Vẽnegre 14
14
Pe‑bilã ne a sẽn fãag-b rãmbã yɩɩlle
1 #
Eze 9.4, Vẽn 7.3 Mam gesame, la m yãnda pe-bilã sẽn yik n yas Sɩyõ tãngã zugu, tɩ neb tus koabg la tus pis-naas la a naas sẽn da tar pe-bilã yʋʋr ne b ba wã yʋʋr sẽn gʋls b rĩyẽ wã be ne bãmba. 2Mam wʋma koɛɛg sẽn yi arzãna, n wẽnd wa ko-kãsems koɛɛga, wa sa-kɛleng kãseng bʋrgo, la rãamd ning mam sẽn wʋmã ra wẽnda wa pend-wẽedb sẽn wẽed b pendse. 3B yɩɩnda yɩɩn-paalg geerã taoore, la bõn-vɩɩs a naasã ne kãsem-dãmbã taoore. Ned ba a yembr ra ka tõe n zãms yɩɩllã ye, sã n ka neb tus koabg la pis-naas la a naas sẽn dag n paam fãagr dũni zugã. 4Yaa neb nins sẽn ka rẽgem b mens ne pagbã, bala b ka sãam ye. Bãmb na n pʋgda pe-bilã n dabd zĩig ning fãa b sẽn dabdã. B raa bãmb n yiis nebã sʋka, tɩ b yɩ wa dẽenem biis Wẽnnaam ne pe-bilã yĩnga, 5#Sof 3.13la zĩrẽ ka tol n zĩnd b noyẽ ye. Rõadg ka be b zut ye.
Malegs a tãab koeese
6Mam yãnda malɛɛk a to sẽn yɩgd n pɩʋʋgd yĩngri: A rag n tara koe-noog sẽn paad wakat sẽn kõn sa, n na n togs neb nins sẽn be tẽng zugã, soolem fãa, buud fãa, goam buud fãa nebã, la tẽng fãa nebã. 7Yẽnda zẽka a koɛɛg n yetẽ yaa: Zoe-y Wẽnnaam dabeem la y waoog bãmba. Bala wakat taame tɩ bãmb na n kao bʋʋdo. Wõgemd-y soab ning sẽn naan-a yĩngr la tẽngã, ko-kãseng ne ko-bundsã taoore. 8#Eza 21.9, Zer 51.8, Vẽn 18.2Malɛɛk a to sẽn yaa yiib-n-soab pʋglame n yetẽ yaa:
A lʋɩɩme! A lʋɩɩme!
Babilond kãsengã sẽn kɩt tɩ soolem dãmbã fãa
yũ yẽnda yoobã sẽn ka koakã reezẽ rãamã lʋɩɩme.
9Malɛɛk a to sẽn yaa tãab-n-soab pʋgla bãmb ne koe-kãseng n yeele: Ned sã n wõgemd rũngã ne a bõn-naandgã taoore, la a sã n deeg bãndã a dĩirẽ wall a nug zugu, 10#Eza 51.17, Sɩng 19.24, Eze 38.22yẽnda soab me na n yũu Wẽnnaam sũ-puugrã reezẽ rãam sẽn ka pulã, sẽn kiig bãmb sũ-puugr laagẽ wã. La yẽnda na n paama namsg bugmẽ la kidbr pʋga, malegs-sõamyã wã ne pe-bilã taoore. 11#Eza 34.10Bãmb namsgã bug-zõos zẽkda zamaan woo zamaane. La wĩndg ne yʋngo, neb nins sẽn wõgemded rũngã ne a bõn-naandgã taoorã, la ned ning sẽn deeg-a yẽnda yʋʋrã bãndã ka tol n tar vʋʋsem ye.
12Woto yĩnga, nin-sõamyã tog n nanga pãnga, n sakd Wẽnnaam tõodã la b tall tẽeb ne a Zeezi.
13Mam wʋma koɛɛg sẽn yi arzãn n yetẽ: Gʋlse: sẽn sɩng ne moasã, bark bee kũum nins sẽn kiid Zu-soabã tũudum pʋgẽ wã zutu. Sɩɩg-sõng yetame tɩ n-yẽe, tɩ b tõe n bas b tʋʋmã n vʋʋse, bala bãmb tʋʋmã pʋgd-b lame.
Dũniyã tigsgu
14 #
Dãn 7.13
Mam gesame la m yãnda sawad-pɛɛlga, la ned sẽn wẽnd wa ninsaal n dag n zao sawadgã zugu. A rag n fõgena a zug sãnem maanfo, la a zãad goeoog sẽn dɩt a nugẽ. 15#Zow 4.13Malɛɛk a to yii wẽnd doogẽ wã n zẽk a koɛɛg n gom ne sẽn zao-a sawadgã ne pãng n yeel yaa: Yulumd f goeoogã n wʋre. Wʋrb wakat taame, bala, bõn-koaadlã sẽn be tẽng zugã bɩɩme. 16La sẽn zao-a sawadgã zugã yulumda a goeoogã tẽngã zugu, la b tigsa tẽng zug bõn-koaadlã.
17Malɛɛk a to yii wẽnd doogã sẽn be arzãnã pʋgẽ. Yẽnda me rag n tara goeoog sẽn dɩte. 18Malɛɛk a to sẽn dag n tar pãn-tõog ne bugum yii tẽn-kugrẽ wã, n zẽk a koɛɛg n yeel malɛɛk ning sẽn zãad‑a goeoog sẽn dɩtã yaa: Yulumd f goeoogã sẽn dɩtã, n yãgs reezẽ tɩɩsã sẽn be tẽng zugã bi‑gĩna, bala, b reezẽ wã bɩɩme. 19Malɛɛkã yulumda a goeoogã tẽngã zugu. A yãgsa reezẽ tɩɩsã sẽn be tẽng zugã biisi n lob-b Wẽnnaam sũ-puugr reezẽ rãam wẽkr kogl‑kãsengã pʋga. 20#Eza 63.3, Wiis 1.15, Vẽn 19.15La b yii ne‑a tẽngã kɛɛng n tab‑a, la zɩɩm yii koglgẽ wã n zoe. A zulmã tata wiid salba, la a zoeeme n ta kɩlometr kobs-tã.
Currently Selected:
Vẽnegre 14: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
