Zer 16
16
Zeremii n Lawa a kiri wɔ boo diɛ
1Dɛnaa Lawa boo da ma nɛ á pɛ: 2«Ń doamaa bie n lɔ wɔ wa, n ba re nɛginin hinlaa nɛlɔ yii gána kɛ-n wa. 3A giala, masɛ Dɛnaa Lawa bɛ́ boo mɛn diɛ nɛgiĩn laanka nɛlɔn wɔ paǹ li gána kɛ nɛ, ka díin laanka náan mɛnɛn bɛ́ re ǹ yii, á ke: 4Busu kaka n die ǹ dii. Min kɔn ba re wuu pii ǹ la wa, min kɔn ba re ǹ biĩ wa. Maǹ die yisi biɛ tán. Maǹ die giɛ̃ zia la, hinlaa bòo nə ǹ dɛ. Zèwon laanka tolokan tá re ǹ siĩ kokoe.»
5Dɛnaa Lawa wusoo á boo da ma-n doo á pɛ: «Minin bɛ́ ń soekɔn gɛ̀ koɛ kion mɛn nɛ, n nyan wɔ bɛ-n wa. N nyan gɛ̀ wuu pɛ wa. N nyan gɛ̀ fòo da wa. A giala, má maa là nyantoro laanka maa kɔn-narɛɛ ka maa makara doɛ̃ lɛ si maa zaman la. Masɛ Dɛnaa Lawa a da ǹ boo ne. 6Kiãn laanka min kooron tá re giɛ̃ gána lɛ nɛ. Ǹ ba re ǹ biĩ wa. Min kɔn ba re ǹ gɛ̀ wuu pii wa. Min kɔn ba re n gɔ̀nɔn tɔtoɛ̃ hinlaa a n mìi ka kɔɔ̃ wa. 7Min kɔn ba re woe màn-bii koe gɛ̀dɛnan la màn mɛn bɛ́ toɛ ǹ nə ǹ foo basã wa. Min kɔn ba re ǹ foo wɛɛ ǹ din hinlaa ǹ daanan gɛ̀ taman yii wa.»
8Ǹ bɛ́ zɔ́n zɛnɛɛ kion mɛn nɛ, n nyan wɔ walan dɔn wa. N nyan giã tán n màn bii hinlaa n màn mi kun ka bɛa minin kɛn nɛ wa. 9#Zer 7.34; 25.10; SNS 18.23 Masɛ Pàãyiidɛnaa Lawa, Izirayeli a Lawa a da ǹ boo á ke: «Ma á re zɔ́n bìn diɛn lɛ kuri, foo kɔɔ̃n lɛ-dɛn nɛ ka kɔn-wɔle tiin loen ne. Bɛ n die n zɛnɛɛ ka yii ni kaa yiikoonaabaa gɔ́ɔ̃ nɛ kànaa dinin.»
10Bɛ̀ n boon kɛn tumaa da zaman lɛ nɛ ǹ mɛn waáraa, kɔntan min tá re nɔ̀n diɛ n la a pɛ: «Wàa na á baa Dɛnaa Lawa koe kɛ miã da wɔ mìi ni? Wɔ n wɔ sii baraa zɛnaa? Wɔa sã n ka wàa nɛ Dɛnaa Lawa, wɔa Lawa ganaa?» 11N die n nə ǹ lɛ si kɛnɛn: – Dɛnaa Lawa a da ǹ boo á ke: «A giala, ka digolon man nə́ n la bɔ ma ganaa, ǹ nə́ kɔ lawa kɔsɔn lɛ, ǹ nə́ ǹ guguru kɔ, ǹ nə́ kaa tán-a ǹ yɔrɔ-a. Ǹ nə́ n la bɔ masɛ ganaa, ǹ maa dí-pɛn kɛn tamaa wa. 12Kasɛn zɛnaa ǹ sii bɔnɛɛ kɔ á la ka digolon wɔ nɛ. Didie tumaa nə n parɛɛ a din a taasiɛ baraan ganaa, a ba n too koe maa da ǹ boo li wa. 13Bɛ lɛ nɛ, man die ka lui gána kɛ nɛ. Gána mɛn bɛ́ kaa doɛ̃ wa, ka digolon dɔn dinin nə dɔ̃ wa, ka á re woe walan. Penleen laanka tèlò, ka á re lawa kɔsɔn guguru koe. Ma á re maa bǐɛ̃baa kɛ nyɛɛ ka-n doo wa.»
Wo bɛ̀rɛbaa ǹ bǎã n wolen wusoo a da piɛ
14Á ke, lɛawaan tá re doe, Dɛnaa Lawa a da ǹ boo ne, ǹ ba re pii doo: «Ma nə n liɛ ka Dɛnaa Lawa Yiikoonaa tɔ nɛ, asɛ mɛn Izirayeli minin waa Ezipti gána nɛ á soo ǹ ne.» 15Sɛnɛ, ǹ tá re pii: «Ma nə n liɛ ka Dɛnaa Lawa Yiikoonaa tɔ nɛ, asɛ mɛn Izirayeli minin waa gɔsɛ a lɛ̀gɔn la gána nɛ#16.15 Zeremii a biikoo li ǹ goa wolen lɛn man boe gɔsɛ a lɛ̀gɔn la. ka gána kɔsɔn kɛn nɛ á goã á ǹ pɛsɛ̃ ǹ nɛ.» Hiĩ, ma gána mɛn kɔ ǹ digolon la, ma á re wusii ma da ǹ nɛ walan.
Zɛ̀rɛdɛnaa kɔn ba re n boe a-n wa
16Dɛnaa Lawa a da ǹ boo á ke: «Ma á re zɔ̀-kũli gigiã diɛ, ǹ da minin kɛn kũ. Bɛ kio, ma á re dɔ-dɔli damata diɛ ǹ da ǹ loo kelen la, tentenen ne, ka kele yalan tumaa nɛ. 17Ǹ bɛ́ sii mɛn yii zɛnɛɛ, ma yii tá a ganaa. Ǹ kɔn ba durii-n ma ganaa wa. Ma yii tá ǹ siɛ̃n ganaa. 18Ma á re ǹ kiɛ ǹ gɛ̀-dɛ ǹ giɔ̀mɔ lɛ laanka ǹ sãn lɛn saraa a laman paa saraa ganaa. A giala, ǹ nə́ *gɔ̀ da maa gána lɛ ganaa ka ǹ màn nyín gere bɔbɔnɛɛn kɛn nɛ. Gána mɛn bɛ má bɔ má koa maa wɔ lɛa, ǹ nə́ bɛ pã ka màn bɔbɔnɛɛn nɛ.»
Tɔrɔ tumaa á re Lawa taãn doɛ̃
19Dɛnaa Lawa, n din nə ma pàã lɛa.
N nə n ma tamɛɛ ka n pàã gole
kɛ nɛ.
Koe biikoo li,
n din nə maa duru ǹ bǎã lɛa.
Tɔrɔn tá re boe kanaa lɛ dan ganaa,
ǹ da n li, ǹ pɛ:
«Wɔ digolon man nə́ soɛ dinsɔɔ̃ ma,
sii kooron mɛnɛn bɛ́ là ba
ǹ ganaa wa.
20Minbuiin nɛ á boe la
a lawan zɛnaa?
A bɛ́ màn mɛn zɛnɛɛ, Lawa bie wa!»
21Dɛnaa Lawa pɛ:
Á bǐɛ̃ kɔ! Kanna kəni
ma á re ma pàã laanka maa boo
sii la baa
nyɛɛ ǹ nɛ taãn-taãnɛ.
Ǹ tá re doɛ̃ ka bɛ-n kəni
mà ma tɔ n "Dɛnaa Lawa".
Currently Selected:
Zer 16: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
