Mi Ñama 13

Yaa bali maama n tuugi leni mi Pendima jaanma

1O Diedo den maadi leni Musa, ki yedi o: 2«Gagidi n po bonjakpeliga kuli Isidayeli yaaba leni ti yandi kuli siiga, kelima mini n die ba.»#Coa 3.13; Luk 2.23.

3Musa den yedi bi niba: «Yaa tiadi mani li naa daali po, yaa daali ke yi ñani yi ti yonbidi kaanu, Ejipiti diema nni. Li tie leni o nuu paalu yo, ke o Diedo ñani yi mi diema nni. Oba kuli n da ŋmani yaa dupen n pia dabinli landaali. 4Yi ñani dinla ti kpaandi n be yaa ŋmaalo.#13.4 Laa ŋmaalo n den tie Isidayeli yaaba binli ŋmakpialo, yua n yen cili citaa boagidima ki ban juodi cinaa yaa boagidima. 5O Diedo yaa teni ke yi kua Kanana, Hititi, Amoriti, Hiviti leni Jebusi yaaba diema nni, wan den poli yi baanba po ke o baa pa yi yaa diema, mi naaŋanma leni ti siadi n dua naani, yin kubi mi naa jaanma binli kuli, o naa ŋmaalo yaa niinni. 6Hali damunalele, yi baa yaa di yaa dupen n ki pia dabinli, li daleleeli baa yaa tie jaanma o Diedo yeli kpiagima po. 7Yi baa yaa di yaa dupen n ki pia dabinli laa daleleeda kuli. Yin da pia yi diedi nni yaa dupen n pia dabinli ba waamu. Ban da le dabinli yi diema nni kuli mo.

8Landaali, a baa yedi a bijua: ‹Li tie o Diedo n den tieni n po yaala, min den ñani Ejipiti diema nni yaa yogunu, yaa tiadime.› 9Li baa tua a po maalima a nuu po, ki tua a yutunli po tiadima. Yeni o Diedo bali maama baa ye a ñoabu nni, kelima leni o nuu paalu yo, ke o den teni ke a ñani Ejipiti nni. 10Binli kuli, u yogunu yaa pundi, a baa kuani laa bali maama.

11O Diedo yaa teni ke a kua Kanana yaaba diema nni yaa yogunu, nani wan den poli fini leni a baanba po maama, ke o go puni a ma, 12a baa gagidi ki cuani bonjakpiaga kuli o Diedo po. Ŋan pia yaa yandi yantonkpiamu mo kuli, o Diedo n die.#Ñam 34.19-20; Luk 2.23. 13A baa taa ki pebiga, ki daa ki faabi o ŋunbo yaa bontonkpiaga. A yàá daa ki faabi o, a baa mudi o bunkpanli. A baa daa ki faabi bi niba bonjakpiala kuli a bijaba siiga. 14A bijua yaa buali a yaa daali: ‹Line bundi be?› A baa guani ki yedi o: ‹O Diedo den teni ke ti ñani ti yonbidi kaanu, Ejipiti diema nni leni o nuu yaa paalu. 15Faraon n den yie ke o kan tuo tin gedi, o Diedo den teni ke Ejipiti diema nni bonjakpiala kuli kpe, ki cili bi niba bonjakpiala, ki ban taani leni ti yandi bontonkpiamu. Li tie lani yaa po yo, ke n padi o Diedo po, ti yandi bontonkpiamu, ki nan daa ki faabi n bijaba bonjakpiala kuli.› 16Li baa yaa tie nani mi maalima a nuu po, ki go yaa naani leni mi tiadima tila a yutunli po. Li tie o nuu yuu n pia u paalu po yo, ke o Diedo den teni ke ti ñani Ejipiti diema nni.»

U Tienu gobidi o niba bi cenli nni

17Faraon n den cedi ke ku niligu ñani, U Tienu naa den teni ke bi tagini Filisiti yaaba diema nni, ba ke lankani n den kuu ki cie. U Tienu den yedi: «Bi niba baa fidi ki le bu toabu ki jie ki sani ki guani Ejipiti diema nni.» 18Ama U Tienu den teni ke ku niligu lagidi ki tagi mi fanpienma po yaa sanu, ki gaa mi Ñincianmoanma po. Isidayeli yaaba den ñani Ejipiti diema nni, ki bogini bu toabu po. 19Musa den taa Josefi kpaba, kelima Josefi den teni ke Isidayeli bijaba poli. O den yedi ba: «U Tienu yaa ti goandi yi yaa yogunu, yin ñani n kpaba nekanba.»#Cil 50.25; Jos 24.32.

20Bi den fii Sukoti ki jiidi Etami, naani n ye mi fanpienma juodima. 21O Diedo wani o ba n den ye bi liiga. O yen ye ku tawaligu nni u yensiinu, ki gobidi ba bi sanu nni. Ku ñiagu, o yen ye u mu tawaligu nni, ki yendi bi po ke ban yaa cuoni u yensiinu leni ku ñiagu kuli. 22Yensiinu kuli, ku tawaligu yen yiini bi po, ñiagu mo kuli, u mu tawaligu yen yendi bi po.

Currently Selected:

Mi Ñama 13: BGP

Highlight

Copy

Compare