Mi Ñama 12
12
Mi Pendima Jaanma
1O Diedo den yedi Musa leni Alono Ejipiti diema nni:#Lev 23.5; Coa 9.1-5; 28.16; Tia 16.1-2. 2«O naa ŋmaalo baa yaa tie yi po o ŋmakpialo. O baa yaa tie yi po li binli ŋmakpialo. 3Yin maadi leni Isidayeli nitaana kuli, ki yedi ba: O naa ŋmaalo dapiiga, diedaano kuli baa taa pebiga, wani leni o niba po. Diegu kuli baa yaa pia ku yaa pebiga. 4Li yaa tie ke ku diegu nni yaaba wa ki kan fidi ki gbeni pebimunga, ban taani leni bi yieninlieba yaaba n kuu ba, nani bi niba n da maama ki pebiga po, ki coadi yuakuli n baa fidi ki je yaa banlu. 5Li baa yaa tie yaa pebiga n ki pia poadi kuli, ki tie bontonga, ki go pia binyenli. Yi baa fidi ki taa pebiga bi ŋuabiga. 6Yi baa kubi ka hali o naa ŋmaalo yaa piiga n danaali. Isidayeli nitaana kuli baa kodi ka landaali yaa yenjuagu. 7Bi baa taa ki soama ki tieni ban ŋmani ka yaa dieli nni, li buliñoatuogili leni ti buliñoa-kpiandaadi po. 8Laa ñiagu, bi baa puli ti nandi ki go ŋmani ti. Bi baa ŋmani ti leni yaa dupen n ki pia dabinli leni yaa muadi n to. 9Yin da ŋmani ti, ke tii beni, yin da ŋaani ti mi ñima nni mo, ama yi baa puli ti ki taani li yuli, a biana leni ti nuadi kuli. 10Yi kan sieni liba kuli saala po. Ba li yaa sieni ku tiŋaagu, yin juu ti u mu nni. 11Yin baa ŋmani ti maama nne: yin kpa ñagini yi ciamu ti gbanñagiditi, ki pili yi cacaadi, ki mubini yi gbiami yi nii nni. Yi baa ŋmani ti tontoni. Li tie o Diedo yaa Pendima jaanma.
12Laa ñiagu, n baa ña ki gaani Ejipiti diema nni kuli. N baa pua Ejipiti diema bonjakpiala kuli, ki cili leni bi niba, ki ban taani leni ti yandi kuli. N baa jia ti buudi leni Ejipiti yaaba tieni kuli. Mini n tie Li Miali Diedo. 13Mi soama baa yaa tie mi maalima yin ye yaa diedi nni. N baa le mi soama ki pendi ki ŋaa yi. Lani, o falabiado kan baa yi min baa pua Ejipiti diema yaa yogunu. 14Yi baa kubi landaali tiadima. Yi baa yaa tiendi u badu ki jigindi o Diedo, kelima laa tiadima po. Yi baa yaa tiendi laa badu, wun tua yi po yaa bogidili n baa yaa ye, nifiima n tuu nifiima.#Ñam 23.15; 34.18; Lev 23.6-8; Coa 28.17-25; Tia 16.3-8.
Yaa dupen n ki pia dabinli jaanma
15Hali danalele, yi baa yaa di yaa dupen n ki pia dabinli. Hali laa dana cilima daali, dabinli kan yaa ye yi diena nni, kelima yaa nilo n dini yaa dupen n pia dabinli a daleleeda yeni siiga, bi baa ñani o Isidayeli buolu nni. 16Li dakpiali, yi baa tieni taangagidikaali, li daleleeli mo, yi go baa tieni taangagidikaali. Oba kuli kan soani tuonliba laa dana yaa niinni, ama yi baa fidi ki yaa tiendi yuakuli po o jiema wani.
17Yi baa kubi yaa dupen n ki pia dabinli jaanma yeni, kelima li tie laa daale ke n baa teni yi toacaga n ña Ejipiti diema nni. Yi baa kubi landaali lan tua yaa bogidili n baa yaa ye, nifiima n tuu nifiima. 18O ŋmakpialo yaa piiga n danaali yenjuagu, yi baa cili ki je yaa dupen n ki pia dabinli, ki yaa caa hali o piilie n danyenli juagu. 19Danalele yeni, yin da pia dabinli yi diena nni ba waamu. Yaa nilo n dini yaa dupen n pia dabinli kuli, bi baa ñani o Isidayeli nitaana siiga, wan tie caano bi dotielo. 20Yin baa yaa ye naani kuli, yi kan je yaa dupen n pia dabinli, ama yi baa yaa di yaa dupen n ki pia dabinli.»
Mi Pendima jaanma jiema ŋanbima
21Musa den yini Isidayeli yaaba nikpela kuli ki yedi ba: «Gedi mani ki ban taa ti yandi yi diedi po, ki padi mi Pendima jaanma padili. 22Yi baa taa isope faadi ki pagini yaa soama n ye ku tadigu nni, ki faani li buliñoatuogili buliñoa-kpiandaadi leni a buliñoagundilieda. Yin faani ti leni yaa soama n ye ku tadigu nni. Yi siiga oba kuli n da ña o dieli nni, ki cili lanyogunu, hali ki pundi ku tiŋaagu. 23O Diedo yaa fii ki baa pua Ejipiti yaaba, ki laa mi soama li buliñoatuogili leni ti buliñoa-kpiandaadi po, o baa pendi ki ŋaa laa buliñoabu yi po. O kan tuo ke o bolindo n kua yi diedi nni, ki pua yi.#Heb 11.28. 24Yi baa kubi laa bonla lan tua yi po bogidili, yinba leni yi bila po, hali yaa yogunu kuli. 25Yi yaa ban kua o Diedo n baa pa yi yaa diema nni, nani wan den niani yi maama, yi baa yaa kubi li naa bogidili. 26Yi bila yaa buali yi, li naa bogidili bundi yi po be? 27Yi baa guani ki yedi ba: ‹Li tie mi Pendima jaanma padili, yaali n kpiagidi o Diedo, yua n den pendi ki ŋaani Isidayeli yaaba diedi, wan den pua Ejipiti yaa yogunu, ki faabi Isidayeli yaaba diedi.› » Isidayeli yaaba den gbaani ki pugi o Diedo. 28Isidayeli yaaba den gedi ki ban tieni o Diedo n den waani Musa leni Alono yaala.
O falajuodika: Ejipiti bonjakpiala kuuma
29Ku yoagisiigu, o Diedo den pua Ejipiti diema nni a bonjakpiala kuli. Li den cili leni Faraon yua n kaa ti gbandi po yaa bijakpelo, ki ban taani leni o yonbo yua n ye li kpaadidieli nni, hali ki pundi ti yandi bontonkpiamu kuli.#Ñam 4.22-31. 30Faraon den fii ku ñiagu, wani, o naacenba leni Ejipiti yaaba kuli. A bubula den yabi Ejipiti diema nni hali boncianla, kelima li naa den pia ba dieyengu, yaagu n ki den pia kuuma. 31Laa ñiagu, Faraon den yini Musa leni Alono ki yedi ba: «Fii mani ki ña n niba siiga, yinba leni Isidayeli yaaba kuli. Gedi mani ki ban kpiagi o Diedo, nani yin den yedi maama. 32Taa mani yi pe leni yi ne, nani yin den yedi maama, ki gedi. Ama yin gaali nni.» 33Ejipiti yaaba den tigini Isidayeli yaaba, ki jaligi ki bua ki ñani ba mi diema nni, kelima bi den yedi: «Tikuli baa bodi.»
34Isidayeli yaaba den taa bi dupenyonkaadi ki tugi ke ti daa pili. Bi den gbabini bi dupentiadi bi tiadi nni, ki bugi. 35Isidayeli yaaba den tieni Musa n den yedi yaala. Bi den mia Ejipiti yaaba, ŋanjilifa leni wula tiadi leni ti tiayiekaadi. 36O Diedo den teni ke Ejipiti yaaba pala mangi Isidayeli yaaba po, ke bi puni ba ban mia ba yaala kuli. Yene ke bi den fagi Ejipiti yaaba.#Ñam 3.21-22. 37Isidayeli yaaba, yaaba n den fii Ramisesi ki gedi Sukoti, den bua ki pundi jaba tuda kobiluoba, yaaba n pundi ki gedi toabu. Baa den coadi a bila, bi puoba leni a jakpela wani. 38Bi niba boncianla yaaba n tie nibuotoe den taani ki fii leni ba. Bi den pia a yangola boncianla, i pe leni i ne. 39Bi den taa ban den ñani yaa dupenyonkaadi Ejipiti nni, ki pua ti lalaadi ke tii pia dabinli, kelima Ejipiti diema nni, bi den deli ki ñani ba, ke baa baa yaa yogunu n baa guudi ti dupenyonkaadi n pili, ki buali ban kubi mi jiema li sancenli po.
40Isidayeli yaaba n den tieni yaa bina Ejipiti nni den pundi kobinaa n bina piitaa.#Cil 15.13; Gal 3.17.
41Kobinaa n bina piitaa n den tuoni yaa daali, o Diedo toagola kuli den ñani Ejipiti diema nni. 42Laa ñiagu, o Diedo den dua ki guu o niba. O den dua ki nua o bila ñama Ejipiti diema nni po. Lani n teni ke binli kuli, nifiima n tuu nifiima, Isidayeli yaaba kan guani landaali ñiagu, kelima li gagidi o Diedo po.
Ban baa jaani mi Pendima jaanma maama
43O Diedo den yedi Musa leni Alono: «Line n tie li ñoamabonli, mi Pendima jaanma po. Nilamoba kuli kan je ma. 44A yaa daa yaa yonbo leni a ligi ki kuani o ku koanciagu, wani n baa fidi ki je ma. 45O caano leni o tuonsoanlo kan je laa jiema. 46Yi kan je ma niini, se li dieli nni. Yi kan taa ti nandi yeni ki ñani ti li dieli nni. Yin da mudi ba kpabiyenli mo.#Coa 9.12; Jan 19.36. 47Isidayeli yaaba nitaana kuli baa kubi mi Pendima jaanma. 48Li yaa tie ke o nilamo, yua n kaa yi siiga bua ki kubi o Diedo Pendima jaanma, se o diegu nni bonjaga kuli n kua ku koanciagu. Lanwani, o baa fidi ki nagini ki jaani, o baa yaa tie nani yi buolu yua yeni. Ama jifoloba kuli kan je ma. 49Laa bali maama baa yaa tie yenma o dotielo po leni o caano yua n kaa yi siiga kuli po.» 50Isidayeli yaaba kuli den tieni o Diedo n den waani Musa leni Alono yaala, ki naa ŋaa liba kuli. 51Landaali lige kap, ke o Diedo den teni ke Isidayeli yaaba kuli ñani Ejipiti diema nni, ki cuoni caga caga nani bi toagola n tie maama.
Currently Selected:
Mi Ñama 12: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
