1 Korenti 16
16
Poli jaga leni i fuondijuodike
16
Mi todima bi nigagidiŋanba po
1Yaala n tie mi ligitaanma bi nigagidiŋanba todima po, yimoko n tieni nani min den bili Kilisiti Nitaana, ya n ye Galati diema nni po maama. #Lom 15.25-26. 2Aŋada daali kuli, yi siiga yuakuli n yen bili o denpo wan fidi yaala nani o bonpiakaala n pundi maama, ki da guudi n cuama yogunu ki tieni mi ligitaanma. 3N yaa cua, n baa diani a tila Jerusalemi yaaba po, ki teni yin gandi yaa nidugikaaba, ki soani ba ban gedini yi paabu Jerusalemi. 4Li yaa pundi mini n ba n gedi, bi baa yegi leni nni.
Poli n jagi ke o baa gedi yaa kaani
5N yaa poandi Maseduani diema nni, n baa cua yi kani. N jagi ke n baa poandi Maseduani nni. #JTT 19.21. 6Daalinba n baa waagi leni yi, li fidi min pundi ti wadi yogunu, ke yin todi nni leni n cenli, min baa gedi naankani kuli. 7Mii bua ki le yi moala ki pendi tontoni, ama o Diedo yaa tuo, n sugini ki waagi leni yi waamu.
8Ama n da baa yaa ye Efesi na, hali Pantekoti jaanma n pundi, #Lev 23.15-21; Tia 16.9-11. 9kelima u sanu luodi n tuonli po, ama yibalinba yabi.#JTT 19.8-10.
10Li yaa tie ke Timote cua yi kani, yin gaa o cangu bonŋanla ke wan da bangi liba yi siiga, kelima o tuuni o Diedo tuonli nani mini yeni. #1Kor 4.17. 11Oba kuli n da fali o. Yin todi o o cenli nni, ki cabi o leni mi yanduanma, wan guani ki cua n kani. N guu wan taani leni ti kpiiba ki cua.
12Ti kpiilo Apolosi yaa maama po, n den tigini o ke wani leni ti kpiiba n yegi ki gedi yi kani, ama waa bua ki cua yi kani moala. O yaa ti baa u sanu, o baa cua.
I tundijuodike leni i fuondi
13Yin yaa guu mani, ki yaa se ke li pa li dandanli nni. Tua mani jaba, ki paagi mani yiba. 14Yi siiga, li bonla kuli n yaa tiendi leni mi buama.
15N kpiiba, n go pia mayenma. Yi bani ke Sitefana leni o deni yaaba kuli tie yaaba n den kpa daani Jesu Akayi diema nni. Yi go bani ke bi puni bi yula, ki todi bi nigagidiŋanba. #1Kor 1.16. 16Yin miini yi yula laa nibuolu kani leni yaaba n kuani bi yama ki tuuni o Diedo tuonli kuli kani.
17Sitefana, Fortunatusi leni Akayikusi cuama mangi n pali. Bi tieni n po yin bi baa tieni n po yaala kuli. 18Bi duani n yama, ki mangi n pali ki go tieni yeni yimoko yaa po. Yin pagi mani laa nibuolu.
19Kilisiti Nitaana Asi diema nni kuli fuondi yi. Akilasi, Prisili leni Kilisiti Nitaanli, yaali n taandi bi diegu nni, fuondi yi o Diedo nni. #JTT 18.2. 20Ti kpiiba yaaba n ye nekanba kuli fuondi yi. Fuondi mani yiyaba, ki gobini yiyaba leni mi buamoanma.
21Mini Poli, n diani n fuondi na leni n nuceli.
22Yua n kaa bua o Diedo kuli, wan tua ti solindi yua. Ti Diedo, ŋan cua!
23O Diedo Jesu yaa ŋanbili n yaa ye leni yi. 24N bua yikuli Jesu Kilisiti nni.
Currently Selected:
1 Korenti 16: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
