Barua ya Vaebrania 4
4
1Kyasia ifi kirekio kilya kya yaaka andu a kiimuyo kyamwi kikiifo da, tikusaṛe iki na weṛei, amu atalolike umwi wanu akituṛaa. 2Amu nkya dede na akwaa ni ise tankwanisio̱ nrumi ya mboni shisha shawo. Kake kirero kilya kindeitiwa kindevaeleka ndi, fulya kitaare kindekusanda na ikusura lyawo. 3Amu ise ili tikee vandu vakusurie taakaa kiimuyoń kyo, sheeli Iṛuva anderera: ”Nndelya ikite niituṛukaa sheeli: Vaakaa deń kiimuyoń kyakwa ndi“, lla kasa Iṛuva eemmaa mashoṛa amwi a itana foose kuuka isanga liwevio̱. 4Fulya Iṛuva awore andu arerie kya nkonu wa mfungare kuri: ”Nkonu wa mfungare Iṛuva eemuya mashoṛa amwi woose“. 5Na ia na-wo arerie: ”Nta vaakaa kiimuyoń kyakwa ndi“. 6Kyasia kirero ki kikee imanyisa sheeli mwaanya usaiye wa vandu kiindi vaakaa-fo, kake valya vandebooka ikwanisio̱ nrumi shisha wo vandelemwa yaaka kiimba kya ilea lyawo. 7Neeli indemaa iira myaka miingi nnu, Iṛuva karwaa-fo nkonu ungi — nto uu akee yuvaanga ”wa nnu“ —eereraa kwa kana ka Davidi sha lia arera mbele: ”Nnu mukamiita ununga lwamwi, manya mutaumise ngoo tanu“. 8Amu kikooye Yosua eevvafitaa kiimuyoń kilya, Iṛuva eekisendaa nkonu ungi ukee numa ndi. 9Kyasia kiifo kiimuyo kya vandu va Iṛuva kifisio̱. 10Amu ulya amaaka kiimuyoń kyamwi eemuya mashoṛa amwi, sheeli Iṛuva nae andeimuya mashoṛa amwi.
11Kyasia titanie utomari taake kiimuyoń kyo, amu atalolike nta nndu umwi awaa eelatiaa miloshie ilya ya valya vandelea. 12Amu kirero kya Iṛuva kiwore muu, lingi kiwore finya, lingi kiwore uvave kita shombo shooi kuvili. Lingi kitotaa na yaava nrima na ngoo na meeṛo na miingo ikee kari kayo. Lingi nkyaangu na yelelia makusaṛo na mifurie ya nrima. 13Ana nta kiifo kindo kitane kitakee na baa mbele ya Iṛuva ndi, kake findo foose fikworusie na baa mbele ya miso amwi ito tiuṛwaa yye.
14Kyasia toore nrasia weru nnini akilie vengi anderwa iṛuvewu yye Yesu Mwana wa Iṛuva, kwa ikyo tikuware nnu na inrambua lyeru. 15Fulya titawore nrasia nnini atamakii ivavio̱ mmuu kya ngyutanyaṛi teru, kake andeelelio̱ findoń foose sheese, nta ivingwa mmareko. 16Kyasia ndefoń teende kifumbiń kya uwoo lwamwi na ifura, amu taavio̱-wo ililia na uwoo kyeeri tuuṛi yelekio̱.
Currently Selected:
Barua ya Vaebrania 4: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
