Zer 17

Zudaa minin sãn manə ǹ zɛ̀rɛ biɛ

1Zudaa minin siɛ̃n man

ka sɛ́wɔ kiɛ̃ bɛ́ lɔn,

ǹ nə́ kiɛ̃ ka fɔlɔ lɛ pɛpɛnaa nɛ

hinlaa ka lunluun ni.

Maǹ kiɛ̃ nɛ ǹ foo la

ka ǹ *wúlu bɔ ǹ bǎã karan nɛ.

2Ǹ bɛ́ n taasɛ ǹ nɛnyaanan nɛ lɔn,

maǹ nə n taasɛ ǹ wúlu bɔ ǹ bǎãn

laanka ǹ dì bìbĩn kɛn nɛ miɛ̃,

ka da luu tìtìn kɛn nɛ tentenen

mìi ni,

3ka ǹ kele mìin kɛn nɛ don.

Nsɛ Zudaa, ma á re n naforon laanka

n gɔn màn giɔ̀mɔ kakan kɛn kokoe,

kɔnlɛ ka n wúlu bɔ ǹ bǎãn nɛ.

Man die bɛ zɛnɛɛ

n siɛ̃n kɛn tumaa a lɛa

ń zɛnaa gána lɛ paǹ tumaa nɛ.

4Ma goã má gána mɛn lɛ kɔ n la

kíɛ̃ lɛa,

n doamaa nɛ n bɛ toa walan.

N tá re n zɔ́ɔn bɛ̀rɛ biɛ gána nɛ,

ń bɛ́ n ba gána mɛn din doɛ̃ wa.

Hiĩ, ka ǹ ka maa foo yoo tɛ bũ,

a n die kuĩ miɛ̃ yǎa duduu.

Sii-dɔ̃lin boo

5Dɛnaa Lawa n kɛ pii:

Min mɛn bɛ́ n foo wɔlɔ lui ma ganaa,

a nə́ n foo doɛ minbuiin nɛ ganaa,

a dɔmalɛ n boe minbuiin nɛ nɛ,

lɛn baraa bíi bɛa dɛnaa kũ!

6Ǹ dɛnaa na á kɔnbɔ

ka da kùsì ni tán gere la.

A re yii-nyɛɛ yii wa.

A n die goɛ̃ diə gole a kɔlɔn kɛn

bii n ni,

tán yìsidɛnaa kɛ la,

min ná a boe la a giã-n wa.

7Sɛnɛ, min mɛn bɛ́ golee

Dɛnaa Lawa li,

a nə́ n foo doɛ Dɛnaa Lawa ganaa,

Barka á re n diɛ bɛa Dɛnaa ganaa.

8 # Loe 1.3 Bɛa dɛnaa n goon ka da nɛ

zumii-n tà lɛ-a,

á gòonən bɔ á woo mu lɛ ganaa.

Tɛ̀fuu biikoo li,

a nyɛ́ɛ biɛ màn kɔn nɛ wa.

A luu n goɛ̃ tì.

Lɛ̀ goon lɛ̀ gere a màn kɔn pii-n wa.

A n nɛ koe biikoo tumaa li.

9Màn kɔn ba baraa

á dɔ minbuiin nɛ foo li wa.

Min kɔn ba boe la a na a kaka kɔ wa,

min kɔn ba doɛ̃ a nya wa.

10 # Loe 62.13; SNS 2.23 Masɛ Dɛnaa Lawa,

man giɛ minbuiin nɛ tumaa a taasiɛn

laanka a gɔ́ɔ̃gɔ́ɔ̃ ǹ siin ganaa.

Bɛa yɔrɔ lɛ la,

man didie tumaa kuĩ

a kɔnpɛ ka a giã ǹ gɔn

laanka a zɛnaa ǹ siin ni.

11Min mɛn bɛ́ pàãma biɛ yɔrɔ

baraa la,

bɛa dɛnaa na á kɔnbɔ ka koo dan nɛ,

á waa gìi la, a ná a gìi dɔ da wa.

A toa a yii n koo foo kɔɔ̃n la,

naforo lɛ nə n gɔn boe a ganaa.

A nə n gɔn nyɔmiɛ̃ baãnaa lɛa.

Dɛnaa Lawa din nə yiikoonaabaa koe

12A kũ kanaa giala kɔ waáraa ganaa

kii dankan mɛn bɛ́ piɛ̃-n

ka gugurubaa nɛ,

a n lon, wɔa Lawa a kion sonbore

kɛ nɛ.

13Dɛnaa Lawa,

Izirayeli foo n doa nɛ n din ganaa.

Min mɛn tumaa bɛ́ n la boe n ganaa,

sìi á re n koe ǹ lɛ.

Ǹ mɛnɛn bɛ́ n dɔ̀ɔ̃ we n ne,

bɛn man die goɛ̃ ka tɔ mɛn nə́ ke

ǹ nə́ kiɛ̃ gusuũ li!

A giala, maǹ nə́ n la bɔ nsɛ

Dɛnaa Lawa ganaa,

nsɛ mu yala nyantoto ke, nyin koe.

Zeremii n Dɛnaa Lawa nyankoe

14Dɛnaa Lawa, ma kaka kɔ,

man die kaka koe dɔn.

Ma kirisibaa, man die kirisibiɛ dɔn.

Hiĩ, n din tɔ laakalaa ǹ loe ne

ma á loe.

15Á ke, minin man pii:

«Dɛnaa Lawa a dɔlɔ lɛ dɔ?

Á maa ke?

A zɛnaa wɔ ga a ganaa!»

16Dɛnaa Lawa,

masɛ bie má n laa n ganaa

máa n dɔlɔ da ǹ mìi-n wa.

N din tá doɛ̃,

ma koe taasɛ ǹ paǹ li wa.

Ma boo mɛn da,

man má da n din yɔrɔ-a.

17N nyan nyɛ́ɛ da ma-a wa,

koe biikoo li,

n din ni maa duru ǹ bǎã lɛa.

18Min mɛnɛn bɛ́ boe ma yii ni,

sìi nə ǹ kũ,

sɛnɛ, a baran masɛ baa wa!

Nyɛ́ɛ nə ǹ kũ,

sɛnɛ, a baran masɛ baa wa!

Dɔlɔ bɔ ǹ ganaa,

n nə ǹ ziziɛ̃ lenlen!

Susu ǹ pii a landa

19Dɛnaa Lawa boo da ma nɛ: – Á ke, wo gole "Zaman a Kiɛnlɛ" kɛ lɛ-a. Bɛa kiɛnlɛ lɛ nɛ Zudaa kiin tá we hinlaa ǹ soo Zeruzalɛmu. Bɛ kio, n gole kiwi lɛ a kiɛnlɛ gialakunun kɛn dɔn lɛ-a. 20N die n pɛ ǹ nɛ: «Ka n too kɔ Dɛnaa Lawa a boon kɛn li kasɛn Zudaa kiin kɔnlɛ ka Zudaa zaman ka Zeruzalɛmu minin kɛn nɛ boe ka bɛa kiɛnlɛn lɛn nɛ.» 21#Neh 13.15-22 Dɛnaa Lawa n kɛ pii: «*Susu ǹ pii pinaa, ka yiri bɔ ka dinin li. Ka nyan guĩ saa bɛa pinaa, ka bɔ ka Zeruzalɛmu kiɛnlɛn lɛn nɛ wa. 22#BBN 20.8-10; TDP 5.12-14 Bɛa pinaa, ka nyan soo ka guĩ-n kaa kion wa, ka nyan dí kɔn nya wa. Sɛnɛ, ka bɛa lɛawaa lɛ koa masɛ wɔ lɛa, ka ma pɛ ka digolon man lɔn. 23Ǹsɛn nə n too kɔ wa, ǹ nə n too da wa. Ǹ nə́ n mìi laa, ǹ nə́ n piã ka maa gɔn waa nɛ, ǹ lɛ kɔ a ganaa wa.»

24Dɛnaa Lawa a da ǹ boo á ke: «Sɛnɛ kasɛn, ka n too kɔ ma lon taãn nɛ. *Susu ǹ pii pinaa, ka nyan bɔ ka guĩ kɔ́n nɛ kiwi lɛ a kiɛnlɛn nɛ wa. Ka bɛa lɛawaa lɛ koa masɛ wɔ lɛa, ka nyan dí kɔ́n nya wa. 25Ka bɛ nɛ, kiin laanka ǹ gána mìilandɛnan mɛnɛn bɛ́ giã-n Davida a kii dankan la, ǹ nə́ dii sùi hinlaa ziabaa ǹ wotoro la, bɛn tá re boe ka bɛa kiɛnlɛn lɛn nɛ duduu. Ǹ gána nyɛɛnaandɛnan nɛ, Zudaa minin ni, ka Zeruzalɛmu minin ni, bɛn man die boe ka walan nɛ. Minin man die goɛ̃ bɛa kiwi lɛ nɛ yǎa duduu. 26Minin tá re boe Zudaa kiwin ni ǹ daa, Zeruzalɛmu lɛkoro-a kiwin ni, Bɛnzamɛn gána nɛ, *Sefelaa nɛ, kelen la nɛ, ka Negɛvu ni. Ǹ tá re die Lawa a kion ka *wúlu màn tiɛ̃n nɛ ka wúlu màn tɔrɔ kɔsɔn nɛ, Lawa gɔ ǹ màn nɛ, nyɔɔ gìĩ kɔɔ̃n nɛ, ka barka da ǹ wúlu màn nɛ. 27Sɛnɛ, bɛ̀ ka n too kɔ ma lon wa, bɛ̀ ka susu ǹ pii koa maa wɔ lɛa wa, bɛ̀ ka guĩ da ka mìi ni, bɛ̀ ka bɔ ka Zeruzalɛmu a kiɛnlɛn nɛ, bɛ̀ á n baa miɛ̃, man die tɛ diɛ kiwi lɛ ganaa. Á re Zeruzalɛmu a kion sonboren kɛn kuĩ, a ná a nimi wa.»

Currently Selected:

Zer 17: SBPE2011

Highlight

Copy

Compare