2 Korẽnt‑rãmbã sebre 1
1
Pʋʋsem
1 #
Tʋʋm 18.1
Maam a Poll sẽn yaa a Zeezi Kiris tʋmtʋmd Wẽnnaam sẽn yãkã, la tõnd ba-biig a Tɩmote n tʋmd seb-kãngã Wẽnnaam nebã sẽn be Korẽntã, la Wẽnnaam nebã fãa sẽn be Akayi soolmã fãa pʋgã. 2Bɩ y reeg bark la laafɩ sẽn yit tõnd ba a Wẽnnaam la Zu-soab a Zeezi Kiris nengẽ.
A Poll pʋʋsda Wẽnd barka
3Pẽgr Wẽnnaam sẽn yaa tõnd Zu-soab a Zeezi Kiris ba wã! Ba sẽn yaa nimbãan-zoɛta la Wẽnnaam sẽn belsd nebã wakat fãa. 4Bãmb belsda tõnd d yel-pakrã fãa pʋgẽ, tɩ tõnd sẽn paamd belsg Wẽnnaam nengẽ wã, tõnd na tõog n bels neb nins sẽn be tood buud fãa pʋgẽ wã ne bels-kõngo. 5Bala, a wa Kiris namsgã sẽn paamd tõndã, woto me, tõnd paamda belsg wʋsg Kiris maasem yĩng me. 6Tõnd sã n namsdẽ, yaa tɩ yãmb na paam belsg la fãagre. Tõnd sã n paamd belsgo, yaa sẽn na yɩl la yãmb paam belsg sẽn na kõ yãmb pãng tɩ y tõog n sak namsg nins tõnd sẽn paamdã ne sũ-mare. 7La tõnd sũur keema sõama ne yãmba, bala, tõnd miime tɩ yãmb sẽn naag n sak namsgã, yãmb tara pʋɩɩr ne belsgã me.
8 #
1Kor 15.32
Sɩd me, d ba-biisi, tõnd ka rat tɩ yãmb zɩ yel-pakr nins tõnd sẽn paam Aazi soolmẽ wã ye. Tõnd namsa wʋsg tɩ looge, n yɩɩg tõnd pãnga, hal tɩ d dag n ka leb n tẽed tɩ d na n vɩɩmdame ye. 9Tõnd da tagsda d sũyã pʋs tɩ b na n kʋʋ tõndo, rẽ sẽn paam tõndã yaa sẽn na n yɩl tɩ tõnd kõn teeg d mens ye, la tɩ d na teeg Wẽnnaam ning sẽn vʋʋgd kũumã. 10Yaa Wẽnnaam‑kãng n fãag tõndo, la b na fãag tõnd ne kũum a woto buudu. N‑ye tõnd tara tẽ-kãngã tɩ b na n leb n fãaga tõnd yɛsa. 11Yãmb mens me sẽn sõng tõnd n pʋʋsd tõnd yĩngã, woto, Wẽnnaam na n leoka neb wʋsg pʋʋsg n sõng tõndo, la neb wʋsg na n pʋʋsa Wẽnnaam bark tõnd yĩnga.
Bũmb ning sẽn gɩdg a Poll so-toakã
12Bala, bũmb ning sẽn kõt tõnd sũ-noogã, yaa tõnd sũ-bãngrã sẽn kɩt kaset tɩ dũni wã neb sʋka, tõnd kẽna ne sõmblem la pʋ-peelem sẽn yit Wẽnnaam nengẽ wã yĩnga, la d kẽna yãmb sʋk a woto n yɩɩda. La ka yɩ ne ninsaal yam ye, yaa ne Wẽnnaam barkã la d maan woto. 13Tõnd sẽn gʋlsd yãmbã ka bũmb a to ye, yaa yãmb sẽn karemd n yãtẽ la y wʋmdẽ wã bala. La mam tẽedame tɩ yãmb na n bãnga zãnga, 14a wa yãmb sẽn zoe n sɩng n bãng tɩ Zu-soabã waoong daare, tõnd yaa yãmb zu-zẽkre, tɩ yãmb ya tõnd zu-zẽkre.
15La tẽ-kãngã pʋgẽ, mam da rat n deng n waa yãmb nengẽ, sẽn na n yɩlẽ tɩ yãmb tõe n paam bark naoor a yiibẽ soaba. 16#Tʋʋm 19.21M da rat n yii yãmb nengẽ n tũ Masedoan, la m yi Masedoan n lebg n wa yãmb nengẽ tɩ y sõng-m ne Zʋʋde kẽndã. 17Dẽ yĩnga, mam sẽn da tʋlg n maan bõn-kãngã, mam wilgdame tɩ m ka yas m zĩ-yend bɩ? Bɩ mam yam-yãkrã yaa ninsaal dẽnda tɩ mam tõe n yeel tɩ n-yẽe, n leb n yeel tɩ ayo? 18Sã n yaa sɩd me tɩ Wẽnnaam yaa sɩd soaba, koɛɛg ning tõnd sẽn gom ne yãmba ka yɩ n-yẽe n leb n yaa ayo ye. 19#Tʋʋm 18.5Bala, maam ne a Sɩlvẽ la a Tɩmote sẽn da moon Wẽnnaam bi-ribl a Zeezi Kiris koɛɛg yãmb sʋka ka yɩ n-yẽe la ayo ye, la a Zeezi pʋgẽ, yaa n-yẽe bal n be. 20Wẽnnaam kãabdã fãa yaa n-yẽe ning sẽn be-a Kiris pʋgẽ wã. Dẽ, yaa a Zeezi maasem yĩng la tõnd yet tɩ: Ãmina! Wẽnnaam waoogr yĩnga. 21Yaa Wẽnnaam n kɩtd tɩ tõnd ne yãmb yalsd kãenkãe Kiris tũudmã pʋgẽ, la bãmb yãka tõnd n welg tõnd toore. 22Bãmb n ning tõnd bãnd b yʋʋrã yĩnga, la b ning Sɩɩg-sõng sẽn yaa arzegs nins bãmb sẽn bĩng tõndã reng-n-lɛmbg tõnd sũyã pʋgẽ.
23Mam dɩkda Wẽnnaam tɩ yaa m kaset soaba, la m sã n yagda zĩrẽ, bɩ b reeg m sɩɩgã: Yaa sẽn na n sõng yãmb yĩng n kɩt tɩ mam ka leb n wa Korẽntã. 24Ka tɩ tõnd dat n modga yãmb y tẽebã pʋg ye, la yaa tɩ tõnd dat n naaga yãmb n tʋm tɩ y paam sũ-noogo. Bala, yãmb kɩɩ yẽg tẽebã pʋgẽ.
Currently Selected:
2 Korẽnt‑rãmbã sebre 1: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
