Tõodo 30

Israyɛll na n lebg n waa Sẽn-Ka-Saab nengẽ

1Bark-kãensã ne kãab-wẽn-kãensã fãa mam sẽn wilg yãmbã sã n wa paam yãmba, tɩ y tags b yell buud a taabã tẽms nins Sẽn-Ka-Saab sẽn yaa yãmb Wẽnnaamã sẽn na n dig yãmb tɩ y kẽngã pʋga, 2yãmb ne y kambã sã n lebg n leb Sẽn-Ka-Saab sẽn yaa yãmb Wẽnnaamã nengẽ, n sak n kelg bãmb koɛɛgã ne bũmb nins fãa mam sẽn wilgd yãmb dũndã wã ne y sũyã fãa, la ne y yamã fãa, 3Sẽn-Ka-Saab sẽn yaa yãmb Wẽnnaamã na n zoee yãmb nimbãaneg n yiis yãmb yembdã pʋgẽ, buud nins fãa Sẽn-Ka-Saab sẽn dig yãmb tɩ y kẽng b nengẽ wã sʋka. 4Baa Sẽn-Ka-Saab sẽn yaa yãmb Wẽnnaamã sã n wa rig yãmb tɩ y saag dũniyã tɛk fãa, Sẽn-Ka-Saab sẽn yaa yãmb Wẽnnaamã na n tigma yãmb n yiis beenẽ. 5Sẽn-Ka-Saab sẽn yaa yãmb Wẽnnaamã na n talla yãmb n wa tẽng ning yãmb yaab-rãmbã sẽn dag n so wã n kõ yãmb tɩ y sooge. Sẽn-Ka-Saab sẽn yaa yãmb Wẽnnaamã na n maana yãmb neere, n kɩt tɩ y lebg wʋsg n yɩɩg y yaab-rãmbã. 6Sẽn-Ka-Saab sẽn yaa yãmb Wẽnnaamã na n teka yãmb ne y yagensã sũy tɩ y nong Sẽn-Ka-Saab sẽn yaa yãmb Wẽnnaamã ne y sũyã fãa, la ne y yamã fãa n tõog n vɩɩmde. 7Sẽn-Ka-Saab sẽn yaa yãmb Wẽnnaamã na n kɩtame tɩ kãab-wẽn-kãensã fãa paam y bɛɛbã ne sẽn kis-b yãmb n namsd yãmbã. 8La yãmba, yãmb na n leb n kelga Sẽn-Ka-Saab koɛɛgã, n sak bãmb tõod nins fãa mam sẽn kõ yãmb dũndã wã. 9Sẽn-Ka-Saab sẽn yaa yãmb Wẽnnaamã na n kõo yãmb paoong wʋsgo, n kɩt tɩ yãmb nus tʋʋmã fãa biis fɩɩge: sã n yaa y kambã, wall y rũmsã kamba, wall y koodã. Bala, Sẽn-Ka-Saab sũur na n leb n yɩɩ noog ne yãmba, y sẽn tar sũ-noogã yĩnga, wa b sẽn dag n tar sũ-noog ne y yaab-rãmbã sẽn dag n tar sũ-noogã. 10Yãmb sã n kelg Sẽn-Ka-Saab sẽn yaa yãmb Wẽnnaamã koɛɛgã n sak bãmb tõodã ne no-tũuds nins sẽn gʋls tõogã seb-kãngã pʋgẽ wã, yãmb sã n lebg n wa Sẽn-Ka-Saab sẽn yaa yãmb Wẽnnaamã nengẽ ne y sũyã fãa, la ne y yamã fãa, bõn-kãng na n yɩɩ woto.

Tõogã sakr bee ne tõndo

11Tõ-kãngã mam sẽn kõt yãmb dũndã wã ka yɩɩd yãmb pãng ye, la a ka zãr ne yãmb ye. 12#Rom 10.6-8A ka be yĩngr tɩ y na n yeel tɩ ãndã n na n dʋ be n tall-a n wa kõ yãmb tɩ y wʋm la y sak-a ye. 13A ka be ko-kãsengã rʋʋnd tɩ y na n yeel tɩ ãndã n na n dʋʋg n tɩ tall-a n wa kõ yãmb tɩ y wʋm la y sak-a ye. 14Gomdã pẽe ne foom. A bee fo noorẽ, a bee fo sũurẽ, tɩ f tõe n sak-a.

15Gese, rũndã, mam ningda vɩɩm ne naare, la kũum ne toog y taoore. 16Noor ning mam sẽn kõt yãmb dũndã wã, yaa tɩ y nong Sẽn-Ka-Saab sẽn yaa yãmb Wẽnnaamã, la y sak Sẽn-Ka-Saab sẽn yaa yãmb Wẽnnaamã, n tũ bãmb soyã la y sak bãmb tõodã, ne b no-tũudsã la b noyã, n tõog n vɩɩmd n lebg wʋsgo, tɩ Sẽn-Ka-Saab sẽn yaa yãmb Wẽnnaamã ning-y bark tẽng ning yãmb sẽn na n kẽ n soogã pʋgẽ. 17La yãmb sã n bʋdge, yãmb sã n ka kelge, la y sã n bas tɩ b peeg yãmb tɩ y sak n wõgemd n waoog buud a taabã wẽnnaam-dãmba, 18mam yeta yãmb dũndã tɩ y na n menema zãnga. Yãmb ka na n vɩɩmd n kaoos tẽng ning yãmb sẽn na n dʋʋg Zʋrdẽ wã n tɩ kẽ n soogã pʋgẽ ye. 19Dũndã, saasã la tẽngã yaa mam kaset-dãmba, tɩ mam ninga vɩɩm la kũum, ne bark la kãab-wẽns y taoore. Yãk-y vɩɩmã, tɩ yãmb ne y yagensã tõe n vɩɩmde, 20#Sɩng 12.7, Sɩng 26.3, Sɩng 28.13la y nong Sẽn-Ka-Saab sẽn yaa yãmb Wẽnnaamã, n sak bãmb koɛɛgã n loe y sũurã ne bãmba. Yaa bãmb n kõt yãmb vɩɩm la yõ-woko, sẽn na yɩl tɩ yãmb tõe n zĩnd tẽng ning Sẽn-Ka-Saab sẽn yaa yãmb Wẽnnaamã sẽn dag n wẽen n yeel y yaab-rãmb a Abrahaam ne a Izaak la a Zakoob tɩ b na n kõo bãmbã.

Currently Selected:

Tõodo 30: MPBU

Highlight

Copy

Compare