Barua ya Vaebrania 11
11
1Kyasia ikusura Iṛuva ni iverea filya fishaa kitaare kuwore inunua, fulya kitaare fallolika. 2Amu kwa ikyo vakuuku veru vanderambuywa. 3Ni ikusura lyatimanyisa sheeli isanga li lindetanwa nkirero kya Iṛuva, na kilya kilolio̱ na miso kimilie findoń filolio̱ ndi. 4Ni ikusura Abeli andeutia nalyo Iṛuva nsimbika ukee nnuru kita ulya wa Kain. Karambulwa sheeli ni nsumani. Na Iṛuva muni karambua nsimbika wamwi. Na kwa ikyo lla kasa amfwe akiseere akee irera. 5Ni ikusura Enoki asamiswa atalolie ufu ana nta andekilolika lingi isangeń ndi, fulya ni Iṛuva andensamisa. Amu kitaare andesamiswa karambulwa sheeli asenye Iṛuva. 6Kake kitaare ni ikusura kivaa isenya Iṛuva ndi. Amu nndu aserikiaa Iṛuva kyawara akusure sheeli ye eefo na sheeli ataa valya vakee induya. 7Ni ikusura lindeitika Noe ili andemaa iikimbwa ni Iṛuva kya findo filya fiseere kitaare fallolika, kasongosia isanduku lia inini, amu akiṛe valya va numba yamwi. Na kwa ikyo kaumisia isanga eekuwaraa na ikusura lyo kava muya diṅu ya usumani ikooikaa na ikusura.
8Ni ikusura lindekangia Abraamu airikie ili andevaangwa asamie urukeń luwie diṅu. Kasama ateeshi andu eendaa. 9Ni ikusura lindenteveta kakusamisia urukeń lua lwa kirekio sheeli akee mwini eekaa maemiń andu emwi na Isaki na Yakobo vakee vaya diṅu ilya andu emwi nae. 10Amu eekee iverea muṛi utavaa iburua, amu ntana wayo ni Iṛuva. 11Ni ikusura na akwaa nSara muni andeniingwa nalyo finya ya ikufinga lla kasa eemmaa mikonu yamwi, fulya ande-kusaṛia sheeli ulya andenrekia wwa ikusurwa. 12Na kiimba kya ikyo kishuku kikairiwa ni nndu ulya umwi, nae eekee sha alemwa iira, kikaingifwa sha nyinyiri ta iṛuvewu na sha nsanga ukee mbaai ya nruva utavaa itaala. 13Iva woose vandefwa veekaa na ikusura kitaare vamaawutio̱ firekio filya. Kake vakafilolia fikee kwaasha na ifaaniṛia veerambuaa, sheeli vakee veeni na va ikwiria kunu isa-ngeń. 14Amu iwo vakee irera firero sha ifo vakee imanyisa baa sheeli vakee iṛuya uruka lwawo lwa kyeń veni. 15Kifo veekumbuaa uruka lua vandesama, veekooyaa mwaanya yuya. 16Kake alli valangie uruka lukee unuru kita lua, llo lwa iṛuvewu. Kwa ikyo Iṛuva awore sonu ivaangwa Iṛuva wawo ndi, amu awatania muṛi.
17Ni ikusura lindeeleka Abraamu lia andeelelio̱ ni Iṛuva aniingie Isaki ave kirasio, nae eekee mwana wamwi wa ngitani. 18Nae eemmaa iwaria firekio filya anderekio̱ sheeli: ”Va Isaki wwo vavaangwaa va ufwari lwafo“. 19Nae kakusura sheeli Iṛuva amakii iṛuta nndu kwa vafu. Nkyo andewwiiṛio̱ ave myorusie (ya iṛuka lya Yesu akee ngitani). 20Ni ikusura lindeteveta Isaki kaniinga Yakobo na Esau mboṛa, na akwaa yya findo fishaa numa. 21Ni ikusura lindetomarisa Yakobo ili andefika kufui na ifwa kaniinga vana valya vavili va Yosefu mboṛa kavaterevia akwinyamiṛi na nsengye wamwi. 22Ni ikusura lindekangia Yosefu ili andefikia kufui na ufu lwamwi kasenda mboni ta isama lya vana va Isiraeli kavavasa kya mafua amwi.
23Ni ikusura lindeteveta vasuṛi va Mose ili vandeirio̱ mmwana ulya vamfise miiri iraru, fulya valolia unuru lwa mwana ana nta vaeṛea ivavaso lia lya mangi ndi. 24Ni ikusura lindeitika Mose ili aṅina kalea ivaangwa mwana wa mfu wa Farao. 25Kasaua ituṛulwa andu emwi na vandu va Iṛuva kita ifura lyukie marekoń. 26Amu akusaṛa kuro: Iteendwa kiimba kya Kristo ni usimba lukilie masaa woose a Misiri, fulya andelanga maṛe a kwa Iṛuva. 27Ni ikusura lindensomuta kulya Misiri nta yeṛea uvaave lwa mangi, amu andekuwara na ulya atalolio̱ sheeli allolie. 28Kiimba kya ikusura Iṛuva kasongosia Pasaka na yaamba mboshi ta myaango usao, amu ulya aretaa uvele atarete uvele lwa Vaisiraeli. 29Kiimba kya ikusura Iṛuva vakaira nruveń ilya itondoṛie sha andu aumu. Na Vamisiri ili vandeelelia vakamiṛwa mmura. 30Ni ikusura lindefukya-fukya muṛi ulya wa Yeriko, ili undemaa ilengetio̱ mikonu mfungare. 31Ni ikusura lindeima Raabu ulya eeretwaa andu emwi na valya valea iirikia Iṛuva lla kasa eekee nka mwaaisi, fulya awaria vandu valya va saa na unambwe.
32Nanumbua are lingi? Amu feeri fifilaa ndi, kikooye niiongoyaa mboni ta Gideon na ta Baraka na ta Samuson na ta Yefita na ta Davidi na ta Samweli na ta vaauya fisuku valya. 33Iwo kiimba kya ikusura Iṛuva vandekabana na mamangi vakaavinga vakatana kisumani vakakooya filya finderekio̱ vakaraya kana ka miiso. 34Vakawaa miro ikee yaka na finya vakakia ikabwa na shombo. Na ili vave vatanyaṛi vakaniingwa finya lingi vakava vavaave fireń vakaumbuta syamu toose ta misa. 35Vaka vakawiiṛio̱ lingi valya vandevafiya veeṛukaa. Kake vengi vakaliswa ukiva na ituṛulwa vakalea iboṛomulwa vakooye iṛuka likee isha kita ilyo. 36Vengi vakaelelio̱ na iteendwa na ikabwa. Vengi vakaavikwa na mise na irawa kifingioń. 37Vengi vakakabwa na iwalwa na mawe na ivaṛwa na misemenu na vengi vakawalwa na faandu. Vakaṛaaṛaa kundo koose vaṛee masaṛa a maanri na a savana da vaworwa nsoto na ivaviswa mfikasha filya vandetanio̱. 38Dede isanga livasumani ndi. Vakanyanyaka veeovaa bateń na ngyuroń na ngyuaangeń na mariniń ifo uteriń. 39Na iva woose lla kasa vandeirikio̱ nnu kiimba kya ikusura lyawo, kake nta valolia sheeli kirekio kilya kyamfika ndi. 40Fulya Iṛuva andetideeṛia kindo kikee kisha kilanya sheeli: Wo vatakooye yawutio̱ kita andu emwi neese.
Currently Selected:
Barua ya Vaebrania 11: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
