1 Korenti 14
14
U Tienu Fuoma Yua paabu leni bu tuonli
1Yin moandi ki yaa pia mi buama. Yin yaa lingi U Tienu Fuoma Yua paabu moko, ama yin yaa lingi mi mawangima yaa paabu ki cie. 2Yua n maadi mi malanma, waa maadi leni bi niba, o maadi leni U Tiene, kelima niloba kuli ki gba wan tua yaala. U Tienu Fuoma Yua paalu teni ke o maadi U Tienu bondoaginkaala. 3Ama yua n wangi U Tienu n yedi o yaala maadi leni bi niba, ki todi ba ke bi suagi liiga, ki tundi ba ki paagidi bi pala, ki go baagidi ba. 4Yua n maadi mi malanma todi o yuli bebe. Ama yua n wangi U Tienu n yedi o yaala todi Kilisiti Nitaanli kuli. 5N bua ke yikuli n yaa maadi mi malanma, ama n bua yin yaa wangi U Tienu n yedi yaale ki cie. Yua n wangi U Tienu n yedi yaala cie yua n maadi mi malanma, li yàá tie ke o soagini wan yedi yaala ke Kilisiti Nitaanli n baa mi todima lienni yaa ka. 6N kpiiba, li baa yaa pia yi po be yaa fuome n yaa cua yi kani ki maadi yi mi malanma, ki naa doagidi yi po bondoaginkaaliba, bi bandimiba, bi U Tienu n yedi yaala, yaa ka bangimiba?
7Ba yaa bonla n kaa fo ki nan pia u nialu, nani ki yeliga leni ku gogidigu, li yaa tiendi yaa fuugu n ki pia gagidima, bi niba baa gaa lede ki bandi ban piebi yaala, bi ban pua yaala? 8Yua n piebi kakaci yàá piebi ke li gagidi bu toabu po, ŋme n baa bandi ki bogini bu toabu po?
9Likuli tie yenma leni yinba. Yi yaa maadi mi malanma kaa maadi ban baa fidi ki gbadi yaala, bi baa gbadi yin maadi yaala lede? Yi baa yaa maadi mi fawaama nni bebe.
10Ba ke i mabuoli yabi ŋanduna nni, yaa maama n ki pia bundima ki ye. 11O nilo yaa maadi min kaa bani yaa mabuolu, n baa yaa tie o po nilamo, omoko baa yaa tie n po nilamo. 12Lanwani, yinba mo, nani yin lingi U Tienu Fuoma Yua paabu leni li yankuali yeni, lan yaa tie Kilisiti Nitaanli todima po yo ke yi lingi ki baa boncianla.
13Lani yaa po, yua n maadi mi malanma, n mia U Tienu wan pa o wan fidi ki soagini wan yedi yaala. 14N yaa jaandi ki maadi malanma, n pali ye i jaandi nni, ama n yantiali naa ye lienni. 15Lanwani, n baa tieni lede? N baa jaandi leni U Tienu Fuoma, ama n baa yaa jaandi leni n yantiali mo. N baa yaa yiini leni U Tienu Fuoma, ama n baa yaa yiini leni n yantiali mo. 16A yaa tuondi U Tienu a pali nni, yua n kua yi nitaanli nni ki naa bani laa bonla, baa gaa lede ki gaa “Amina”, kelima o naa bani ŋan tua yaala? 17Moamoani, a tuondi U Tienu bonŋanla, ama laa todi a lielo wan suagi.
18N tuondi U Tienu ke n maadi mi malanma ki cie yikuli. 19Ama Kilisiti Nitaanli siiga, n yaa maadi maamimuu ke mi pia mi bundima, ki baa fidi ki bangi nitoaba, lani n cie n po min maadi malanma, maama tuda piiga (10 000).
20N kpiiba, da kpaagi mani nani a biwaala yeni. Li bonbiadila yaa po, yin yaa tie nani a canpanda yeni, ama yi kpaagili nni, yin yaa tie nikpela. 21I Diani waani ke o Diedo yedi mi naa maama:
«N baa soani nibuotoe n niba kani,
Ki teni bi nilanba n maadi ba mi malanma,
Ki yaa wangi ba n maama.
Ba yeni, bi kan cengi n maama.» #Esa 28.11-12.
22Lanwani, mi malanma tie sinankeene yaaba n daa tuo ki daani po. Maa tie yaaba n daani yaa po, ama mi mawangima tie sinankeene yaaba n tuo ki daani po. 23Lanwani, Kilisiti Nitaanli kuli yaa taani ki maadi mi malanma, yaaba n kaa bani laa bonla leni yaaba n daa tuo ki daani yaa kua yi siiga, baa baa yedi ke yi gaadi ka? 24Ama li yaa tie ke bikuli wangi U Tienu maama, ke yua n ki tuo ki daani, bi yua n bani kua yi siiga, li baa doagidi o po ke o tie tuonbiadi daano, wan gbadi yaala mo n cuo o pali. 25Yaala n wuo o pali nni kuli baa wuodi. Lanwani, o baa labini U Tienu nintuali, ki kpiagi o, ki yedi ke U Tienu ye yi siiga moamoani.
Li taanli nni ŋamu
26N kpiiba, ti baa tieni lede? Yi yaa taani, one baa yaa pia bu yanbu, one mi bangima, one mi doagidima, one mi malanma, one mi malanma soaginma. Likuli n tieni ke Kilisiti Nitaanli n baa mi todima. 27Li yaa tie ke bi niba cili ki maadi mi malanma, nibilie, bi nibitaa, baa fidi ki maadi yendo yendo ki ŋoadi biyaba, niyendo mo n soagini. 28Li yàá pia yua n baa soagini, yua n bua ki maadi mi malanma n yaa ŋmini Kilisiti Nitaanli nni, ki maadi ma o yuceli po leni U Tienu po. 29U Tienu mawangikaaba moko, nibilie, yaa ka nibitaa, n yaa wangi U Tienu maama, yaaba n sieni n yaa biigidi ban maadi yaala. 30Yaaba n kaa ki cengi yeni siiga, niyendo yaa baa doagidima, yua n bi kpa maadi n ŋmini. 31Yikuli baa fidi ki waani U Tienu maama yendo yendo ki ŋoadi yiyaba, ke yikuli n baa mi bangima leni i tundi U Tienu sanŋoadima nni. 32Bi mawangikaaba n die bi yama, 33kelima U Tienu naa tie sisindi sindi Tienu ka, ama mi yanduanma Tienu.
Nani lan tie maama bi nigagidiŋanba taana kuli nni, 34li pundi bi puoba n yaa ŋmini a taana nni, kelima baa pia sanu ki maadi lienni. Ama ban yaa miindi bi yula, nani li bali maama moko n bili maama. 35Bi yaa bua ki bandi bonliba, kali ban buali bi ciaba bi denpo, kelima laa pundi o pua n maadi Kilisiti Nitaanli siiga.
36U Tienu maama den ñani yi yaa kani yo? Bi mi den cua yinba bebe yaa kani yo? 37Niloba yaa tama ke o tie mawangika, bi ke U Tienu Fuoma ye o niinni, wan faami bonŋanla ke min diani yi po yaala na tie o Diedo ñoamabonle. 38O yaa yie kaa tuo, cedi o mani!
39Lanwani n kpiiba, yaa kuandi mani yi yama ki bua ki baa ki yaa wangi U Tienu maama. Yin da yie ban maadi malanma mo. 40Ama li bonla kuli n yaa tiendi ke li ŋua li fuuli, ki da cuoni sisindi sindi.
Currently Selected:
1 Korenti 14: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
