Mi Doagidima 19

1Li yaa puoli, n den gbadi ke ku fuugu tieni tanpoli nani yaa niligu n yabi yaa fuugu, ke bi tua: «Aleluya!#19.1 Aleluya: Lani n tie: “Pagi mani o Diedo!”

Ti Tienu n die mi tindima,

Ti kpiagidi leni u paalu,

2Kelima o buudi tiegi

Ki go tie moamoani.

O den jia li puoconconcianli buudi ki cuo o,

Wani, yua n den joagini

Ki tinga leni o conconma.

O den tuu o naacenba soawulima panpaani,

Ki buali o bi soama po.» #Tia 32.43; 2Bad 9.7.

3Bi go den kpaani ki yedi:

«Aleluya!

Ban juu u dociamu yaa muñii,

Baa yaa do hali yaa yogunu kuli.» #Esa 34.10.

4Bi piiliedi n nikpenaadiba leni a bonfuodinaada den gbaani ki kpiagi U Tienu yua n kaa li bali kalikaanu, ki yedi:

«Amina! Aleluya!»

Ki Pebiga puocaajiema

5U nialu den maadi li bali kalikaanu kani ki yedi:

«Pagi mani ti Tienu,

Yinba o naacenba yaaba n fangi o,

Taliginba leni bi paatieba kuli.» #Ps 115.13.

6Lani n den gbadi ku fuugu ke ku tie nani yaa niligu n yabi yaa fuugu, ki go tie nani mi ñincianma yaa fuugu leni i tatantanciami yaa fuugu yeni, ke ku tua:

«Aleluya!

Li Miali Diedo U Tienu,

U Paaciamu Kuli Daano cili o diema. #Esk 1.24; Ps 93.1; 97.1; 99.1.

7Tin mangi ti pala ki yaa pia li pamancianli,

Ki kpiagi o, kelima ki Pebiga puotaali yogunu pundi,

O puocaano bogini ki bobi.

8Bi puni o wan bobi len yaa tiadi,

Ke ti pieni ki ñuliti ki ŋani cain.»

Len yaa tiadi yeni bundima tie bi nigagidiŋanba teginma.

9Lani, maleki yeni den yedi nni: «Diani yaa maama n tie ne: li pamanli ye leni ban yini yaaba ki Pebiga puocaajiema po.» O go den yedi nni: «Mi naa maama tie U Tienu n maadi yaa moamoani.» #Mat 22.2-3. 10N den gbaani o taana kani ki baa kpiagi o, ama o den yedi nni: «Da tieni yeni. N tie fini leni a kpiiba, yaaba n kubi Jesu yaa siedi kuli yaa tuonsoanlielo. Kpiagi U Tienu, kelima Jesu yaa siedi n teni ke bi soani mi naa maama.»#19.10 Yaa ka, a kpiiba yaaba n kubi Jesu n den tieni o yuli po yaa siedi. Jesu n den tieni yaa siedi o yuli po, bi i moamoani po taa yenma leni bi saawalipuaba n den pua saawali yaa moamoani po.

Yua n jagi o tanpieno

11Lani n den laa ke tanpoli luodi ki yaa, ke o tanpieno se. Yua n jagi o, yi o Dugika leni o Moamoandaano. O bujiali tiegi, o togidi bu toabu mo leni mi teginma. #Esk 1.1; Ps 96.13; Esa 11.4. 12O nuni tie nani mi fantanlanma yeni, o ciibi mu badifogilimu boncianla. O yeli diani ki taabi o, oba kuli n ki bani yaa yeli, kali wani o ba. #Dan 10.6. 13O yie mi soama n yadi yadi yaa tiayiekaagu po. O yeli tie U Tienu Maama. 14Tanpoli toagola den ŋua o ki jagi i tanpieni, ki la yaa len tiadi n pieni ki ŋani cain. 15Yaa jugisiega n mani, den ña o ñoabu nni, wan baa pua i nibuoli leni yaaga. O muubi ti kudi badigbiamu ki baa gobidi ki yaa kpaa ba. O baa ŋmaa duven ŋanbikaanu nni, yuu n tie U Tienu U Paaciamu Kuli Daano pabiencianli nni. #Ps 2.9; Esa 63.3; Jl 4.13; Doa 14.20. 16O yeli yaali n tie ne, diani ki taabi o kpalibu leni o panli kuli po:

“Bi badiba Bado

Leni bi diediba Diedo.”

17N go den laa maleki ke o se u yienu nni ki kpaani ki yedi yaa bonyugiditi n yugi tanpoli kuli: «Yin taani ki cua mani U Tienu jecianma po, #Esk 39.17-20. 18ki je bi badiba gbanandi, bi toatieba yudanba gbanandi, bi paatieba gbanandi, i taami leni bi tandanba gbanandi, bi niba kuli gbanandi, i yonbi leni yaaba n die bi yula, taliginba leni bi paatieba kuli yaadi.»

19N go den laa ki fuayanga, ŋanduna badiba leni bi toagola, ke bikuli taani ki baa tuogi bu toabu leni yua n jagi o tanpieno leni o toagola yeni. 20O den cuo ki fuayanga, wani leni o saawalipua-faadaano, yua n den tiendi mi bancianma o nintuali, ki boandi yaaba n gaa ki fuayanga maalima, ki go gbaani ki kpiagi o nannanli. O den luni bani bonbilie kuli ku fantanbuogu nni ke bi fo, li cidibili n co naani. #Doa 13.1-18. 21Wani, yua n jagi o taamo yeni, den kpa bi toagola ya n sieni leni yaa jugisiega n ñani o ñoabu nni, ke ti bonyugiditi kuli dini bi gbanandi ki guo.

Currently Selected:

Mi Doagidima 19: BGP

Highlight

Copy

Compare