Ɩzayi 19

Ƴɛ̀rʋ na ƴɛ̀r a Eziptɩ tẽw ƴãw a

1Ƴɛ̀rʋ na ƴɛ̀r a Eziptɩ tẽw ƴãw a.

A Sore be n zũzuwr na cere fɔ̃w fɔ̃w a zu,

ʋ tarɛ nɩ a Eziptɩ tẽw.

A Eziptɩ tẽw tɩbɛ màwr'ɩ a ʋ niŋé,

ɛ́ a Eziptɩ tẽw dem kanyir baarɩ.

2A Sore yere na:

«Ɩ̃ na ƴãw nɩ a Eziptɩ tẽw dem tãá,

bɛ na zɛbr'ɩ taa a bɛ cara pʋɔ,

yɛb nɩ yɛb, tɔ nɩ tɔ,

tẽ-kpɛ̃ɛ nɩ tẽ-kpɛ̃ɛ

naalʋ-tẽw nɩ naalʋ-tẽw.

3A Eziptɩ tẽw dem yã na yi na,

ɩ̃ na dam'ɩ a yele bɛ na tɩ́ɛrɩ bin a nyaw taa.

Lɛ n'a bɛ na sowre a bɛ tɩbɛ,

a tɩtɩlbɛ nɩ a bàwr-bʋwrbɛ.

4Ɩ̃ na bɛr'ɩ a Eziptɩ tẽw kʋ̀ zu-sob

na tɛr mimi-kõw a,

na-po-tuo sob'ʋ na so ʋ.»

À à ŋá n'a a Sore Naaŋmɩn,

a kpɛnʋ-za-sob, yere.

5A Nɩl kʋ̃ɔ báarɛ na,

a man ŋa ko n pelẽpelẽ.

6A bɔw-wɛrɩ kʋ̃ɔ nyùur'a,

a Nɩl man gbɛ́ɛ kʋ̃ɔ síwre na,

a síwre na na tɩ sɩr.

A bàa-kɛkɛɛ nɩ jimie vàrɛ na.

7A bà-mʋ̃ɔ na lanɩ a Nɩl man,

ɛ́ be a zie ʋl a ʋ kʋ̃ɔ

na zɔrɛ kpɩɛr a kʋ̃ɔ-kpɛ̃ɛ kʋ̃ɔ pʋɔ a kòre na.

Sɛsɛb wobr a na cere nɩ,

bom za bɛ cãà be ɩ.

8A zʋm-nyɔwrbɛ kone na,

a bɛlɩ dem za na lɔbr a zʋm-pime

a Nɩl man pʋɔ a kone nɩ a bɛ kpɩɛrʋ.

A bɛlɩ dem na lɔbr a mɩ̃ɛ a kʋ̃ɔ zu a fãw báarɛ na.

9A bɛlɩ dem na tone a lɛ̃ tome a

tɩɛrʋ na wɛ na.

A pɔwbɛ na mɩ́ càarɩ a lɛ̃ fomie na lɩr taa a,

nɩ a dɛbr na mɩ́ wób a a

sãá nɩ bàalbɛ a pʋl-vʋ̃ɔ zũú.

10A pɛn-wobrbɛ bɛ cãà laar ɛ,

a bɛlɩ dem na tɩ páwr a bɛ nyɔ-vʋʋrʋ à à ŋá a,

bɛ bãw ŋmɩŋmɩn za n'a ɩ.

11A Tanisɩ#19:11 Tanisɩ: Tẽ-kpɛ̃ɛ na be a Eziptɩ tẽw saa-pɛrɩ́-gʋba-lowr nɩ saa-pɛrɩ́ cara pʋɔ a n'ʋ. Bɛ mɩ̀ bʋɔlɛ ʋ nɩ Sowan. tẽ-kpɛ̃ɛ nɩ-bɛrɛ ɩ n dãbole.

A yã-bãwnbɛ na wule a Faarawɔ̃ a

maal'ɩ gẽgemi dem lãw.

Ŋmɩŋmɩn n'a a bɛ kãw za

na mɩ́ sàw yel a Faarawɔ̃:

«Yã-bãwnɛ nɛ m,

a koro za na-mɩnɛ bie»?

12A fʋ yã-wulbɛ wa mɔ̃, Faarawɔ̃ i?

Bɛ yel kʋ̀ b,

bɛ ɩ fʋ bãw a ʋlɩ bom nɛ

a Sore, a kpɛnʋ-za-sob, na yel a fʋ tẽw ƴãw a!

13A Tanisɩ tẽw nɩ-bɛrɛ lɩɛb'ɩ dãbole,

a Mɛmfisɩ#19:13 Mɛmfisɩ: A Eziptɩ tẽw pɛrɩ́ tẽ-kpɛ̃ɛ-kʋra n'ʋ. nɩ-bɛrɛ bɛ̀lɛ nɩ bɛ tʋɔra.

Bɛ ɩ na a Eziptɩ tẽw bɔrɛ,

bɛl na ɩ a tẽ-ŋma-kʋ̀rɩ nɩ-bɛrɛ a.

14A Sore ɩ na a bɛ yã bɔr,

ɛ́ bɛ ƴãw a Eziptɩ tẽw bɔrɛ a ʋ yele za pʋɔ.

Ʋ ŋmɛ̃ na mɛ̃ dã-kuole na mɩ́ dẽdere tire nɩ a.

15Nɩr za kʋ̃ lɛb tʋ̃ɔ́ ɩ bom a Eziptɩ tẽw ɛ,

a zú nɩ a zʋʋr ɛ,

a kpãkparmɛ wule nɩ a bàa-kɛkɛr ɛ#19:15 Nyɛ̃ 9.13-14..

A lɛ a nãà wa ŋmɛ̃ a Eziptɩ tẽw ƴãw a nɩdaar a

16Bibir kãw, a Eziptɩ tẽw dem na ɩ na mɛ̃ pɔwbɛ a. Dɛ̃bɩ̃ɛ na mɩ́ ɩrɛ bɛ na bɛ màwr, a lɛn daar a Sore, a kpɛnʋ-za-sob, nãà mɩ́ wa zɛw a nũu a bɛ ƴãw a. 17A Zuda tẽw tɩ́ɛrʋ na mɩ́ ɩ bɛ nɩ vĩ. Lɛn daar za bɛ nãà mɩ́ wa ƴɛ̀rɛ a ʋ ƴɛ̀rʋ a bɛ niŋé a, dɛ̃bɩ̃ɛ na mɩ́ ɩrɛ bɛ na, a lɛ a Sore, a kpɛnʋ-za-sob, na yel k'ʋʋ na ɩ bɛ na a ƴãw.

18Bibir kãw, tẽ-bɛrɛ anũu na be n a Eziptɩ tẽw, bɛ ƴɛ̀rɛ ebre a be, ɛ́ a nɩbɛ mɩ́ pɔ yel k'aa Sore, a kpɛnʋ-za-sob, so bɛ. A tẽ-bɛrɛ á ŋá kãw yúor na dɩ na kɛ́ Mʋ̃tɔ̃w-tẽ-kpɛ̃ɛ.

19Bibir kãw, bàwr-maal-kuur na be n a Eziptɩ tẽw sɔwlɩsɔw a Sore ƴãw, ɛ́ kʋsɛ-tela be a ʋ ƴãw a tẽw tʋr-bɔw ƴãw. 20Ʋ na ɩ n bãwfʋ na wule k'aa Sore, a kpɛnʋ-za-sob, be n a Eziptɩ tẽw pʋɔ a. A Eziptɩ tẽw dem wa kone cɔwr a Sore, a bɛlɩ dem na dɔwrɛ bɛ a ƴãw a, ʋ na kʋ̀ bɛ nɩ faarɛ na na gù bɛ ɛ́ faa bɛ a. 21A Sore na ɩ na a Eziptɩ tẽw dem bãw ʋ, ɛ́ a ʋlɩ bibir nɛ a, a Eziptɩ tẽw dem na bãw nɩ a Sore. Bɛ na tɛr'ɩ a bàwr-maal-tome nɩ a de-kʋ̀b bome tome a ʋ zie. Bɛ na kone nɩ nɛ́ɛ a Sore zie ɛ́ íre a. 22A Sore na ŋmɛ n a Eziptɩ tẽw dem, ʋ na ŋmɛ bɛ na, ɛcɛ ʋ na sanɩ bɛ na. Bɛ na lɛb'a wa a Sore zie, ʋʋ na bɛr'a wõ a bɛ zɛlʋ ɛ́ sanɩ bɛ.

23Bibir kãw, sɔ́r na yi n a Eziptɩ tẽw ɛ́ cen a Asiiri tẽw. A Asiiri tẽw dem na mɩ́ cen nɩ a Eziptɩ tẽw, ɛ́ a Eziptɩ tẽw dem cen a Asiiri tẽw. Bɛ za na lãw na tone a Sore tome.

24Bibir kãw, a Sore na kʋ̀ n a ʋ maalʋ a tẽ-daa: a Ɩsɩrayɛl na ɩ n a ata sob na na páw a maalʋ lãwnɩ a Eziptɩ nɩ a Asiiri a. 25A Sore, a kpɛnʋ-za-sob, na maal'ɩ a tẽ-daa yel à ŋá: «Ɩ̃ maalɛ nɩ a Eziptɩ tẽw dem, a ɩ̃ nɩ-bʋʋrɛ, a Asiiri tẽw dem, a ɩ̃ nuru bʋ̃-maalɩ, nɩ a Ɩsɩrayɛl nɩbɛ, a mãa mɩŋa bom.»

Currently Selected:

Ɩzayi 19: DBDC

Highlight

Copy

Compare