Loma 2
2
U Tienu buudi
1Fini, ŋan tie yua kuli, ki ja a lielo buudi, a kan baa ŋan baa tabi yaala ki gaa a yuli. Ŋan ja nitoaba buudi yeni, a cuo a yuli, kelima amoko tiendi nani bani yene. #Mat 7.1; Luk 6.37.
2Ti bani ke U Tienu buudi tie moamoani, yaaba n tiendi laa bonbuolu kuli po. 3Naani a tama ke fini yua n ja yaaba n tiendi laa bonbuolu buudi, ki nan tiendi la fini a ba yeni, ke a baa cia U Tienu bujiale? 4Bi a fali o ŋanbicianli, o yansoangima leni o juunli, ki naa faami ke U Tienu tieni a po li ŋanbili, ki bua ki gobidi a, ŋan tuo ki lebidi a yama yo? 5Ama, a juagi a pali, ki naa tuo ki lebidi. Li tie lani yaa po ke U Tienu baa doagidi o pabienli, wan baa jia bi niba buudi leni mi teginma yaa daali. Lani, a baa cuani a yuli po yaa cuonu n bia ki cie. 6Landaali, U Tienu baa pa nilo kuli nani o tuona n den tie maama. #Ps 62.13; Kpa 24.12. 7Yaaba n tiendi yaala n ŋani kaa cedi, ki lingi U Tienu kani ti kpiagidi, ti jigidi leni yaa miali n ki pia kuuma, U Tienu baa pa ba yaa miali n kan gbeni. 8Ama yaaba mo n pia mi niama yantiali ki yie kaa tuo ki ŋua i moamoani, ki ŋua yaala n ki tiegi, ki tiendi yaala n bia, U Tienu baa jia bi buudi leni li pabienli. 9Yaaba n tiendi mi biadima kuli, ki cili Jufinba, ki ŋoadi bi nilanba, baa le fala leni ti yanyagidi. 10Ama yua n tiendi yaala n ŋani, ki cili Jufinba, ki ŋoadi bi nilanba, U Tienu baa pa ba ti kpiagidi, ti jigidi leni mi yanduanma. 11U Tienu naa tiendi gagidima bi niba siiga. #Tia 10.17.
12Yaaba n tieni ti tuonbiadi kaa pia U Tienu bali maama kuli, baa bodi kaa pia li bali maama. Ama yaaba n tieni ti tuonbiadi, ki nan pia li bali maama kuli, U Tienu baa jia leni ba ti buudi nani o bali maama n bili maama. 13Laa tie yaaba n cengi li bali maama ka tiegi U Tienu nintuali, ama yaaba n tiendi li bali maama n bili yaala, bani n tie bi niteginkaaba. 14Moamoani po, yaaba n tie nilanba kaa pia li bali maama yaa tiendi li bali maama n bili yaala kelima bi yama po, bi bili li bali maama bi yula po, ba ke baa pia li bali maama. 15Bi doagidi ke li bali maama n bili yaala diani bi pala nni, bi pala siedi moko yen bu leni ba, bi ki yen saagi bi po i moamoani. 16Lani n baa doagidi, U Tienu n baa teni Jesu Kilisiti n jia bi nisaaliba n wuoni yaala kuli buudi yaa daali. Min wangi yaa Laabaaliŋamo moko yedi ke li baa yaa tie yeni.
Li bali maama n yedi yaala Jufinba po
17Ama fini yua n yedi ke a tie Jufi, a jigi co U Tienu bali maama nni, ki kpiagidi a yuli, kelima ŋan pia yaa ŋantaado leni U Tienu. 18Yeni de! A bani o yanbuama, ki go bani ki gandi yaala n ŋani ki cie, kelima bi den bangi a li bali maama. 19A nua a yuli ke a tie gobidika a juama po leni mi yenma, yaaba n ye li biigili nni po. 20A go nua a yuli ke a tie tundika bi yanpiidanba leni bangika a biwaala po. A nua ke a pia li bali maama nni, yaala n wangi mi bandima leni i moamoani kuli.
21Lanwani, fini yua n bangi nitoaba,
Ŋaa bangi a yuli.
Fini yua n wangi nitoaba ke ban da su,
Amoko nan su.
22Fini yua n tua nitoaba n da conbi,
Amoko nan conbi.
Fini yua n sengi i buli,
A su yaala n ye a budiena nni.
23Fini yua n kpiagi a yuli ke a pia li bali maama,
A teni ke bi niba sugidi U Tienu
Kelima a miidi li bali maama.
24Nani lan diani maama: «Yinba yaa po n teni ke bi nilanba sugidi U Tienu yeli.» #Esa 52.5.
25Yaala n tie ku koanciagu po, moamoani ku pia mayuli, a yaa tiendi li bali maama n bili yaala. Ama a yaa miidi li bali maama, a tua nani o jifolo yeni, ba ke a tie jungili. 26Yua n tie jifolo yaa tiendi li bali maama n bili yaala, li kan yaa tie nani o kua ku koanciagu yeni ka? 27Yua n tie jifolo buolu yaa tiendi li bali maama n bili yaala, o baa bu ki cuo ŋa, fini yua n pia li bali maama leni ku koanciagu, ki nan miidi li bali maama. 28Jufi naa tie yua n pia li nannanli ka, li jungili moko naa tie yua n pia li maalima o gbanandi nni ka. 29Yua n tie Jufi moamoani, tie yua n tie yeni hali o pali tugu nne. Ku koanciagu moko ŋua U Tienu Fuoma n tieni yaala o nilo pali nni, ke laa ŋua li bali maama. Yua n tie Jufi moamoani naa baadi ti pagidi bi niba kani ka, ama U Tienu kani. #Tia 30.6.
Currently Selected:
Loma 2: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
