BLS 8
8
Sii-dɔ̃li laanka pàã boo
1Die n sii-dɔ̃li taãn lɛa?
Die yii n doe sii gɔ́ɔ̃-n taãn-taãnɛ?
Min a sii-doɛ̃ na a yɔrɔ diɛ tɛ pɛ-a.
Ǹ dɛnaa yɔrɔ a babaraabaa dɔ nə n bɔyɛɛ.
2Masɛ máa bɛ̀ kii boo mɛn da,
n bɛ si
lɛ-kɔ kɛ taman yii,
ń wɔ Lawa yɔrɔ-a#8.2 lɛ-kɔ kɛ taman yii, ń wɔ Lawa yɔrɔ-a: Ebrəə bɔlɔ nɛ, bɛa bǎã lɛ a foaãn wa. Min tá boe la dɔn a na a giala ma, mà Lawa n bɛa lɛ-kɔ lɛ we kii ni..
3N baran n nanaa n nə n wɔlɔ lui kii ganaa wa.
Sii mɛn bɛ́ a ba kɔɔ̃n a wa,
n baran n paraa bɛa zɛnaa-a wa.
A giala,
sii mɛn tumaa bɛ́ kɔɔ̃n kii ganaa,
a n bɛ zɛnɛɛ.
4Sonbore, boo ba kii a boo la kuri wa.
Die yii ń we a pɛ nɛ,
mà wàa sii n ke á tá zɛnɛɛ?
Min pepere ba kiri kurii biikoo doɛ̃ wa
5Min mɛn bɛ́ gɔn-waa sii,
sii a re bɛa dɛnaa yii wa.
Sii-dɔ̃li á doɛ̃,
mà ǹ kɔn pinaa,
mà kiri tan.
6A giala,
sii tumaa laanka a biikoo ne,
ka a kiri kurii dɔ nɛ.
Sɛnɛ koe gole tan,
minbuiin nɛ wɔ lɛa.
7Sii mɛn bɛ́ re n zɛnɛɛ,
a bɛ doɛ̃ wa.
Bɛa sii lɛ bɛ́ re n zɛnɛɛ lɔn,
die n die bɛ pii ni?
8Min kɔn nyin biɛ ba a din gɔn,
a tɔn boo la a tamaa wa.
Min kɔn ba boe la,
a na a gɛ̀ lɛawaa zɔ̃ a wo-n nyɛɛn wa.
Bɛa zia kɛ lɛ miã,
la ǹ gɔn banban wa.
Min mɛnɛn bɛ́ baraabaa zɛnɛɛ,
baraabaa lɛ ba re ǹ sii a ǹ kaa wa.
9Má bɛ tumaa yɛ.
Sii mɛn tumaa bɛ́ n zɛnɛɛ kanaa kɛ nɛ,
má n yiri kɔ li doɛ̃.
Biikoo na a tan,
minbuiin nɛ n boe ǹ miã minbuiin nɛ yii ni,
a baa koe-yele lɛa.
10Bɛa yɔrɔ lɛ la,
má yɛ ǹ nə́ min baraan bĩ.
Minin man nə́ goã n toɛ Lawa a kion,
bɛ̀ ǹ woo bɛ̀ ǹ daa,
ǹ nə́ bɛa min baraan kɛn lɛn tɔ boe kiwi gɔ́ɔ̃ nɛ,
ǹ nya ǹ dín taman yii.
Bɛ dɔ giala banban.
11Nya ǹ dí baraan lɛn dɔlɔ bɛ́ a ba n boe a bǎã-n wa,
bɛ lɛ n ke toɛ,
sii baraa zɛnaa ǹ foo n minbuiin nɛ-n taãn-taãnɛ.
12Min baraa á boe la,
a sii baraa zɛnaa gunyin damata,
a yii dɔ n tɔn koo kiɛ̃.
Sɛnɛ, ma á doɛ̃,
máa nyɛ́ɛ baa Lawa yii-n wolen wɔ á die bǐɛ̃ koe.
A giala mà ǹ tá nyɛ́ɛ biɛ Lawa yii ni.
13Sɛnɛ, yii-nyɛɛ ba re yii,
sii baraa zɛnaali lon wa.
A n die kiɛ̃ ka wúlu bɛ́ lɔn,
a nyin nya kunu,
a giala,
a ba nyɛ́ɛ biɛ Lawa yii-n wa.
14Sii goon tá n zɛnɛɛ kanaa kɛ nɛ,
a giala banban.
Min peperen manə ǹ tan,
min baraan nə kɔnbɔ ka sii mɛn nɛ,
bɛ nə ǹ yii.
Min baraan dɔn manə ǹ tan,
min peperen nə kɔnbɔ ka sii mɛn nɛ,
bɛ nə ǹ yii.
Ka ma pɛ lɔn lɛn,
bɛ ba a zii la wa!
Kɛ yɛ masɛ nɛ.
15Má tɔ́n pɛ máa nyɛnyɛɛ n sii sonbore lɛa a tɔ-a,
a giala, màn kɔn din ba soɛ minbuiin nɛ ganaa,
kanaa kɛ-n wa.
Bɛ̀ á n bɔ, a màn bii,
a màn mi, a n nyɛnyɛɛ.
Bɛ lɛ na a dí lɛ a là lɛa,
a tá kanaa lɛawaan kɛn gɔ́ɔ̃ nɛ,
Lawa nə́ ǹ kɔ la.
Sii mɛn pàã la sii-doɛ̃ nɛ
16-17Min bɛ́ siɛ lɔn a tɔn sii-dɔ̃li baa,
má da ma foo ne,
máa ma bɛ giala ma.
Minbuiin nɛ bɛ́ màn mɛn tumaa zɛnɛɛ kanaa kɛ nɛ,
má n yii wɔ bɛ gɔ́ɔ̃-n sɔnbɔraanɛ.
Má yɛ, máa ta wɔ n goɛ̃ wɔ yii ń koo,
tèlò laanka penleen ne,
wɔ ba boe la,
wɔ Lawa a sii zɛnaa giala ma wa.
Minbuiinin tá boe la,
ǹ nə n gɔ̀nɔn da ǹ dinin-a,
ǹ ga a giala li, sɛnɛ ǹ ba yii wa.
Ta sii-dɔ̃li din pɛ mà asɛ á doɛ̃,
a ba boe la, a na a giala ma wa.
Currently Selected:
BLS 8: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
