Barua ya Varome 8
8
1Kyasia alli lukiifo uumisio kwa valya vakee va Kristo Yesu ndi. 2Fulya ivavaso li lya Mumuyo munnde muu uukie kwa Kristo Yesu llyo lyantilakanisa na ivavaso lia linnde ireko na ufu. 3Amu kilya ivavaso lia liteemakii, fulya liikee iime mmikae ya kivandu, nkyo Iṛuva andekiawutia eerumaa Mwana wamwi kwa fwana ya vvili wa kivandu uwore fikasha na kiimba kya ireko kaumisia ireko fiwarani na vvili. 4Kikava kuri, amu ivavaso likooye yawutia kari keru kitaare tilatiaa mikae ya vvili, kake tilatiaa mikae ya Mumuyo. 5Amu valya vakuwaraa na mikae ya vvili wo vakusaṛaa findo fa vvili, kake valya vakee ikuwara na mikae ya Mumuyo wo vakusaṛaa findo fa Mumuyo. 6Makusaṛo a mikae ya nndu yo meni annde ufu, kake makusaṛo nndu akee ikusaṛa a mikae ya Mumuyo annde muu na unambwe. 7Fulya makusaṛo a mikae ya nndu yo meni awore kituva na Iṛuva, fulya atairikie mavavaso a Iṛuva ana amakii iirikia ndi. 8Amu valya vakusurani na mikae ilya ya vvili vamakii isenya Iṛuva ndi. 9Kake ini mukikee va mikae ilya ya nndu meni ndi, mwawa va mikae ya kwa Iṛuva, kwakooya Mumuyo wa Iṛuva akee kari kanu. Amu ulya atawore Mumuyo wa Kristo, a wa nndu wamwi ndi. 10Na Kristo kankaa kari kanu vvili wanu ukooyaa ifwa da kiimba kya mareko, kake mumuyo wanu ukee na muu kiimba kya usumani. 11Kake kwakooya Mumuyo wa ito andeṛuta Yesu kwa vafu akee kari kanu, ito andeṛuta Kristo kwa vafu aṛutaa na mivili yanu ikee mikaeń ya ufu kwa finya ya Mumuyo wamwi akee kari kanu.
12Kwa ikyo vanavama tikikee fingi usileń lwa mivili yeru ya kivandu tiilatiaa ndi. 13Amu kwakooya mwalatia mikae ya vvili wanu mufwaa. Kake kwakooya muwaa milangie mikasha ya mivili yanu kwa finya ya Mumuyo, llyo mukooyaa muu. 14Amu woose vairio̱ mbele mMumuyo wa Iṛuva iwo wwo vana va Iṛuva. 15Amu mwanniingwa Mumuyo wa uketi mjiwarwa fingi wweṛei ndi, mwanniingwa Mumuyo wa imwaṛua vana, nto akee itilosha iia fiinumbuaa: Wui Nde yeru! 16Mumuyo to muni andu emwi na mumuyo uu weru akee itirambua sheeli tikee vana va Iṛuva. 17Kwakooya tikee vana, kyasia tikeeń na vayadiṅu. Tikava vayadiṅu andu emwi na Kristo, kwakooya tikee iliswa ukiva andu emwi nae, naamu tindeniingwa na unini andu emwi nae.
18Amu llolie sheeli matuṛulo a mikonu ii ya alli nkindo ili tia-ṅaṅanisaa na unini lua tiluoruswaa na baa ndi. 19Amu foose fitani fiveree na usau wiingi fiivereaa unini lwa vana va Iṛuva ili lulolikaa na baa. 20Amu foose fitani fanrawa-fo fibwaa, nta nkwa mifurie yayo ndi, kake kiimba kya ito afirwaa-fo, nafo fiifo na iverea lyayo. 21Amu foose fitani fitaulwaa usingeń ilu lubwaa, nafo faake ifureń lya unini lua vana va Iṛuva valukooyaa. 22Amu tiishi sheeli findo foose fitani fikee andu emwi neese fiindiaa kiimba kya ilolia mavavio kumande alli. 23Lingi mfo feni da ndi, na akwaa ni ise tawwaria kya iṛiikisa, nto Mumuyo, tikee iindia mirimiń yeru tivereaa taaṛulwa vana, llyo na mivili yeru nayo ivaulwaa. 24Amu ise tindekiṛwa kwa iverea, kake kindo kilya kiverewa kikallolika likiifo iverea lingi ndi. Amu ni i avereaa kindo ammaa ikilolia? 25Kake tikankusura kindo titakilolie, tikivereaa na ulalamboo.
26Mfo kuro na Mumuyo ateelekiaa utanyari lweru, fulya fiteeshi kasa titerevaa. Kake Mumuyo atisalaliaa eetitereviaa na idia litavaa isenda. 27Nae ito allaa mirima eeshi makusaṛo a Mumuyo kasa akai, fulya atereviaa valya vakee va Iṛuva sheeli Iṛuva afurie.
28Neese tiishi sheeli findo foose Iṛuva aaviaa valya vankundie fivaviaa fa usha foose, nawo vvalya vandevaangwa kasa andevaṛengia. 29Amu valya eeveeshii kuuka ilyo kala avasaua kuuka ilyo kala vavakaniswa na fwana ya Mwana wamwi, amu ye ave vvele kari ka vanavamae veengi. 30Na valya andevasaua wwo andevavaanga kuuka ilyo kala. Na iwo andevavaanga andevataalia usumani. Na iwo andevataalia usumani wwo andevaniinga unini.
31Ifo foose tifireraań are? Iṛuva kankaa taari yeru, ni i ungi akee kwa ule yeru? 32Ye nta andeiria Mwana wamwi iriso ndi, kake andenniingia kiimba kyeru ti woose. Alemwaań itiavia ise wavi lwamwi loose andu emwi nae? 33Ni i aṛiingaa vasaue iva va Iṛuva? Iṛuva aiyo avataaliaa fa usumani. 34Ni i avaumisiaa? Kristo Yesu eefo ulya andefwa, na kita ikyo andeṛuka akee uko usha lwa Iṛuva, lingi yye akee ititerevia. 35Ni i naań atirauaa na ikunda lya Kristo? Mmavavio ana nngatara ana ni yumbutwa ana nsoto ana ni yenda kuri ana nkitani ana nshombo? 36Nsheeli kyatisiṛwa: ”Kwa kiimba kyafo tikee iwalwa nkonu tiṛi, tivakie maanri akee isikywa tubu“. 37Kake ngyukiveń iti toose tikee yengeṛia ivinga tielekio̱o̱ ni ito afikundie ise. 38Kwa ikyo nammaa imanya deń sheeli na akwaa ni ufu lumakii itiraua ana ikaa na muu ana malaika ana veetoṛo ana veni finya ana kya iva nnu ana kivaa numa 39ana finya ya iṛuvewu ule ana ikee kwa si ana fikava fitane fingi foose, nta kiifo kimakii itiraua na ikunda li lya Iṛuva afikundie nalyo litilunganisie na Kristo Yesu Nndumi weru ndi.
Currently Selected:
Barua ya Varome 8: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
