Loma 3

1Lanwani, Jufinba pia be ke li teni ke bi cie yaa nibuoli n sieni? Bi koanciagu mo pia be yaa fuome? 2Lani kuli pia mayuli boncianla li bonla kuli po. Li bonkpiala tie ke U Tienu den piani bane o maama. 3Ba bi siiga bi tianba yàá den tie nidugikaaba, naani li baa teni ke U Tienu kan yaa tie dugika, ki kan tieni wan den niani yaala? 4Lani ki ye. Tiladi, U Tienu tie moamoandaano, ba nilo kuli yaa tie tuofaadaano, nani i Diani n yedi maama:

«Li tie tiladi ban bandi

Ke a tiegi a maama nni,

A yaa buni leni bi niba mo,

A baa paadi.» #Ps 51.6.

5Lani yaa po, li yaa tie ke tin tieni yaa biadima teni ke U Tienu teginma doagidi, ti baa yedi be? Naani U Tienu ki tiegi, o pali yaa beni kelima ti biadima yeni po? Min maadi yeni, n maadi nani bi nisaaliba n nua maama. 6Yeni ka! Li yàá tie yeni, U Tienu baa gaa lede ki jia ŋanduna buudi?

7Li yaa tie ke mini yaa faama n teni ke U Tienu moamoani doagidi, ki tie o kpiagidi po, be yaa po ke o baa bu ki cuo nni nani n tie ti tuonbiadi daano yeni? 8Lanwani, be yaa po ke ti kan yaa tiendi yaala n bia, kelima li baa teni yaala n ŋani n yuandi ki cua, nani tianba n tua ke ti yieni maama? U Tienu baa cuo ba li po nani lan pundi maama.

Niloba kuli ki tiegi U Tienu nintuali

9Lanwani, ti baa yedi lede? Naani tinba Jufinba tie nimoanba ki cie nibuotoe? Kalam! Ti maadi ki doagidi ke bi niba kuli, Jufinba leni bi nilanba kuli tie ti tuonbiadi n die yaaba, 10nani lan diani maama:

«Oba kuli ki tiegi, ba niyendo.#Ps 14.1-3; 53.2-4.

11Yanfuodaano naa ye,

Niloba mo ki lingi U Tienu.

Bikuli yaadi ki biidi bi yula.

12Yua n tiendi yaala n ŋani naa ye,

Ba niyendo.

13Bi niabonma kuli tie nani yaa takuli n ya yeni,

Bi landi mo gbie leni i boandi.

Yaa maama n ña bi ñoacuuna nni bia,

Nani o duduuno loabidi yeni.#Ps 5.10; 140.4.

14Bi ñoana gbie leni ti solindi leni ki nanga.#Ps 10.7.

15Bi taana jaligi mi soama wulima po. #Esa 59.7-8.

16Ban tagini naankani kuli,

Bi ŋaa diegbendi leni falabiado.

17Baa bani mi yanduanma sanu.

18Baa diidi U Tienu leni li fangili.» #Ps 36.2.

19To, ti bani ke U Tienu bali maama n bili yaala kuli tie li bali maama n die yaaba po, ki baa teni nilo kuli ñoabu n mubini, bi niba kuli n tuo ke bi pia i tagili U Tienu nintuali. 20Niloba kuli kan baa li moamoansaali U Tienu kani kelima o tiendi li bali maama n yedi yaala. Li bali maama n teni ke o nilo bandi ti tuonbiadi. #Ps 143.2; Gal 2.16.

U Tienu n tindi bi nisaaliba maama

21Moala po, U Tienu n saa i moamoani maama ke bi nisaaliba tiegi doagidi, ke li naa ŋoadi li bali maama kubima. Li bali maama leni bi saawalipuaba kuli tieni lipo siedi. 22U Tienu saagi i moamoani bi niba po ke bi tiegi kelima li dandanli Jesu Kilisiti nni yaa po, bani yaaba n tuo ki daani kuli yaa po. Mi gagidima ki ye bi niba siiga, #Gal 2.16. 23kelima bikuli tieni ti tuonbiadi ki poadi U Tienu kpiagidi. 24Ama kelima U Tienu ŋanbili paabu yaa po, bi baa li moamoansaali kelima Jesu Kilisiti daafaabima yaa po. 25U Tienu den tuodi ki bili ke wani Jesu baa tua i candanbaani padili yaaba n pia li dandanli o soama po kuli yaa po. U Tienu tieni yeni ke wan fidi ki doagidi o teginma, kelima o den juuni leni bi niba n den tieni yaa tuonbiadi u yogunkpelu kaa cuo ba ti po. 26O den bua ki doagidi o teginma moala po, ke bi niba n bandi ke o tiegi ki go tie yua n puuni li moamoansaali yua n daani Jesu kuli.

27Lanwani, o nisaalo baa kpiagi o yuli kelima be yaa po? Waa go pia li sanu. Mi laa bali maama po? A tuona po bi? Aa-a, ama li dandanli yaa po. 28Ti sua ke o nilo baa baa li moamoansaali kelima li dandanli yaa po, ke laa tie li bali maama kubima yaa po. 29U Tienu tie U Tienu Jufinba bebe po bi? Naani waa tie U Tienu bi nilanba moko yaa po? O tie U Tienu bi nilanba moko po saa. 30Tienyendu bebe n ye, yua n baa saa i moamoani yaaba n kua ku koanciagu po kelima bi dandanli po, ki go saa yaaba n tie jifola po moamoani kelima bimoko yaa dandanli yaa po. #Tia 6.4; Gal 3.20. 31Naani tin wangi li dandanli maama yeni, li bua ki yedi ke ti teni ke U Tienu bali maama ki go pia mayuli bi? Kalam! Ti doagidi li bali maama n pia yaa mayuli moamoani.

Currently Selected:

Loma 3: BGP

Highlight

Compare

Copy