BLS 7
7
Sii mɛn bɛ́ soɛ ǹ miã nɛ
1 #
Suu 22.1
Tɔ sonbore á soɛ nyɔɔ gìĩ kɔɔ̃n sonbore ne.
Min a gɛ̀ pinaa á soɛ a yɛ pinaa nɛ.
2Gɛ̀ gã kion mɛn nɛ,
bɛa woo á soɛ,
kion kɛ wɔ nɛ, zɔ́n ná a nɛ.
A giala,
gɛ̀ lɛ n min tumaa a gɔn nyɔmɔɔ ǹ bǎã lɛa.
Yǎa yiikoonaan nə n yiri koɛ bɛ li taãnɛ.
3Taásiɛ á soɛ yaa nɛ.
Taásiɛ n yɔrɔ kɔsɛ,
sɛnɛ, a n min doree.
4Gɛ̀ gã kion mɛn nɛ,
sii-dɔ̃lin taasiɛ n walan.
Zɔ́n bɛ́ kion mɛn nɛ,
baãnaan sɛn taasiɛ n walan.
5Sii-dɔ̃li a min zɛ̀rɛ baa á soɛ,
baãnaa a min laakalaa nɛ.
6Nyan bɛ́ pupuri tɛ-n lɔn dɔn giulun,
baãnaa dɔ n yaa we miɛ̃ paɛ̃paɛ̃.
Sɛnɛ, bɛ dɔ giala banban.
7Sonbore,
bɔ min yii-n nə sii-dɔ̃li biɛ baãnaa lɛa.
Màn-gɔ na a yiri sii la.
8Sii a gɔn nyɔmiɛ̃ á soɛ a giala kɔ nɛ.
Sii simaa á soɛ din gole kɔ nɛ.
9 #
Zaaki 1.19
N foo baran saa lɛlɛ,
a yoo wa,
a giala foo yoo na á n yu baãnaan la.
10N baran pɛ mà wàa na á baa,
lɛlɛ á soɛ pelo kɛ-n wa.
A giala sii-dɔ̃li a nɔ̀n-diɛ ka biɛ bɛ-n wa.
11Sii-doɛ̃ lɛ n kɔɔ̃n ka kíɛ̃ bɛ́ lɔn,
Min mɛnɛn yii bɛ́ koo,
a là n bɛn ganaa.
12Sonbore,
sii-doɛ̃ n min boe sii ni,
ka wɔrɔ bɛ́ min boe sii-n lɔn.
Sonbore,
sii-doɛ̃ lɛ a là bɛ́ ka màn mɛn nɛ,
bɛ̀ a tá min mɛn lon,
a n toɛ ǹ dɛnaa la.
13Ga Lawa a nya ǹ dí ganaa:
a màn mɛn pusu,
die n boe la a bɛ tele?
14Nyɛnyɛɛ biikoo li,
n nyɛnyɛɛ.
Nɔmaa biikoo li, n taasɛ.
Lawa bɛ́ á yii-nyɛɛ lɛ zɛnaa lɔn,
a na á nɔmaa lɛ dɔ zɛnaa miɛ̃,
màn mɛn bɛ́ toɛ,
minbuiinin baran ǹ dinin biɛ̃ ǹ sii kɔn dɔ̃ wa.
Peperebaa laanka sii-doɛ̃
15A ma toa kanaa kɛ nɛ,
má n ma a siin giala miɛ wa,
ma yii sii tumaa yɛ.
Min pepere n boe la a papaã a peperebaa gɔ́ɔ̃ nɛ.
A da yaa,
min baraa yii n boe la a goã koo,
a baraabaa gɔ́ɔ̃ nɛ.
16N baran n din baa min pepere lɛa,
a la yii-n wa.
N baran n din baa sii-dɔ̃li lɛa,
a la yii-n wa.
Bɛ bie wa n tá re n din bɔ̀n biɛ.
17N baran baraa kɔ,
n soo a kio wa.
N baran baãnaa dɔ baa wa.
Bɛ bie wa n tá re giɛ̃,
n gɛ̀ ná a dɔ wa.
18Á siĩni n nə n gɔn paraa bɛ lɛ ganaa,
n nə n gɔn paraa bɛa doree màn paa kɛ lɛ ganaa.
A giala,
min mɛn bɛ́ nyɛ́ɛ biɛ Lawa nɛ,
a foɛ̃ bɛa sii paa kɛ lɛ kɔn baalɛ wa.
19Sii-doɛ̃ n pàã koe sii-dɔ̃li la,
a la goledɛnaa fù wɔ nɛ kiwi.
20Taãn nɛ,
min pepere goon ba kanaa kɛ gɔ́ɔ̃ nɛ,
sii bǐɛ̃ zɛnɛɛ,
a ná a ba sii baraa dɔ zɛnɛɛ wa.
21Ka bɛ dɔ nɛ,
minin bɛ́ boon mɛnɛn tumaa diɛ,
n baran n too kɔ bɛn li wa.
Màn mɛn bɛ́ toɛ,
n baran n dí-nyali lɛ ma,
lɛn baraa bíi n li wa.
22A giala n tá doɛ̃ n din gɔ́ɔ̃ nɛ,
mà gunyin gigiã,
mà nsɛ dɔ lɛn baraa bíi min kɔsɔn li.
23Má bɛa sii kɛ lɛ tumaa lɛn zɔɔ̃ ka sii-doɛ̃ nɛ.
Man má goã pii,
máa man die sii-dɔ̃li biɛ.
Sɛnɛ sii-doɛ̃ wɔlɔ goã lui-n ma ganaa.
24Sii din a taãn bɛ́ ka màn mɛn nɛ,
wɔa taasiɛ wɔlɔ á sɔsɔɔ bɛ ganaa,
a n zuzulu a tɔ-a,
die n boe la a bɛ giala ma?
25Má tɔ́n nə n din kɔ,
daraa laanka ga sii giala li la.
Sii-doɛ̃ bɛ́ màn mɛn lɛa,
man má goã zoɛ̃ bɛ li,
ka siin woo ǹ bǎã dɔ nɛ.
Má yɛ,
máa baraabaa hinlaa baãnaabaa n gàãnaabaa lɛa.
26Má yɛ dɔn,
lɔ mɛn nə́ ke ka kan bɛ́ lɔn,
bɛ á kɔɔsɛ á la gɛ̀ nɛ.
Bɛa lɔ lɛ a kɔn-narɛɛ n ka zɔ̀ɔ bɛ́ lɔn,
a gɔnɔn man ka zɔrɔkan bɛ́ lɔn.
Min mɛn a sii bɛ́ kiɛ Lawa foo la,
bɛ tá kanbiɛ a ganaa.
Sɛnɛ, a gɔn nə doe sii baraa-zɛnaali ganaa.
27-28Má n yii wɔ siin lɛn gɔ́ɔ̃-n gogoon,
má belebɔ nɛ,
màn mɛn bɛ́ toɛ ma ǹ giala ma.
Sɛnɛ, ma màn kɔn yɛ wa.
Á ke, sii-dɔ̃li lɛ na á goã pii:
min duu goon bii,
man má giĩ goon yɛ.
Sɛnɛ, ǹ tumaa bii,
man na lɔ goon din ni wa.
29Ma sii goon mɛn giala ma, bɛ á ke:
Lawa na á minbuiin nɛ zɛnaa pepere,
sɛnɛ, ǹ dinin man nə́ sii tumaa lɛ laa.
Currently Selected:
BLS 7: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
