Tõodo 29

B leb n maana kaoola

1A Moyiis boola Israyɛll nebã fãa n yeel-b yaa: «Yãmb yãnda bũmb nins fãa Sẽn-Ka-Saab sẽn dag n maan Faarõ ne a tʋmtʋmdbã, la a soolmã fãa sẽn yaa Ezɩptã yãmb nifẽ wã. 2Yaa to-kãsems nins ne bãn ninsi, la bõn-yɛɛsds nins yãmb nifã sẽn yãndã. 3La hal tɩ ta rũndã, Sẽn-Ka-Saab ka kõ yãmb yam tɩ y bãnge, wall nin tɩ y yãnde, wall tʋb tɩ y wʋm ye. 4Mam talla yãmb we-raoogã pʋgẽ yʋʋm pis-naase, la fut nins yãmb sẽn dag n yerã ne neoodã nins yãmb sẽn pidã ka ki ye. 5Yãmb ka wãb buri, la y ka yũ reezẽ rãam bɩ rã-toose, tɩ yãmb tõe n bãng tɩ mam yaa Sẽn-Ka-Saab sẽn yaa yãmb Wẽnnaam.

6 # Sõd 21.21-30, Sõd 21.31-35 Yãmb waa zĩ-kãnga, la Hɛsbõ rĩm a Sihon ne Basan rĩm a Oog yiime n zab ne tõndo. La tõnd tõoga bãmba. 7#Sõd 32.33La tõnd deega bãmb tẽngã n kõ a Rubɛn ne a Gaad yagensã la a Manaas buud pʋɩ-sʋkã yagensã tɩ b sooge. 8Woto yĩnga, gũus-y y mens n sak kaool-kãngã goamã fãa, la y rɩk-b n ning b nao-kẽndr zugu, tɩ y tõe n paam tõogr bũmb nins fãa yãmb sẽn maandã pʋga.

9Yaa Sẽn-Ka-Saab sẽn yaa yãmb Wẽnnaamã taoor la yãmb sẽn yas rũndã wã, yãmb fãa ne y buudã nanambse, y kãsem-dãmbã, y seb-gʋndbã, ne Israyɛll daopã fãa, 10la yãmb pagbã ne y kambã, la sãamb nins sẽn be yãmb sikã zĩigẽ wã, sẽn sɩng ne neb nins sẽn kɛɛd raadã n tɩ ta neb nins sẽn yõngd koom n kõt yãmbã, 11n na n kẽ Sẽn-Ka-Saab sẽn yaa yãmb Wẽnnaamã kaoolã pʋgẽ ne wẽeneg ning bãmb sẽn wẽen n maan kaool ne yãmb dũndã wã, 12n na kɩt tɩ yãmb yɩ bãmb nebã, tɩ bãmb meng yɩ yãmb Wẽnnaam wa b sẽn dag n wẽen n yeel yãmbã, la a wa b sẽn dag n yeel yãmb yaab-rãmb a Abrahaam ne a Izaak la a Zakoobã. 13Ka ne yãmb bal la mam maand kaool-kãngã, la ne wẽeneg-kãngã ye. 14Yaa ne neb nins sẽn be ka Sẽn-Ka-Saab sẽn yaa yãmb Wẽnnaamã taoor ne tõnd dũndã wã, la ne neb nins sẽn ka be ne tõndã, n na n yaool n wa tõnd poorẽ wã me.

15Yãmb mengã bãnga tõnd sẽn zĩnd Ezɩpt tẽngã sẽn yɩ to-to, la tõnd sẽn yɩ to-to n pɩʋʋg buud a taab nins sʋk yãmb sẽn tũ n loogã. 16Yãmb yãnda yel-beed nins bãmb sẽn maandã, la bõn-naands nins sẽn maan ne raad la kug la wanzuri ne sãnemã bãmb sẽn tarã. 17#Ebr 12.15Bɩ raoa, wall paga, bɩ roog wall buud tõr ra wa zĩnd yãmb sʋkã, n bʋdg n bas Sẽn-Ka-Saab sẽn yaa yãmb Wẽnnaamã n tũ bu-kãens wẽnnaam-dãmbã, n wa ne zẽnem la sũ-toog yãmb sʋk ye. 18Ned sã n wʋm goam nins b sẽn gom wẽen-kangã pʋgã, bɩ a ra kãab a meng noog n yeele: «Baa mam sã n tũ m sũurã tagsg n maan tʋʋm-wẽns tɩ looge, yell ka na n paam maam ye.» 19Sẽn-Ka-Saab ka na n kõ yẽnda sugr ye. Sẽn-Ka-Saab sũ-kãbrã ne b sũ-kiirã na n yika ne a soaba, tɩ tood nins fãa sẽn gʋls seb-kãngã pʋgẽ wã wa a soab zugu. La Sẽn-Ka-Saab na n kɩtame t'a yʋʋr menem tẽng zugu. 20Sẽn-Ka-Saab na n welga yẽnda Israyɛll buudã sʋka, t'a paam toog wa sẽn zems kaoolã kãabd nins fãa sẽn gʋls seb-kãngã pʋgẽ wã.»

Sẽn-Ka-Saab na n pidsa b sɩbgrã

21Zamaan nins sẽn na n pʋgl n wa wã, yãmb yagensã sẽn na n pʋgl yãmbã, ne sãamb nins sẽn yi tẽn-zãrgẽ n wa wã sã n yãnd tẽn-kãngã toodã ne bãas nins Sẽn-Ka-Saab sẽn kɩt tɩ yõk nebã na n yeelame: 22#Sɩng 19.24,25«Kidbr bugum ne yamsem dɩɩ tẽngã gilli. Bʋdb ka tõe n bʋde, bõn-buud me ka tõe n yi, la tɩɩg me ka tobd ye. Yaa wa Sodom la Gomoore, wa Adma la Seboyim, Sẽn-Ka-Saab sẽn sãam b sũ-yikrã ne b sũ-kãbrã pʋgã. 23Buud a taabã fãa na n sokame tɩ yaa bõe tɩ Sẽn-Ka-Saab maan tẽngã woto, la bõe n kɩt tɩ Sẽn-Ka-Saab sũur yik wʋsg woto?» 24La b na n leokame: «Yaa nebã sẽn bas Sẽn-Ka-Saab sẽn yaa b yaab-rãmbã Wẽnnaamã kaoolã, bãmb sẽn dag n maan ne bãmb wakat ning b sẽn yiis bãmb Ezɩptã yĩnga. 25Bãmb tũu wẽnnaam-dãmb a taab bãmb sẽn dag n ka mi, n wõgemd bãmb taoore, la Sẽn-Ka-Saab yaool n dag n gɩdga bãmb tɩ b ra waoog-b ye. 26Woto yĩnga, Sẽn-Ka-Saab sũur yika ne tẽngã tɩ kãab-beed nins fãa sẽn gʋls seb-kãngã pʋgẽ wã paam-a. 27Sẽn-Ka-Saab yiisa bãmb b tẽngẽ wã ne sũ-puugri, la sũ-kãbre, ne sũ-yik-kãsenga, n tɩ lobg bãmb tẽn-taaga. Bõn-kãng yĩng n kɩt tɩ yellã yaa a woto rũndã.

28Bũmb nins sẽn solgã yaa Sẽn-Ka-Saab sẽn yaa tõnd Wẽnnaamã n so. La bũmb nins b sẽn vẽnegã yaa tõnd ne d kambã yĩng wakat fãa, sẽn na n yɩl tɩ tõnd dɩk tõ-kãensã goamã fãa n ning b nao-kẽndr zugu.»

Currently Selected:

Tõodo 29: MPBU

Highlight

Copy

Compare