Barua ya Vaebrania 10
10
1Kyasia uvavaso lukee kiṛishwe kya fisha filya fishaa ana nta mfwana sheni ya findo fo ndi. Na firasio filya fikee iniingio̱ myaka yoose ilungani nta kyeeri kimwi fimakii isongovisa valya vafirambikia ndi. 2Kwakooya nkuro, firasio filya fiitio̱o̱ iniingio̱ ndi? Amu valya vakee ifirambikia vakammaa iiliswa kwa limwi veekikuloliaa se sheeli vakiwore mareko ndi? 3Kake firasio fo fikee ikumburusa vandu mareko myaka yoose. 4Amu usao lwa shawu ana lwa oṛo luwore finya ya yuta mareko ndi. 5Kwa ikyo ye (ni Yesu akee Mesia) ili andesha isangeń kanumbua: ”Misimbika na firasio kukundie ndi, kake kwanshisongosia wili. 6Misimbika ya iwolisa mareko findekusenya ndi. 7Llyo nndenumbua: Lla nasha — kyakwa ntisiṛio̱ kitabuń kilya kinini — niirikie mifurie yafo wui Iṛuva“. 8Mbooko arera: ”Numbe na shoonga ta irasia na numbe ta yokywa ta irasa na miniingie ya iwolisa mareko kundekunda ana nta kundesenywa mfo ndi“, lla kasa fikee iniingio̱ kwa uvavaso. 9Kae-ngeṛia inumbua: ”Lla nasha niirikie mifurie yafo“. Kauta-wo kilya kya mbele, amu aseṛeese kilya kya kavili. 10Kiimba kya mifurie yo ya Iṛuva tindekooya iiliswa kwa limwi nakyo kikava na iniingio̱ lya wili wa Yesu Kristo.
11Na nkohani woose akee isalala oo nkonu eerasaa na iniingia misimbika ilya mikonu tiṛi, nayo kitaare imakii deń yuta mareko. 12Kake uu ili andemaa yuta nsimbika umwi nsi kiimba kya mareko ukaa miṛeṛe kakaa rembo uko usha lwa Iṛuva. 13Kuuka io akee ivera kumande fituva famwi firawaa kwa si ya marende amwi. 14Amu valya valanga iiliswa andevasongovisa na nsimbika umwi nsi ukaa miṛeṛe. 15Na Mumuyo Nsongori nae akee itirambuya, amu ili andemaa inumbua: 16”Ii yyo mma llyaa nawo mikonu ilya ya-nsia“, Nndumi kaengeṛia irera: ”Nrwaa mavavaso akwa mirimiń yawo, na makusaṛoń awo naatisiṛaa. 17Na mareko awo na ukasha lwawo nkikumbuaa lingi ndi“. 18Kake alya ifi fammaa itio̱, wwo ukiifo nsimbika kiimba kya mareko lingi ndi.
19Kyasia vanavama, ukyesi lweru toore llo ilu: Toore shia ya yaaka andu asongori, ni usao lwa Yesu. 20Yyo shia andetiremia ikee shiiya yoore muu. Amu kilya kindetiima tiiraa na andu alya asongori — (llyo isulia lia inini) — kyamiimbolo yye. Muu wamwi andeuniingia nto wanrua shia ii. 21Neeli toore nkohani nnini akee ishilia numba ya Iṛuva, 22kyasia tinserikie na ngoo ta warutu toore finya ya inkusura. Amu tamuutwa mikaeń ilya ya mbele tiifwalio̱o̱ mirima yeru na isangywa mivili yeru na mura nsha (ubatisoń). 23Manya titaaraa irambua iverea lyeru, amu ulya andetiniinga kirekio ki wwa mma. 24Lingi tiringane ti veni na ti veni, amu fikuware na ikundana na mitanie minuru. 25Manya titakufukye na makusandio eru, sheeli mmiishivie ya vengi. Kake tikwikimbe na ikutomarisa. Titane kuri, fulya mulolie sheeli nkonu ulya wa isha lya Yesu wansha kufui.
26Amu kwakooya tammaa imanya kilya kikee kya dede tikauyana lingi na fikasha kya usanduru, ukikaa-fo lingi nsimbika wa yuta mareko ndi, 27kita ivera uumisio lushaa lwa yeṛeese na uvave lwa muro luwoyaa vabiṛa valya. 28Nndu woose akasheesa uvavaso lwa Mose awalwa liteefo ililia, kwakooya veefo vandu vavili ana vararu varambua ukasha lwamwi. 29Mukusaṛie are? Kyawara se nndu to anruma Mwana wa Iṛuva akooye uumisio lwa mmwasi na itaalio̱ usao lua lwa mma andeiliswa nalo sheeli kitakee kindo na itavania Mumuyo munnde uwoo? 30Amu tiishi ulya anumbua: ”Yuṛa kimini mmashoṛa akwa, nniń ntaa sile“. Kikarerwa lingi: ”Nndumi yye aumisiaa vandu vamwi“. 31Nkindo kya yeṛeese iwa maakoń a Iṛuva eefo na muu.
32Kumbueń mikonu ilya ya mbele lia mundemulikwa mukasisiria ivingana inini lya mavaviso. 33Mikonu ingi mundeniingio̱ mu veni illwa vvandu mwirumwaa andu emwi na ivaviswa. Mikonu ingi mundella vaaroe vanu veetanio̱o̱ kuro. 34Amu valya vandefingwa mundelya ukiva andu emwi. Neeli mundesokwa filya mukee nafo, mukairikia na ifura mwimanyaa sheeli moore fuvavikilie kilya kikee kinuru, fulya itataṛaakuu.
35Kyasia manya mutakumbe iverea lyanu muveree nalyo, amu liwore maṛe meengi. 36Kake kyamuwara muve vandu va ulalamboo, amu mutane mifurie ilya Iṛuva akundie na iwaria wavi lua mwee-Ilurekio̱o̱. 37Amu ”Kiseere kinnya nnu Ilyo ulya akee isha ashaa ana nta asindaa ndi. 38Na nsumani wakwa awaraa muu kiimba kya ishikusura. Kake ulya auyauyaa na numa asenyaa nrima wakwa ndi”. 39Kake ise tikee kari ka valya vauyauyaa na numa na ireka ndi, kake tikee kari ka valya vakusuraa tikiṛe mirima yeru.
Currently Selected:
Barua ya Vaebrania 10: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
