1 Korenti 15
15
Kilisiti fiima bi tinkpiba siiga
1N kpiiba, n bua ki go tiadi yi min den kpa waani yi yaa Laabaaliŋamo, yin den gaa yua, ki se lienni bonŋanla. 2Yi tindi kelima o Laabaaliŋamo yeni po, li yaa tie ke yi kubi o nani min den waani yi maama. Yeni yaa ka yi dandanli moko tie fanma fanma.
3N den kpa waani yi mini n ba n den baa yaa bangima, lani n tie ke Kilisiti den kpe ti yaa tuonbiadi po nani i Diani n yedi maama. #Esa 53.5-12. 4Bi den piini o, li dataali daali o den fii bi tinkpiba siiga, nani i Diani n yedi maama. #Ps 16.8-10; Mat 12.40; JTT 2.24-32. 5O den doagidi o yuli Pieli po, ki go doagidi bi piiga n niliediba po. #Mat 28.16-17; Mrk 16.14; Luk 24.34,36; Jan 20.19. 6Lani n pendi, o go den doagidi o yuli ti kpiiba yaaba n den taani ki cie niba kobimuu po. Bi siiga boncianla da ye, ama bi tianba wani kpe. 7Lani n pendi, o den doagidi o yuli Jaki po, ki yuandi ki doagidi bi tondiba kuli po.
8O den juodi ki doagidi o yuli mini mo yaa po, mini yua n tie nani ki bikaaga yeni. #JTT 9.3-6. 9Moamoani, n tie Jesu tondiba kuli siiga puoli yua, mii pundi ban yini nni Jesu tondo moko, kelima n den wangi U Tienu Nitaanli fala. #JTT 8.3. 10U Tienu ŋanbili po yo, ke n tua min tie yua na. O ŋanbili n po naa tua fanma, li teni ke n soani ki cie Jesu tondiba kuli. Laa tie mini n ba ka soani yeni, ama U Tienu ŋanbili n tuuni leni nni. 11Lanwani, lan tie mini, bi lan tie bani, tikuli wangi yi laa Laabaaliŋamo, yimo den tuo ki daani wane.
Bi tinkpiba fiima
12Lanwani, li yaa tie ke ti wangi ke Kilisiti fii bi tinkpiba siiga, li gaa lede ke yi siiga tianba nia ke bi tinkpiba fiima ki ye? 13Bi tinkpiba fiima yàá ye, Kilisiti moko naa den fii bi tinkpiba siiga. 14Kilisiti yàá den fii mo, ti mawangima tie fanma fanma, yi dandanli moko tie fanma fanma. 15Li yaa tie ke bi tinkpiba kan fii, ti tie siedi-tuofaadanba U Tienu po, kelima ti tieni o po siedi ke o fiini Kilisiti bi tinkpiba siiga, ke o naa fiini o. 16Bi tinkpiba yaa kan fii, Kilisiti moko naa den fii bi tinkpiba siiga. 17Kilisiti mo yàá den fii bi tinkpiba siiga, yi dandanli tie fanma fanma, yi da ye yi tuonbiadi nni, 18yaaba n daani Kilisiti ki kpe moko bodi. 19Li yaa tie ke ti dugidi Kilisiti po tie o naa jamaano bebe po, ti yema pia mi ninñima ki cie bi niba kuli.
20Ama moamoani, Kilisiti fii bi tinkpiba siiga, ki tie o nikpialo#15.20 Diidi Levi buolu tili 23.10, Nikpialo, li yedi li bonluonkakpiala yaala n doagidi ke u jetaagu nagini maama, Kilisiti fiima moko doagidi ke bi tinkpiba kuli baa fii. ki tie siedi ke yaaba n kpe kuli baa fii. 21Lanwani, kelima mi kuuma n den cua kelima o nisaalo yaa po, yeni moko bi tinkpiba fiima cua kelima niyendo yaa po. 22Nani bi niba kuli n kpe kelima Adama po maama, yeni bi niba kuli go baa baa li miali kelima Kilisiti yaa po. 23Ama yuakuli o kaanu, Kilisiti o kpialo, li yaa puoli, wan cua yaa yogunu, yaaba n tie o yaaba baa fii. 24Li yaa puoli, mi juodima yogunu baa cua. Kilisiti baa paadi ki bolini batoali kuli leni paato kuli leni paacianto kuli ki teni U Tienu yua n tie Baa mi diema kuli. 25Kelima li tie tiladi ke Kilisiti n yaa die hali U Tienu n teni wan ŋmaa o yibalinba o taana tiipo. #Ps 110.1. 26Wan baa juodi ki bolini yaa yibali tie mi kuuma. 27Moamoani U Tienu den teni ke Kilisiti die li bonla kuli ki ŋmaa la ki diedi likuli. Ama lan yedi ke o teni ke Kilisiti die li bonla kuli yeni, li doagidi ke yua n teni ke o die li bonla kuli naa taa laa bonla nni. #Ps 8.7. 28Li yaa tie ke Kilisiti diedi li bonla kuli yaa yogunu, wani U Tienu Bijua baa miini o yuli ki tuo ke yua n den teni ke o die likuli yeni n yaa die o, ke U Tienu n yaa tie likukuli li bonla kuli nni.
29Bi tinkpiba fiima yàá ye, ban batisi yaaba kelima yaa niba n kpe yaa po baa baa li po be? Li yaa tie moamoani ke bi tinkpiba kan fii, be yaa po ke nitoaba batisi bani yaaba n kpe po? 30Tinba mo, be yaa po ke ti ye mi yebiadima nni yogunu kuli? 31N kpiiba, li tie moamoani ke n ye mi kuuma nni daali kuli, ama yinba n tie pamancianli ti Diedo Jesu Kilisiti kani. 32Min den koani leni ti moayandi Efesi po yeni, li yaa tie ke bi niba n nua maama bebe po, n den baa be yaa ñuadi lienni? Li yaa tie ke bi tinkpiba kan go fii, lanwani: Tin je mani ki go ño, kelima saala ti baa kpe.#15.32 Diidi Esayi 22.13. Yaaba n den ŋaa U Tienu sanŋoadima, ki naa biidi bi pala bi tuonbiadi po den yieni yeni. 33Lan da boani yi: “U yeginbiadu n baa biidi li yantiaŋanli.”#15.33 Gireki yua Menandile n diani laa maama. 34Yin go baa mani li yantiaŋanli nani lan pundi maama, ki cedi ki da go tiendi tuonbiadi, kelima yi siiga tianba naa bani U Tienu. N maadi yeni, ke i fe n cuo yi li po.
Bi tinkpiba n baa fii leni yaa gbanandi
35Daalinba niloba baa buali: «Bi tinkpiba baa fii lede? Bi baa guani ki cua leni be yaa gbananbuolu?» 36Fini o yanpiidaano, ŋan buli yaala yàá kpe, li kan pudi. 37Ŋan buli yaala ke li tie bonbibu, bi dibima, bi bonbuotoe, laa tie ŋan go baa le yaala. 38U Tienu puuni bonbibu kuli wan bua yaa gbanandi buolu. O puuni bonbibu kuli bu gbanandi buba.
39Ti gbanandi buoli kuli naa tie yenma. Bi nisaaliba gbanandi ye tiba, ti yandi gbanandi ye tiba, ti bonyugiditi gbanandi ye tiba, i jami yaa gbanandi mo ye tiba. 40Tanpoli yaa gbanandi ye, ki tinga mo yaa gbanandi ye. Tanpoli yaa yaadi kpiagidi naa taa leni ki tinga yaadi yaa kpiagidi. 41U yienu pia u kpiagidi uba, o ŋmaalo pia o kpiagidi oba, a ŋmabila pia a yaa kpiagidi aba. A ŋmabila moko naa taa kpiagidi buolu leni aya.
42Bi tinkpiba fiima mo baa yaa tie yene. Bi buli ti gbanandi ke ti tie bonbedikaadi, ama ti go baa fii kaa go pia bedima. 43Bi buli ti ke ti gundi, ama ti baa guani ki fii ki pia ti kpiagidi. Bi buli ti ke ti tadi, ama ti baa guani ki fii ki pia u fidu. 44Bi buli ti ke ti tie nisaali-gbanandi, ama ti fii leni U Tienu Fuoma yaa miali. Li yaa tie ke ti nisaali-gbanandi ye, yaa gbanandi n pia U Tienu Fuoma miali moko ye. 45Li tie yeni ke li diani ki yedi: O nikpialo Adama den tua yaa miali n fo. Ama Adama juodika tie yaa Fuoma n puuni li miali. #Cil 2.7. 46Laa tie tanpoli yua ka den kpia, ama ki tinga yua, ke tanpoli yua yuandi ki cua. 47O nikpialo den ñani ki tinga tama nni, ki tie ki tinga yua, o nilielo ñani tanpoli. 48Tinga nni yua n tie maama, tinga nni yaaba mo kuli tie yene. Tanpoli po yua n tie maama, tanpoli yaaba mo kuli tie yene. 49Nani tin pia ki tinga yua yaa nannanli maama, ti go baa baa tanpoli po yua yaa nannanli yene.
50N kpiiba, min yedi yaala tie ke ti gbanandi leni mi soama kan je li faali U Tienu diema nni, yaala n baa bedi mo kan je yaala n kan bedi faali.
51Diidi mani, n baa doagidi yi po li bondoaginkaala. Tikuli ka baa kpe. Ama tikuli baa lebidi. #1Tes 4.15-17. 52Li baa tieni yenma nani ku nungbangu kabima yeni, o kakaci-juodika yaa piebi yaa yogunu. Kakaci yaa piebi, yaaba n kpe baa fii, ki kaa go pia mi bedima, lani, timo baa lebidi. 53Li tie tiladi ti naa gbanandi yaadi n baa bedi, n lebidi ki tua yaadi n kan bedi. Li tie tiladi ti naa gbanandi yaadi n baa kpe, n lebidi ki tua yaadi n kan kpe. 54Lanwani, yaa gbanandi n baa bedi yaa lebidi ki tua yaadi n kan bedi, ke yaa gbanandi n baa kpe mo lebidi ki tua yaadi n kan kpe, lanyogunu yaa maama n diani na baa tieni ki dudi:
Bi paadi mi kuuma ki bolini ma cain. #Esa 25.8.
55Mi kuuma, a paalu ye le?
Mi kuuma, a bonjunkaala go ye le? #Ose 13.14.
56Mi kuuma bonjunkaala n tie ti tuonbiadi. Ti tuonbiadi paalu mo n tie li bali maama. 57Ama tin tuondi U Tienu yua n teni ke ti paani li bonla kuli, kelima ti Diedo Jesu Kilisiti po.
58Lanwani n kpibuadiba, yin yaa se mani bonŋanla ki da lengidi. Yin yaa suagi mani liiga o Diedo tuonli nni yaa yogunu kuli, ki bani ke yi tuonli o Diedo po kan tua fanma.
Currently Selected:
1 Korenti 15: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
