Barua ya Varome 9
9
1Nkee irera kya dede nkee na Kristo, nkee irera wongo ndi, na nrima wakwa ukuwore na Mumuyo Nsongori ukee ishirambua 2sheeli noore unari wiingi na mavaviso atakee imanda ngooń yakwa. 3Amu niifuraa niń vve ndenge na ilakaniswa na Kristo, kifo niimakii yeleka vanavamae vakwa vakee va uṛiti lumwi nań, amu valolie ikiṛwa. 4Wwo Vaisiraeli, amu wwo vandesaulwa vave vana va Iṛuva. Na Iṛuva kavaavia witoṛo kalya mma nawo kavaniinga mavavaso alya na windi lwa imwindia na faasa filya. 5Na vakuu valya wawo na ifo kwawo mfo Kristo andeuka kava nndu, yye Iṛuva akee kwa ule ya findo foose eetikiswa miṛeṛe na miṛeṛe. Amen.
6Nta niikai kirero kya Iṛuva kyalakana ndi. Amu nta iwo vamilie kishukuń kya Isiraeli vakee Vaisiraeli va dede woose ndi. 7Ana nta iwo vakee va ufwari lwa Abraamu wana vamwi va dede ndi kita: ”Vana va Isaki wwo vavaangwaa va ufwari lwafo“. 8Misendie ya firero fo yyo ii: Nta wana va vvili vakee vana va Iṛuva ndi kita vana va mma ilya wwo vataalio̱o̱ iva vafwari. 9Amu kirero kya kirekio nkyo iki: ”Kyeeri iki sha alli nshaa lingi na Sara avaa na mwana“. 10Ana nta nkuro da ndi, kake nna kya Rebeka nae ili andekufinga auta kwa ulya umwi, nae nnde yeru Isaki. 11Amu kitaare vana valya vamwi vamiiriwa na kitaare vantana kindo kisha ana kikasha, Iṛuva eensauaa kyamwi kwa mifurie yamwi ye muni, kitave kindo kya miṛundie ya nndu, kake kive kya mifurie ya Iṛuva ya isaua ye muni. 12Amu Rebeka andeio̱: ”Vvele aṛundie mwanawo“. 13Mfo kuro kikee kitisiṛe: ”Yakobo yye nammukunda, kake Esau yye nammusua“.
14Kyasia tikarerań are? Kwa Iṛuva lwifo ureti? Wode! 15Amu aia Mose: ”Ulya nilliliaa nkee illilia, na ulya nkee iwwolia niwwoliaa“. 16Kyasia kwakooya nkuro, nta nkwa finya ya ito afurie ndi ana nta ni ito akee irishia ndi, kake ni ulya aliliaa yye Iṛuva. 17Amu mitisiṛie yarera kiimba kya Farao: ”Kikangio nakusalalisa-wo, naamu nooruse finya takwa kwafo, irina lyakwa likwaniswa urukeń koose“. 18Kyasiań ulya afurie illilia alliliaa, na ulya afurie imwumisa amwumisaa. 19Alli eeba mushiiaa: Naamu ki ili akee iteendań nndu? Amu ni i akee ivingana na mifurie yamwi? 20Iwe mwana wa nndu, iwe kukee i? Kwakaṛia yuṛa Iṛuva? A le a kindo kindeumbwaumbwa kiie ito andekiumbaumba: Nki ili kundeshuumbaumba kuri? 21A mutana le awore muumu wa uteri se, na kyeenga kya uteri atane kiya kimwi kive kya tikisi na kimwi kituṛe tikisi? 22Mfo kuro Iṛuva lla kasa arie imanyisa ituṛuka lyamwi na yorusa imakii lyamwi andelilia ”fiya filya fa ituṛuka“ feemmaa isongosio̱ fireke na isisiria iingi. 23Katana kuro, amu amanyise wiingi lwa unini lwamwi na ”fiya filya fa ililio̱“ andefisongosia kuuka mbele fikooye unini lua. 24Wwo ise andetivaanga, nta vvandu va Vayuda da ndi, na akwaa wayavaṛumu. 25Nsha lia arera kwa kana ka Hosea: ”Vvaangaa vandu vakwa valya vateekee vakwa, na ivaanga nkunde wakwa ito ateekee nkunde wakwa“. 26Lingi: ”Kiviaa andu alya vandeio̱: Ini mukee vandu vakwa ndi, wwo vavaangwaa vana va Iṛuva eefo na muu“. 27Yesaya nae arosia ununga Isiraeli eenumbuaa: ”Itaala lya vana va Isiraeli na akwaa vava sha nsanga wa nruveń, nkyeenga kyawo da kikiaa. 28Amu Nndumi ye afimarisiaa isangeń kwa limwi ili aawutiaa kirero kyamwi“. 29Lingi nsheeli Yesaya abooka irera: ”Kikooye kitaare Nndumi muni matoroto atirea-fo mbeu, tiivaa sha vandu va Sodomu na wakaniswa na vandu va Gomora“.
30Kyasia tireraań are? Nkuri: Vayavaṛumu vataare vandelatia usumani wo vakakooya usumani, ni usumani lua lukee lwa ikusura. 31Kake Vaisiraeli vandelatia usumani veekusuranaa na uvavaso lo weni nta ifikia uvavaso ndi. 32Nkiimba ki? Mfulya kitaare vasoṛa kwa shia ya ikusura, kake nkwa shia ya mitanie. Vakakukaba kwa ule ya iwe lia libaayaa, 33sṅeeli kyatisiṛwa: ”Lla te nanrwaa iwe libaayaa ifo Sion na mbamba utuulaa. Na ulya alikusuraa asukaa ndi“.
Currently Selected:
Barua ya Varome 9: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
