung kekamen luk inalum idi luk ngacing igu', idi na kai naluk idi mebalih ratnan bala Allah. Iamo' dengan ngelio luk matu ineh kai ngamo burur kai kuan teruayen niat amung-amung lemulun pa kiung Allah. 3Iamo' kudeng Bala kai luk Do' ineh lininged, idi ieh melinged kuan lemulun luk metutu'. 4Idi raca' tana' ini pangeh nengebuser mateh niat lemulun luk na manu ineh, pad ideh na miak macang ku acang Bala luk Do' ratnan rasat Keristus, ieh ineh ayun Allah. 5Kai na mada' ratnan burur kai sebuleng, iamo' ratnan Keristus Yésus luk Tuhan. Idi kai ini demulun muyuh ngaceku ratnan Keristus. 6#Pud 1.3 Allah luk pangeh nepebala, “Do' acang ineh merasat rat bang dacem,” Ieh ineh teh luk merasat bang niat kai, pad ngacang netau ku ileh ratnan rayeh Allah luk merasat nan kiung Yésus Keristus.
7Iamo' kai inan binaweh luk buren ini bang kudeng luk inau' ratnan tana', pad ela ratnan laludneh muli' amé' inan Allah, idi baken rat nekai punneh. 8Megéi' kai mesusa', iamo' na kai linaya'. Kai merapang niat, iamo' na kai ugka' merapet. 9Kai pidereh, iamo' na kai tican; kai nurat, iamo' na kai naté. 10Idi megéi' kai mabeh dereh ratnan até Yésus bang burur kai iapeh-iapeh luk inan kai amé', pad ulun Yésus ineh miak uen ngegala' bang burur kai. 11Ruked ulun kai, kai megéi barén kuan até ngaceku ratnan Yésus, pad ulun Yésus ineh miak uen ngegala' bang burur kai luk miak maté ineh. 12Kudeng ineh teh até ngakem bang burur kai, iamo' ulun ineh bang nemuyuh.
13 #
Nani 116.10
Pangeh inayud, “Ui pangeh manu, idi ini punneh ui nepebala.” Kai inan teh roh anu, idi kai ini pana' pebala ngaceku kai manu. 14Kai kali' idi Allah luk pangeh nenui Tuhan Yésus sikal nui nekai mepad kudeng Yésus ineh teh, idi sikal maré nekai amé' matun Neneh dengan muyuh. 15Amung ini mangun pad ngacing peruan kuan muyuh; idi kareb katu Allah macing nan meluun ula' lemulun, idi ideh maré meluun ula' ubur pelé ngerayeh Allah.
Mulun Ngaceku Anu
16Ngaceku ineh na kai metalang niat. Sagan pana' burur kai iuk melu, iamo' niat kai uen mebaruh anid-anid aco. 17Idi susa' kai luk meran idi segageh mo', nguit nekai macing nan ubur luk meluun rayeh idi meruked, 18ngaceku na kai ngerawé nier anun-anun luk megala' ineh, iamo' luk na siren, ngaceku luk siren ineh segageh mo', iamo' anun-anun luk na siren ineh meruked.
Currently Selected:
2 KORINTUS 4: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
