Barua ya Varome 7
7
1Vanavamae vakwa, mwishi se — amu nkee irera na iwo veeshi mavavaso — sheeli mavavaso eetoṛio nndu kyeeri ki akee na muu? 2Amu nka awore mmi afingio̱ mmi ulya ni ivavaso kyeeri akee na muu. Kake mmi ulya kamfwa, amboṛomulwa ivavasoń lia lyamwi. 3Kyasia kyeeri mmi wamwi eefo na muu kwakooya ava na mmi ungi avaangwaa mwaaisi. Kake mmi wamwi kamfwa amboṛomulwa akifingio̱ ni ivavaso lyo ndi. Nta akivaa mwaaisi kwakooya aalikwa ni nndumi ungi ndi. 4Nkuro kikai: Vanavama, ini mwamfiya mavavaso kwa shia ya ufu lwa vvili wa Kristo, amu muve masaa a ungi ito andeṛutwa kwa vafu, amu tivikie Iṛuva nunda. 5Amu ilyo tikee mikaeń ya kiwili, ilanga lya mareko liifo kiimba kya mavavaso likaṛunda mashoṛa kari ka meeṛo eru kumande tikairia ufu nunda. 6Kake alli tikee vaboṛomue ivavaso, fulya tamfiya mikae ilya, iitiimiee, amu ise tikooye iṛunda na mikae miya ya kimumuyo, nta nna mikae ya mbele ya mitisiṛie ndi.
7Kyasia tikarerań are? Mavavaso mmareko? Wode! Kake nta niimakii imanya ireko kitaare nkwa mavavaso ndi. Fulya niiteemanyaa milangie kasa ikai, kikooye ivavaso litanderera: Manya kutalange. 8Llyo ireko findekooya mwaanya na ivavaso lia likaanta ilanga lya mikae yoose kari kakwa. Amu alya ivavaso liteefo wwo ireko fiwore finya ndi. 9Nań nndekuwara na muu wakwa kuri ilyo mbele kitaare fiifo ivavaso. Kake ifi ivavaso lia lindesha, na ireko likaṛuka, nań nameendewa ufu. 10Nań nalolia sheeli ivavaso fi fiifo amu lishieleke nkie, kwakwa niń lyannde ufu. 11Amu ireko ifi findekooya mwaanya wa ishiwara fikashilemba na ivavaso lia likasheendie ufu. 12Kyasiań ivavaso yeni fikee isongori na filya luvavasie fikee fisongori, foore usumani na usha. 13Kyasia naare? Kilya kikee kinuru kindeshivia ufu kwakwa? Wode! Kake ni ireko fi, amu lilolike na baa sheeli ni ireko yeni lindesheendee ufu kwa shia ya ilya shisha. Na ivavaso lia litevete ireko liṅine five kikasha nnu.
14Kwa ikyo tiishi sheeli mavavaso amilie kwa Mumuyo wa Iṛuva. Kake niń nkee nndu wa mikae ya kiwili nakumbwa nava iketi lya mareko. 15Amu niishi kilya nkee itana ndi. Amu kilya nkikundie nkee ikitana ndi kita kilya nkisule nkyo nkee ikitana. 16Nań nantana kilya ntakifurie kyasia namiirikia sheeli mavavaso mmanuru. 17Na alli nniń nkee itana ikyo ndi, kake ni ukasha lo lushiishue nrimiń. 18Amu niishi sheeli kari kakwa (nkimwi na wifiń wakwa) kikaa-fo kikee kinuru ndi. Amu ikunda kilya kinuru nakunda da, kake itana kilya kikee kinuru nkooyaa ndi. 19Amu kilya kikee kisha nkikundie nkee ikitana ndi kita kilya kikee kikasha ntakifurie nkyo nkee ikitana. 20Kyasia kwakooya kilya ntakikundie nkyo nkee ikitana, nniń nkee ikitana ndi, ni ireko lyo fikee kari kakwa. 21Alli niń mfurie itana kilya kikee kinurru nalolia finya ingi shiini kwakwa ishikabiṛiaa ntani kilya kikee kikasha. 22Amu niirikie mavavaso a Iṛuva na yaaniṛia kunu nrimiń. 23Kake kari ka meeṛo akwa nkee ilolia-fo mavavaso engi awore fira na ivavaso lia lya uṛango lwakwa na ishaaṛua mfungwa wa ivavaso lia lya mareko likee ifo meeṛoń akwa. 24Niń nkee nndu nkiva! Ni i ashitauaa usingeń ilu lwa vvili uu wa ufu? 25Iniva eetikiswa ni ise tikuvavie na Yesu Kristo Nndumi weru! Kyasia kwakooya nkuri, kwa uṛango Iwakwa shi muni nkee iṛundia ivavaso lya Iṛuva, kake wiliń uu wakwa nkee iṛundia nato ivavaso lya mareko.
Currently Selected:
Barua ya Varome 7: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
