Zer 18
18
Gì laanka dɔn-bɔle
1Dɛnaa Lawa boo da Zeremii ni á pɛ: 2«Yoo n wo dɔn-bɔle goon a piɛ. Boo mɛn bɛ́ ma lɛ-n, ma á re bɛ pii n ni walan.» 3Má yoo má woo dɔn-bɔle lɛ li, má woo yaa dí nyɛɛ. 4Sɛnɛ, a goã dɔn mɛn boe, wɔ̀lɔ̀ na á goã bɛ ganaa ka a bɛ́ goɛ̃ bɛ̀ a n zɛnaa lɔn. Dɔn-bɔle lɛ wusoo á dɔn kɔsɔ zɛnaa, á kɔnpɛ ka a din dùũ ni. 5Dɛnaa Lawa boo mɛn da ma nɛ, á ke: 6«Izirayeli minin lɛn, ma dɔ n ma a boe la ma sii zɛnaa ka nɛ ka dɔn-bɔle kɛ bɛ́ lɔn wa? Kasɛn Izirayeli minin lɛn, ka ǹ ma gɔn ka gì bɛ́ dɔn-bɔle gɔn lɔn. Ma din Dɛnaa Lawa a da ǹ boo ne. 7Biikoo tɛn li, má màn woɛ̃ laanka a yɔyɔrɛɛ ka a ziziɛ̃ boo da tɔrɔ kɔn hinlaa gána kɔn a paǹ li. 8Sɛnɛ, ma boo da sii baraan mɛnɛn paǹ li, bɛ̀ zaman lɛ bɛn kaa, ma goã má dɔlɔ mɛn boo da, ma dɔ á re bɛ toɛ walan. 9Biikoo tɛn li, má màn doe laanka màn zumii boo da tɔrɔ kɔn hinlaa gána kɔn a paǹ li. 10Sɛnɛ, bɛ̀ bɛa tɔrɔ lɛ nə n too kɔ ma lon wa, sii mɛn bɛ́ baraa ma yii li bɛ̀ ǹ nə́ bɛ zɛnaa, ma goã má bǐɛ̃ mɛn boo da ǹ nɛ, man wusii ma maa taasiɛn bɔyaa.»
11Kanna kəni Zeremii, boo da Zudaa minin laanka Zeruzalɛmu minin ni n pɛ ǹ nɛ: – Dɛnaa Lawa n kɛ pii: «Á ke, man dɔlɔ yɔrɔ boe kaa wɔ lɛa. Man koe lɛ boe die-n ka ganaa. Didie doamaa nɛ a na a taasiɛ baraan kaa. Hiĩ, ka kaa giã ǹ gɔn laanka kaa zɛnaa ǹ siin bɔyaa.» 12Sɛnɛ, ǹ tá re pii: «Wɔ laadoo bie wa. Wɔ golee sii mɛn li, wɔ n die bɛ lɛ zɛnɛɛ. Wɔ n koe wɔa taasiɛ bɔnɛɛn lɛn lɛ.»
Izirayeli yiri bɔ ka Dɛnaa Lawa nɛ
13Dɛnaa Lawa n kɛ pii:
Ka nɔ̀n da tɔrɔ kɔsɔ minin la:
Ka bin tɔn boon kɛn miãn ma?
Izirayeli zaman lɛ na á sii
bɔbɔnɛɛn zɛnaa.
14 *Mu nyuù-wɔle bie koe ne
Liban a kele gɛ̀fun kɛn lɛ duduu wa?
Mu nyantoto ke baa sii gɛ̀fu la
boe bǎã sɔsɔɔ nɛ,
bɛ á boe la a golee?
Haayii!
15A da yaa maa zaman yiri bɔ ma nɛ.
Maǹ wúlu boe màn kooron ganaa.
Bɛa màn kooron lɛn manə ǹ boe
ǹ daɛ zii la,
ǹ goã koe ziin mɛnɛn lɛ lɛlɛ,
maǹ nə n boe n boe bɛn la,
ǹ nə́ koe ziin kɔsɔn lɛ ǹ nə́ ǹ ba
ǹ doɛ̃ wa.
16Maa zaman ná a gána lɛ bɔyaa
á baa kɛbɔlɔ lɛa,
yaa da ǹ màn lɛa yǎa duduu.
Kiɛ̃ wolen yiri nə́ n lɔlɔkɔn.
Maǹ nə n mìi papasɛ.
17Bɛ̀ zɔ́ɔ daa ǹ mɛn waáraa,
ma á re maa zaman lɛ pɛsɛ̃
paǹ tumaa li,
ka gusuũ bɛ́ lɔn la piɛ̃ li.
Ǹ koe pinaa, ma nə n dɔ̀ɔ̃ we ǹ ne,
ma a re n yɔrɔ diɛ ǹ la wa.
Maǹ zoɛ̃ li ǹ Zeremii dɛ
18Minin man pii: «Ka daa wɔ boo wɔ kɔn Zeremii ganaa! Wɔa foɛ̃ Lawa a wúlu-bɔle li a wɔ daraa dí-pɛn ganaa wa, hinlaa sii-dɔ̃li li a yiri kɔ wɔ la wa. Wɔa foɛ̃ Lawa a boo gii-dali li a Lawa a boo da wɔ-n wa. Ka wɔ n tan, wɔ yoo a gialaa, wɔ boo baraa da a ganaa. Wɔ nyan nə n too kɔ a da ǹ boon li wa!»
19Sɛnɛ, Dɛnaa Lawa,
n yiri koa ma li.
Min mɛnɛn bɛ́ ma zɛ̀rɛ biɛ,
n too kɔ ǹ da ǹ boo li.
20Maǹ bǐɛ̃ sarɛɛ ka baraa nɛ?
Maǹ nə́ nyankɔrɔ fɔ̃
mà ma mɛnaa a nɛ.
A da yaa, n yiri kɔ,
man má golee n din yɔrɔ-a,
má boo da n nɛ ǹ dinin bǐɛ̃ kɔ á lɛa
màn mɛn bɛ́ toɛ,
n nə n foo yoo kɛ wɔlɔ lui ǹ ganaa.
21A bɛ́ miɛ̃,
ǹ nɛnyaanan wɔ bòo gɔn,
ǹ wɔ gɔya sa gɔn!
Ǹ lɔn ba re nɛ yii wa!
Ǹ tá re giɔɔrɔn biɛ!
Piɛ̃ busu á re ǹ zuũn dii!
Ǹ nɛ tenən tá re giɛ̃ zia la!
22Zia nɛn kaa ǹ ganaa!
Ka bɛ-n kəni,
lɛ-dɛ á re boe ǹ kionən ne.
A giala,
maǹ nyankɔrɔ foɛ̃ ma nyɛɛnɛ,
maǹ kan koe ma nɛ.
23Nsɛ Dɛnaa Lawa,
ǹ bɛ́ sii mɛn yɔrɔ boe
màn mɛn bɛ́ toɛ ǹ ma nyin bɔ,
ń tá bɛ doɛ̃ taãn nɛ.
N nyan nə ǹ sii baraan toa ǹ nɛ wa!
N nyan nə ǹ siɛ̃n tuturu wa!
Toa ǹ mɛnaa n yɔrɔ-a!
N foo-yoo pinaa,
yoo ǹ gialaa!
Currently Selected:
Zer 18: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
