Tõodo 1

A MOYIIS PIPI KOEESE

1Ad goam nins a Moyiis sẽn gom ne Israyɛll nebã fãa b sẽn wa n nan ka rʋʋg Zʋrdẽ kʋɩlgã, n be weoogã pʋgã, tẽn-nabd-koɛɛngã pʋgẽ, sẽn tot ne Suf tẽngã sẽn be Paarã ne Tofɛll la Labã ne Hatserot la Di-Zahaab sʋkã. 2Fo sã n yi Orɛɛbe, n dɩk Seyɩɩr soolmã sẽn be tãms sʋkã sor n dat Kadɛɛs-Barneya, fo na n kẽna rasem piig la a yembre. 3Yaa yʋʋm pis-naas yʋʋmdã, kiuug piig la a yembr soabã pipi daarã, la a Moyiis togs nebã bũmb nins Sẽn-Ka-Saab sẽn dag n wilg yẽnda t'a togs Israyɛll nebã. 4#Sõd 21.21-35Yaa yẽnda sẽn wa n zab n tõog Amoor-dãmbã naab a Sihon sẽn be Hɛsbõ wã, ne Basan naab a Oog sẽn be Astarot ne Edreyi wã zugẽ. 5Yaa Moaab tẽngã pʋgẽ, b sẽn wa n ket n nan ka rʋʋg Zʋrdẽ kʋɩlgã, la a Moyiis sɩng n bilg tõ-kãngã n yeele: 6«Sẽn-Ka-Saab sẽn yaa tõnd Wẽnnaamã goma ne tõnd Horɛɛb tãngã zug n yeele: Yãmb kaoosa tãn-kãngã sɛɛgẽ wʋsgo. 7Yik-y n wẽnemd-y n kẽng-y Amoor-dãmbã tãms sʋka, la Araba sẽn yegd bãmbã, la tãmsã sʋka, ne tẽn-nabdrẽ wã, la Negɛɛv ne ko-kãsengã noore, la Kana tẽngã, ne Libã hal tɩ ta kʋɩl-kãseng ning sẽn boond tɩ Efratã. 8Gese, mam kõo yãmb tẽngã. Kẽng-y n tɩ soog-y tẽng ning Sẽn-Ka-Saab sẽn dag n wẽen ne y yaab-rãmb a Abrahaam ne a Izaak la a Zakoob tɩ m na n kõo bãmb ne b yagensã.»

B yãka taoor-dãmba

9«Wakat-kãnga, mam yeela yãmb tɩ maam m yembr ka tõe n zã yãmb fãa ye. 10Bala, Sẽn-Ka-Saab sẽn yaa yãmb Wẽnnaamã kɩtame tɩ yãmb fɩɩg n lebg wʋsgo. Rũndã, yãmb yaa wʋsg wa ãdsã sẽn be saasẽ wã. 11Bɩ Sẽn-Ka-Saab sẽn yaa yãmb yaab-rãmbã Wẽnnaamã kɩt tɩ yãmb yɩ wʋsg naoor tusr n yɩɩd y sẽn yaa bũmb ning rũndã wã, la b ning-y bark wa bãmb sẽn dag n yeel yãmbã. 12Rẽ yĩnga, maam m yembr tõe n zã yãmba, la m tʋk yãmb nokoɛɛmã ne y yɛlã zɩɩb sɩda. 13Yãk-y neb yãmb sʋkã sẽn tar yam ne bãngre, la nebã, nebã sẽn mi sõama, n wa tɩ m lʋɩɩs-b yãmb taoore.» 14La yãmb fãa leoka maam tɩ bũmb ning mam sẽn dat n maanã yaa sõama. 15Dẽ, mam dɩka yãmb buudã kãsem-dãmbã sẽn tar yam la neb nins nebã sẽn mi sõama wã, n lʋɩɩs yãmb taoore, n kɩt tɩ kẽer lebg neb tusr-tusr nanambse, tɩ kẽer lebg neb koabg-koabg nanambse, tɩ kẽer lebg neb pis-nunu nanambse, tɩ kẽer lebg neb piig-piig nanambse, tɩ kẽer yɩ seb-gʋndb yãmb buudã toor-toorã pʋse. 16Wakat-kãnga, mam kõo yãmb bʋ-kaoodbã noor n yeel-ba: «Kelg-y y saam-biisã koeese, la y bʋ bʋʋdã tɩrga, Israyɛll ned ne a saam-biig sʋka, la Israyɛll ned ne sãan sʋka. 17Yãmb sã n na n bʋ bʋʋdã, bɩ y ra maan welgr nebã ne taab sʋk ye. Kelg-y nin-talsã ne nin-bɛdã. Ra-y zoe-y ned ba a yembr nif ye. Bala, yaa Wẽnnaam n so bʋʋdo. La yellã sã n yaa toog ne yãmb tɩ y ka tõe n bʋ a bʋʋdo, bɩ y tall-a n wa mam nengẽ tɩ m kelg-a.» 18Woto, mam wilga yãmb wakat-kãnga, y sẽn tog n maan bũmb ninsã fãa.

B tʋma tẽn-gũusdba

19Tõnd yikame n yi Horɛɛb n kẽn n pɩʋʋg we-rao-kẽen-kãngã sẽn dɩt nebã wala y sẽn tẽrã. Tõnd dɩka Amoor-dãmbã tãng sor wa Sẽn-Ka-Saab sẽn yaa tõnd Wẽnnaamã sẽn dag n yeel tõndã, la tõnd taa Kadɛɛs-Barneya. 20Dẽ, mam yeela yãmb tɩ y taa Amoor-dãmbã tãng ning Sẽn-Ka-Saab sẽn yaa tõnd Wẽnnaamã sẽn kõ tõndã. 21Gese, Sẽn-Ka-Saab sẽn yaa yãmb Wẽnnaamã kõo yãmb tẽngã, kẽng-y n tɩ soog-y-yã-a wa Sẽn-Ka-Saab sẽn yaa yãmb yaab-rãmbã Wẽnnaamã sẽn yeel yãmbã. Ra yɛɛs-y ye, la ra-y zoe-y rabeem ye. 22Yãmb fãa kolga maam n yeel tɩ d tʋm neb tɩ b reng taoor n tɩ ges tẽngã n wa wilg tõnd sor ning d sẽn tog n tũ, la tẽms nins d sẽn tog n ta wã. 23Mam sɩd mikame tɩ yãmb sẽn yeel bũmb ningã yaa sõama. Woto, mam yãka neb piig la a yiibu, buud fãa pʋgẽ ned a ye. 24Woto, bãmb lebgame n dʋ tãmsã n kẽng n ta Ɛskoll ko-soogã n ges tẽngã. 25Bãmb yãka tẽngã tɩɩs biis n tall n wa kõ tõndo, la b yeele: «Tẽng ning Sẽn-Ka-Saab sẽn yaa tõnd Wẽnnaamã sẽn kõ tõndã yaa sõama.»

26 # Tõ 9.23, Ebr 3.16 Ne rẽndã fãa, yãmb ka sak n na n kẽng ye. Yãmb kɩɩsa Sẽn-Ka-Saab sẽn yaa yãmb Wẽnnaamã tõodã. 27Yãmb zĩnda y fu-rotẽ wã n yẽgem n yeele: «Yaa Sẽn-Ka-Saab sẽn kis tõndã yĩng la b sẽn yiis tõnd Ezɩpt n na n dɩk tõnd n kõ Amoor-dãmbã tɩ b sãam tõndã. 28Tõnd na n kẽnga yɛɛnẽ? Tõnd saam-biisã kɩtame tɩ d raood sɛ, bãmb sẽn yeel tɩ tẽngã nebã yaa nin-bɛd la wogd n yɩɩd tõndã yĩnga, la b sẽn yeel tɩ tẽmsã yaa kãsemse, tɩ b lalsã tat saasã, la b sẽn yeel tɩ b yãnda a Anak yagensã be wã yĩnga.» 29La mam yeela yãmb tɩ y ra yɛɛs ye, la y ra zoe rabeem ye. 30Bala, Sẽn-Ka-Saab sẽn yaa yãmb Wẽnnaamã sẽn lʋɩ yãmb taoor n kẽndã na n zab n kõo yãmb wa b sẽn dag n maan Ezɩpt to-to yãmb fãa nifẽ wã. 31#Tʋʋm 13.18Weoogã pʋga, yãmb yãnda Sẽn-Ka-Saab sẽn yaa yãmb Wẽnnaamã sẽn buk yãmb wa ned sẽn buk a biiga, kẽndã fãa pʋgẽ hal tɩ yãmb wa tãag zĩ-kãngã wã. 32#Ebr 3.19Baa ne rẽndã fãa, yãmb ned ba a yembr ka tẽ Sẽn-Ka-Saab sẽn yaa yãmb Wẽnnaamã ye. 33Yaool n yaa bãmb n dag n lʋɩt yãmb taoor sorã zugu, n na n bao sik zĩig n kõ-yã. La yʋngo, bãmb bee vẽenem pʋga, n na n wilg yãmb sor ning y sẽn tog n dɩkã, la wĩntoogo, bãmb bee sawad-taok pʋga. 34#Ebr 3.18Sẽn-Ka-Saab wʋma yãmb goamã. La b sũ-yikrã pʋga, b wẽename n yeele: 35«Zamaan-kãngã nebã sẽn yaa nin-wẽnsã baa a yembr kõn tol n yãnd tẽn-noog ning mam sẽn dag n wẽen n yeel tɩ m na n kõo yãmb yaab-rãmbã ye, 36sã n ka a Yefune biig a Kalɛɛb bala. Yẽnda na n yãnda tẽngã. La mam na n kõo yẽnda ne a yagensã tẽng ning yẽnda naoã sẽn tabã t'a sooge. Bala, yẽnda tũu Sẽn-Ka-Saab ne a sũur fãa. 37Yaa yãmb yĩng me la Sẽn-Ka-Saab sũur yik ne maam tɩ b yeel maam tɩ mam me ka na n kẽ tẽn-noogẽ wã ye. 38La a Nun biig a Zozoe sẽn sõngd foomã na n kẽe beenẽ. Keng a raoodo, tɩ yaa yẽnda n na n tall Israyɛll nebã n tɩ kẽes tẽngẽ wã tɩ yɩ b soolem. 39La yãmb zakã neb nins yãmb sẽn dag n gomd tɩ b na n yõg-b lame n tɩ kẽes yembdã, la yãmb kamb nins sẽn nan ka mi b nensã na n kẽe beenẽ. Yaa bãmb la mam na n kõ tẽngã tɩ b sooge. 40La sã n yaa ne yãmba, wẽnemd-y n dɩk-y we-raoogã sor n tees Rudum ko-kãsengã sẽnẽ.» 41Dẽ, yãmb leoka maam n yeel yaa: «Tõnd beega Sẽn-Ka-Saabo. Tõnd na n kẽngame n tɩ zab wa Sẽn-Ka-Saab sẽn yaa tõnd Wẽnnaamã sẽn dag n yeel tõndã.» Dẽ, yãmb fãa sũu tãp n tagsdẽ tɩ na n yɩ naana ne yãmb tɩ rʋ tãmsã sʋka. 42Dẽ, Sẽn-Ka-Saab yeela maam yaa: «Yeel-b tɩ b ra kẽng n tɩ zab ye. Bala, mam sẽn ka be yãmb sʋkã yĩnga, yãmb bɛɛbã na n tõog-y lame.» 43Dẽ, mam goma ne yãmb la yãmb ka kelg ye. Yãmb kɩɩsa Sẽn-Ka-Saab noor n maan y mens yam n kẽng tãmsã sʋka. 44La Amoor-dãmba sẽn be tãmsã sʋkã yiime n zab ne yãmb n tõog yãmb n dig-y wa sĩ sẽn digd neda, la bãmb kʋʋ yãmb nebã sẽn sɩng ne Seyɩɩr hal n tãag Horma. 45Yãmb sẽn lebg n wa wã, yãmb yãba Sẽn-Ka-Saab taoore, la Sẽn-Ka-Saab ka wʋme, la b ka sak n kelg yãmb sidgrã ye. 46Woto n kɩte, tɩ yãmb pa Kadɛɛs n kaoos wʋsgo.

Currently Selected:

Tõodo 1: MPBU

Highlight

Copy

Compare