Urambuyo lwa Yohane 8
8
1Ili indefukya kiringisio kilya kya mfungare, iṛuvewu kukasiado do sha kyeenga kya saa.
2Nań nalolia vamalaika valya mfungare vaselele kisanguń kya Iṛuva, nawo vakaniingio mbembe mfungare. 3Na malaika ungi kasha kakuseṛeesa ifo kiraań kya Nndumi arie nungu ya saabu ya ikoṛa fisaamu. Kaniingio fisaamu fiingi, amu afirwaa-fo andu emwi na fiterewo fa vasongori woose kiraań kilya kya saabu kikee mbele ya kifumbi kya unini. 4Na musu wa kisaamu kilya ukarwa mbele ya Iṛuva uuka ukoń lwa malaika ulya andu emwi na fiterewo fa vasongori. 5Na malaika to kaimboo nungu ilya kaiishuṛa muro wa kiraa kaikumba si. Tikava ngova na kiṛuṛumu na fimuli na irerema lya isanga. 6Na vamalaika valya mfungare vawore mbembe tilya mfungare vakakusongosia, amu vakabe.
7Malaika ulya wa mbele kakaba wembe. Akava masaawe na muro usaandisaandi na usao fikaolokia isangeń. Na kyeenga kya kararu kya isanga kikaya na kyeenga kya kararu kya miri kikaya andu emwi na maṛe mashu woose.
8Na malaika ulya wa kavili kakaba wembe. Na kindo kivakani na uro unini lwakie muro kikakumbwa nruveń. Na kyeenga kya kararu kya nruva kikava usao. 9Fikafwa feenga firaru fa findo fitani fikee nruveń fiwore muu, na feenga firaru fa ngalava fikamamia.
10Na malaika ulya wa kararu kakaba wembe. Na nyinyiri nini ikaoloka iṛuvewu ikaaka muro sha taa. Nayo ikawoya feenga firaru fa maṛiko na ngyusookwa ta mura. 11Na irina lya nyinyiri ilya nKivawwo. Na kyeenga kya kararu kya mura kikavava nnu. Na vandu veengi vakafwa kiimba kya mura to, fulya uvavie kuri.
12Na malaika ulya wa kaani kakaba wembe. Na kyeenga kya kararu kya saa kikakabwa na kyeenga kya kararu kya mwiri na kyeenga kya kararu kya nyinyiri. Na feenga fo fili firaru fikava llema, nsanyiń fitamulike kyeenga kyayo, na kio mfo kuro.
13Numa nalla naita ngoru imwi iirumbukaa karikari ka iṛuvewu iireraa na ununga unini: Ushi, ushi, ushi iwo valele isangeń kiimba kya ngyununga to tiseere ta mbembe ta vamalaika valya vararu vakusongosie ikaba.
Currently Selected:
Urambuyo lwa Yohane 8: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
