Urambuyo lwa Yohane 9
9
1Na malaika ulya wa karaanu kakaba wembe. Nalolia nyinyiri yukie iṛuvewu ikee shoolotie isangeń. Nayo ikaniingio ufunguo lwa irua kyolokio kya kundo kwa si. 2Ikarua kyolokio kya kundo kwa si. Ukarwa musu uuka kyolokioń sha musu wa iriko inini. Na saa na ringewu fikava llema kiimba kya imusu lia lya kyolokio. 3Na imusuń lia tikasomuka-fo nrie tikasha isangeń. Nato tikaniingwa finya sha ya nguluva tikee isangeń. 4Tikaio̱ manya titakasheese maṛe ana kindo kyoose kikee kishu ana nta nri umwi kita vandu valya vatawore kiringisio kya Iṛuva ifo fisanguń fawo. 5Lingi tikavavaswa kaaṛa titavawaa, kake valiswa ukiva miiri iraanu. Na mavaviso wo eevakanii na a nguluva ili yaimara nndu. 6Na mikonu ilya vandu vaṛuyaa ufu vatalulolie. Nawo valangaa ifwa, nalo ufu luvarishaa. 7Na nrie to tiifwanii farasi tikee shisongosie ta yenda fireń. Na ifo mirweń yayo fiifoo findo fifwani ngyuṛeto ta saabu, na fisangu fayo fikee sha fa vandu. 8Nato tiiworee mafuli sha mafuli a vaka. Na mayoo ayo eekee sha mayoo a miiso. 9Nato tiiṛee firinga mbafu sha firinga fa minya. Na kiṛuṛumu kya maaro ayo kikee sha kiṛuṛumu kya magari a farasi shiingi tiirishiaa ree fireń. 10Nato toore mikia na miinga sha nguluva, na finya tayo ta ikasheesa vandu miiri iraanu ikee kari ka mikia yayo. 11Tiwore mangi yayo, nae mmalaika wa kundo kulya kwa si. Irina lyamwi kiebrania ni Abadon na kigiriki ni Apolion. 12Ushi lwa mbele lwamma iira. Lla te tiseere-fo ngyushi ivili tishaa numa.
13Na malaika ulya wa karindaru kakaba wembe. Naita ununga luukie mbembeń tilya iinyi ta kiraa kya irasia kya saabu kikee mbele ya Iṛuva. 14Lukaia malaika ulya wa karindaru awore wembe lu: Boṛomua vamalaika valya vaani vakee vafinge ifo mbaai ya mura ulya nnini wa Eufurati. 15Vamalaika valya vaani vakaboṛomulwa veekee vadeeṛie saa na nkonu na mwiri na mwaka, amu vawaa kyeenga kya kararu kya vandu. 16Na itaala lya vaseṛo va fira vakaya farasi liikee fiku makumi avili ka fiku ikumi. Llyo itaala lyawo nndeita. 17Kuro mfo nndelolia farasi to ifo myorusień yakwa, na iwo veetikayee vaṛee firinga mbafu sha fa muro na fingi mfuu na fingi fifuukie. Na mirwe ya farasi to nsha mirwe ya miiso. Na ifo kaniń kayo ukee isomuka-fo muro na musu na saiye ya ifiṛa uṛoo. 18Feenga firaru fa vandu vakawalwa mmikabie yo iraru ya muro to na musu to na saiye yo fuukie kaniń kayo. 19Amu finya ta farasi to tikee kaniń kayo na mikień yayo. Amu mikia yayo ivakani na shoka, nayo yoore mirwe, nayo yyo tikee ikasheesa nayo. 20Na vandu valya vandesaa kitaare vandewalwa ni ikabwa lyo nta vandekurra kya mashoṛa alya a maako awo ndi, nta vandetia-wo irasia vaṛumu ndi na fwana ta saabu na fesa na ta minya na ta mawe na firi Atamakii ilolia ana iita ana yenda. 21Nta ikulakanisa na iwaa lyawo ana usavi lwawo ana waaisi lwawo ana unini lwawo.
Currently Selected:
Urambuyo lwa Yohane 9: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
