Loma 1
1
I fuondi leni li tili mayuli
1.1-17
I fuondi
1Mini Poli yua n tie Jesu Kilisiti naacemo, U Tienu n den yini ki gandi yua ke n tua o tondo ki baa yaa wangi o Laabaaliŋamo, n diani li tili yinba yaaba n ye Loma po.
2Hali yogu, U Tienu den niani u ñoanianu o Laabaaliŋamo po, ki teni ke o saawalipuaba diani o i Diani yi n gagidi ki ŋani nni. 3O Laabaaliŋamo yeni maadi o Bijua maama fuule. A yaa diidi ban mali o yaa buolu nni, o tie Davidi puoliŋuanu. 4Ama li doagidi leni U Tienu Fuoma Yua paalu po, ke o tie U Tienu Bijua, kelima o fiima bi tinkpiba siiga yaa po. Wani n tie ti Diedo Jesu Kilisiti. 5O yaa po yo, ke ti den baa li ŋanbili ki tua o tondiba, ke tin yaa gobidi i nibuoli kuli, ban daani o ki tuo o maama. 6Yimoko tie laa niba siiga yaaba, yinba Jesu Kilisiti Nitaanli yeni.
7N diani yi po, yinba yaaba n ye Loma #1.7 Loma: Loma tie yaa diema n yi Itali docianmoanu. Poli yogunu u den tie ŋanduna kuli docianmoanu ke u yaa toagola mo den die ŋanduna. ki tie U Tienu buakaaba kuli, wan yini yinba yaaba ke yi gagidi o po. Ti Baa U Tienu leni o Diedo Jesu Kilisiti n pa yi li ŋanbili leni mi yanduanma.
Poli sugini ki gedi ki le Loma yaaba
8N kpa tuondi n Tienu yikuli po, Jesu Kilisiti yeli nni, kelima bi maadi yi dandanli maama ŋanduna nni kuli. 9U Tienu, min ŋua yua leni payenli, ki wangi o Bijua Laabaaliŋamo, tie n siedo, ke n tiadi ki taagi yikuli yela yogunu kuli 10n jaandi nni, ki naa cedi. N miadi o ke li yaa tie o yanbuama, min fidi ki baa u sanu, ki cua yi kani. 11N bua hali bonŋanla ki le yi, ki boagidi leni yi U Tienu Fuoma Yua n puni yaa paabu, ke yin yaa se ki pa, 12bi mo, n yaa cua yi kani, tikuli n baa li papaali, kelima mini leni yinba n taani ki pia yaa dandanli po.
13N kpiiba, n bua yin bandi ke n den lindi ki jagi ke n baa cua yi kani, ki baa bonluonkaaliba yi siiga, nani min de baa nibuotoe siiga maama. Ama hali moala, bonliba yen pigini n sanu ke mii fidi ki cua. #JTT 19.21. 14Li tie n po tiladi ke min gedi bi nunfandanba#1.14 Poli yogunu bi den nua yaaba n maadi Gireki maama kuli (baa bi yaa tie Girekinba) ke bi tie yaaba n pia mi fandima, ki nua yaaba n ki maadi Gireki maama ke bi tie fuaniba, yaaba n ki pia fandima. leni bi yanboandanba po, yaaba n bani u cogu leni yaaba n ki bani kuli po. 15Lani yaa po, n bua hali boncianla ki yaa wangi yinba yaaba n ye Loma moko o Laabaaliŋamo.
O Laabaaliŋamo paalu
16Mii jie i fe o Laabaaliŋamo wangima po. Li tie U Tienu paalu yaaba n daani kuli yaa tindima po, ki cili Jufinba, ki ŋoadi bi nilanba. #Mrk 8.38. 17O Laabaaliŋamo yeni doagidi U Tienu n saa bi nisaaliba po i moamoani ke bi tiegi maama, kelima li dandanli po leni li dandanli bebe yaa po, nani lan diani maama: «O niteginka baa yaa ye, kelima o dandanli yaa po.» #Hab 2.4.
U Tienu n jagi yaala o nisaalo tindima po
1.18—4.25
Bi nisaaliba n pia yaa tagili U Tienu kani
18U Tienu pabienli doagidi tanpoli po, ki baa cuo yaaba n yie o, ki tiendi yaala n ki tiegi kuli, bani yaaba n moandi ki ñii i moamoani leni bi biadima. 19O nilo n baa fidi ki bandi yaala wani U Tienu po doagidi. U Tienu doagidi bi po la. 20U Tienu paalu yuu n ki pia gbenma leni wan tie maama, naa tie bi nisaaliba n baa fidi ki le yaala. Ama hali ŋanduna tagima yogunu, laa bonla kuli doagidi wan tagi yaala yaa niinni. Lani n teni ke baa pia ban baa fidi ki tabi yaala, ki gaa bi yula. 21Ba ke bi bani wani U Tienu, baa kpiagidi o ki go tuondi o nani lan pundi maama, ama bi yaadi bi yanluoma nni. Bi yanpiima teni ke bi kua li biigili nni. #Efe 4.17-18. 22Ba ke bi kpiagidi bi yula ke bi tie yanfuodanba, bi tua yanluodanba. 23Bi lebidi U Tienu yua n kan kpe yaa kpiagidi, ki kpiagidi a nannana, ya n naani leni o nisaalo yua n baa kpe, ti bonyugiditi, ti yandi leni li bonbalinkaala. #Tia 4.16-18.
24Li tie lani yaa po yo ke U Tienu mo ŋaa ba bi tuonjoagima nni, nani bi pala n bua ban yaa tiendi maama. Lani, bi jigidi bi yula hali ki tiendi yaala n pia i fe bi gbanandi po. 25Bi lebidi ki ŋaa U Tienu moamoani, ki ŋua mi faama. Bi kpiagidi U Tienu n den tagi yaala, ki ŋaa wani o Tagido oba, yua n pundi ki yaa baadi ti pagidi hali yaa yogunu kuli. Amina!
26Li tie lani yaa po ke U Tienu mo ŋaa ba, ke bi gbanandi fiima, yaama n tie ti cagindi ki jigidi ba, n paadi ba. Ba bi puoba ŋaa U Tienu n bili bi po yaala, ki cagini bi yula. 27Bi jaba moko ŋaa U Tienu n bili ke ban yaa taagi leni bi puoba maama. Bi gbanandi fiima co nani u mu yeni jatoaba po, ki teni ke bi cagini leni jatoaba. Lanwani, bi baadi bani bi ba yaa panpaani n dagidi bi yaadima yeni po.
28Nani bi nisaaliba n den sua ke laa pundi ban bandi U Tienu yeni, U Tienu mo ŋaa ba ke bi yantiabiada paadi ba, ke ban yaa tiendi yaala n ki pundi. 29Yaala n kaa tiegi kuli gbie bi pala nni, yaala n bia, mi ŋaliŋabuama leni mi biadima. Bi pala go gbie leni li nunponli, mi kukpama, li koanli, mi niama buoli kuli, bu nunfanbiadibu leni ku tugutongu. 30Bi go tie ñoakpalidanba, ki maadi bi lieba po yaala n bia. Bi tie U Tienu yibalinba, yusiedanba, japaadanba leni yaaba n pagi bi yula. Bi cili yaa biadima n ki den kpa ye, ki go tie danyiekaaba mo. 31Baa pia yanfuoma, baa kuandi ban niani yaa ñoaniani, baa pia nitoaba po padingili leni ninñingbadima. 32Ba ke bi bani U Tienu mabilikaama yaama n tiegi ki yedi ke li pundi ke yaaba n tieni laa bonbiadila n kpe, bi tiendi la bani bi ba, ki go saagi yaaba n tiendi yeni po i moamoani.
Currently Selected:
Loma 1: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
