Tõodo 2

1 # Sõd 21.4 Tõnd wẽnemdame n dɩk we-raoogã sor n tees rudum ko-kãsengã n kẽ weoogã wa Sẽn-Ka-Saab sẽn dag n yeel maamã. Tõnd dɩka weer wʋsg n gil Seyɩɩr soolem ning sẽn be tãms sʋkã.

Israyɛll nebã yeebg weoogã pʋgẽ

2Dẽ, Sẽn-Ka-Saab yeela maam yaa: 3Yãmb gilga tãn-kãngã n kaoos wʋsgo. Bɩ y wẽnemd n kẽng nug-rɩtg sẽnẽ. 4#Sɩng 36.8Yeel nebã woto: «Yãmb na n pɩʋʋga y saam-biisã sẽn yaa a Ezayu yagensã tẽngã sẽn yaa Seyɩɩrã. Bãmb na n zoee yãmba, la maan-y gũusg neere. 5Ra bao-y bãmb noor ye. Bala, mam ka na n kõ yãmb bãmb tẽngã baa bilf tɩ y soog ye. Bala, yaa maam n kõ a Ezayu Seyɩɩr soolem ning sẽn be tãms sʋkã t'a sooge. 6Yãmb na n da y rɩɩbã y sẽn na n dɩ wã ne ligdi, baa ne koomã y sẽn na n yũ wã, y na n daa ne ligdi. 7Bala, Sẽn-Ka-Saab sẽn yaa yãmb Wẽnnaamã ninga bũmb ning fãa yãmb sẽn maandã barka. B yãnda y kẽnã fãa we-raoogã pʋgẽ ka. Yʋʋm pis-naas la woto, Sẽn-Ka-Saab sẽn yaa yãmb Wẽnnaamã sẽn be ne yãmba, la bũmb ka paoog yãmb ye.»

8Tõnd lakame n zãag n bas d saam-biisã sẽn yaa a Ezayu yagensã sẽn be Seyɩɩrã, n loog n bas Araba sorã ne Elat la Etsɩyõ-Gebɛɛre, n wẽnemd n tees Moaab we-raoogã sore.

9 # Sɩng 19.37 Sẽn-Ka-Saab yeela maam yaa: Ra yik zabre, la f ra bao Moaab nebã noor ye. Bala, mam ka na n kõ yãmb bãmb tẽngã baa bilf ye. Yaa a Lot yagensã la mam kõ Aar tɩ b sooge. 10Emim neb n dag n be be pĩndã. Bãmb waoogame n yaa bɛd la wogd wa a Anak yagensã. 11B rag n geelgda bãmb me wa Refayim-dãmba, wa a Anak yagensã. La Moaab nebã rag n boonda bãmb tɩ Emim-dãmba. 12Hoor neb n dag n be Seyɩɩr tẽngã t'a Ezayu yagensã kʋ bãmb n deeg zĩigã wa Israyɛll nebã sẽn dag n maan tẽng ning Sẽn-Ka-Saab sẽn kõ bãmbã pʋgẽ wã. 13Sẽn-Ka-Saab yeela tõnd tɩ d yik n dʋʋg Zerɛɛd kʋɩlgã. La tõnd dʋʋg-a lame. 14#Sõd 14.28-35Tõnd sẽn yi Kadɛɛs-Barneya wã, maana yʋʋm pis-tã la a nii tɩ tõnd yaool n dʋʋg Zerɛɛd kʋɩlgã, tɩ zamaan-kãng raop nins sẽn dag n tõe n kẽng zabrã fãa ki wa Sẽn-Ka-Saab sẽn dag n wẽen ne bãmbã. 15Sẽn-Ka-Saab nug zĩnda bãmb sik zĩigã zug hal n menes-b fãa zãnga.

16Nebã sʋk neb nins sẽn tõe n kẽng-b tãpã fãa sẽn wa n ki zãnga, 17Sẽn-Ka-Saab yeela maam yaa: 18Dũndã, yãmb na n tũu Aar n pɩʋʋg Moaab toadgã. 19#Sɩng 19.38Yãmb sã n kẽ Amo nebã tẽngẽ, ra zab-y ne-ba, la y ra bao b noor ye. Bala, mam ka na n kõ yãmb bãmb tẽngã baa bilf tɩ y soog ye. Yaa a Lot yagensã la mam kõ tẽn-kãng tɩ b sooge. 20B rag n geelgda soolem-kãng wa Refayim nebã tẽnga. Refayim nebã n dag n deng n be beenẽ, la Amo nebã boonda bãmb tɩ Zamzumim. 21Bãmb dag n yaa buud sẽn tar pãnga, n yaa wʋsgo, la b yaa nin-wobd wa Anak buudã nebã. Sẽn-Ka-Saab kɩtame tɩ Amo nebã kʋ bãmb n deeg b soolmã n zĩndi. 22Sẽn-Ka-Saab rag n maana a woto me n kõ a Ezayu yagensã sẽn dag n be Seyɩɩre, wakat ning bãmb sẽn dag n kɩt tɩ b kʋ Hoor nebã n deeg b tẽngã n kẽ n be beenẽ hal tɩ ta rũndã. 23La sã n yaa ne Aava nebã sẽn dag n be tẽn-bãoonegã sẽn tall n tɩ tãag Gaaza wã, yaa Kaftoor nebã sẽn yit Kaftoorã n sãam bãmb n deeg b zĩigã n zĩndi.

B tõoga Hɛsbõ rĩm a Sihon

24Yik-y n dɩk-y sor n dʋʋg Arno ko-soogã. Gese, mam kõo yãmb pãng tɩ y tõog Amoor nebã naab a Sɩhon sẽn be Hɛsbõ wã ne a tẽngã fãa. Kẽng-y n tɩ bao-y-yã a Sihon noor n zab ne-a n deeg a tẽngã n sooge. 25Sẽn sɩng ne rũndã, mam na n kɩtame tɩ neb nins fãa sẽn be tẽngã zugã zoe yãmba. Bãmb sã n wʋm yãmb kibare, rabeem na n yõk-b lame tɩ b pelens yɩke.

26Dẽ, mam tʋma neb tɩ b yi Kedemot we-raoogẽ wã n kẽng a Sihon nengẽ Hɛsbõ ne vɩ-bãan koɛɛg n tɩ yeel-a yaa: 27«Bas-y tɩ m pɩʋʋg y tẽngã n looge. Mam na n tũu sorã bala, mam ka na n bʋdg goabg bɩ rɩtg ye. 28Tall-y rɩɩb n wa tɩ d ra n dɩ, la y wa ne koom tɩ d ra n yũ. Mam datame bal n pɩʋʋg y tẽngã n loog n ka yals ye. 29Yaa woto la a Ezayu yagensã sẽn be Seyɩɩrã, ne Moaab nebã sẽn be Aarã me maan yã. Bɩ yãmb me kõ-d sor hal tɩ d wa rʋʋg Zʋrdẽ kʋɩlgã n kẽ tẽng ning Sẽn-Ka-Saab sẽn yaa tõnd Wẽnnaamã sẽn kõ tõndã. 30La Hɛsbõ naab a Sihon ka sak n bas tõnd tɩ d tũ a tẽngã pʋgẽ n loog ye. Bala, Sẽn-Ka-Saab sẽn yaa yãmb Wẽnnaamã kenga a sũurã t'a kɩɩs n tõdge, sẽn na yɩl n kɩt tɩ yãmb zab ne-b n tõog-b wa yãmb sẽn ne rũndã wã.»

31Sẽn-Ka-Saab yeela maam yaa: «Gese, sẽn sɩng ne moasã, mam dɩkda a Sihon ne a tẽngã n kõ foom tɩ f sooge.» 32Dẽ, a Sihon yi ne a nebã zãng n na n zab ne tõnd Yakatse. 33La Sẽn-Ka-Saab sẽn yaa tõnd Wẽnnaamã kɩtame tɩ tõnd tõog yẽnda ne a kambã, la a nebã fãa gilli. 34Wakat-kãnga, tõnd deega a tẽmsã fãa n kʋ pagbã ne raopã la kambã n ka bas yẽnda ned baa a ye t'a põs ye. 35Yaa rũmsã ne teedã bal la tõnd zɛ tẽms nins tõnd sẽn deesã pʋsẽ. 36Sẽn sɩng ne Arowɛɛr sẽn be Arno ko-soogã noorã, ne tẽng ning sẽn be ko-soogẽ wã, hal n tãag Galaade, la tẽng ka zĩnd sẽn tar pãng tɩ tõnd ka tõog n deeg-a ye: Sẽn-Ka-Saab sẽn yaa tõnd Wẽnnaamã rɩka bãmb fãa n kõ tõndo. 37La yãmb ka kolg Amo nebã tẽnga, sẽn sɩng ne Yabok ko-soogã hal tɩ ta bãmb tẽms nins sẽn be tãmsã sʋkã ye. Yãmb maana wa Sẽn-Ka-Saab sẽn yaa yãmb Wẽnnaamã sẽn dag n gɩdg yãmbã.

Currently Selected:

Tõodo 2: MPBU

Highlight

Copy

Compare