Urambuyo lwa Yohane 7
7
1Numa ya ifo nalolia vamalaika vaani vaselele ifo mbembeń tilya iinyi ta isanga veeimaa mburaato tilya iinyi ta isanga, amu mburaato itavivite isangeń ana nruveń ana kundo kuwore miri. 2Lingi nalolia malaika ungi eeukaa taari ya kisengeṛo arie kiringisio kya Iṛuva eefo na muu. Kavaangia na ununga unini vamalaika valya vaani valya veekee varambikie finya ya ireta isanga na nruva. 3Kavaia: Manya mutarete isanga na nruva ana miri, kumande timarisiaa irwaya maketi a Iṛuva weru kiringisio ifo kisanguń kyawo. 4Llyo nndeita itaala lyawo valya veekee varwaye kiringisio va ngyufwari ta vana va Isiraeli. Nawo veekee fiku iyana limwi na fiku makumi aani na fiinyi. 5Valya veekee varwaye kiringisio wwo iva: Va ufwari lwa Yuda veekee fiku ikumi na fivili, va ufwari lwa Ruben mfiku ikumi na fivili, va ufwari lwa Gadi mfiku ikumi na fivili, 6va ufwari lwa Aseri mfiku ikumi na fivili, va ufwari lwa Nafutali mfiku ikumi na fivili, va ufwari lwa Manase mfiku ikumi na fivili, 7va ufwari lwa Simeon mfiku ikumi na fivili, va ufwari lwa Levi mfiku ikumi na fivili, va ufwari lwa Isakari mfiku ikumi na fivili, 8va ufwari lwa Sabulon mfiku ikumi na fivili, va ufwari lwa Yosefu mfiku ikumi na fivili na va ufwari lwa Benyamin mfiku ikumi na fivili.
9Numa nndeshewa mmyorusie: Nndelolia ikusandio inini litamakii itaalwa ni nndu lya ngyuṛiti toose ta makanika woose na ta ngyufwari toose na mirerie yoose. Veeselelee mbele ya kifumbi kya kimangi na mbele ya ngarina ii vvavike miseto myeelwa, veeworee maṛamba a maangashi na maako awo. 10Nawo vakarosa ununga unini veenumbuaa: Ikiṛwa llya Iṛuva weru akee kifumbiń kya kimangi na lya ngarina ii. 11Na vamalaika woose vakasalala-wo veelengetiaa kifumbi kya kimangi na vasuṛi valya na makindo alya aani. Llyo vandewa na si na fisangu fawo mbele ya kifumbi kya kimangi vakaindia Iṛuva veenumbuaa: 12Amen! Tikisi na unini na uṛango na waanu na windi na imakii na finya mfa Iṛuva weru miṛeṛe na miṛeṛe uteefo mmando! Amen.
13Umwi wa vasuṛi valya kashuuṛa eenumbuaa: Iva vaṛee miseto myeelwa wwo va ki? Nawo vaukie kwi? 14Nań namwia: Nndumi wakwa, ni iwe kwishi. Nae kashiia: Iva wwo vandeuka ngyukiveń tilya nini, nawo vakasangya miseto yawo vakaiilisa na usao lwa ngarina ii. 15Kwa ikyo vakee mbele ya kifumbi kya Iṛuva, nawo vakee indundia kio na nsanyiń ifo numbeń yamwi. Na ito akee kifumbiń kya umangi aruaa kwawo. 16Vakiliwaa lingi nsoto ana nnyura ndi. Ana saa ivele na finya ikivavavisaa ndi ana mui ukivalyaa ndi. 17Fulya ngarina ii ikee kifumbiń ifo kari ivaisaa kisha na ivanisia sookweń ta mura unnde muu. Na Iṛuva avaanguaa masoru oose misoń awo.
Currently Selected:
Urambuyo lwa Yohane 7: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
