Barua ya Vaebrania 12
12
1Kyasia kiimba kya ili tilengetio̱ warambua mamwiingi kikava sheeli iṛumbe litilengetiaa, tiburue-wo foose fiteemie tiikulakanisaa na malomi iva atiwore. Na iimboo tiimboo fira yeru tikee iivavasio̱ tisisiriaa. 2Tille Yesu uu andetibookia ikusura, lingi yye aliawutiaa. Ye andu a ifura liikee ideeṛie live uvingo lwamwi kakurika nsalaba wa indefiya kaeeṛa usutu mungo. Numa kakaa rembo taari ya uko usha lwa kifumbi kya Iṛuva. 3Kumbueń uu andesisiria kuro ili andevinwa warekwa, amu mutatanyaṛike mirima ana ilembwa.
4Amu ngabanuń yanu ya ikabana na mareko nta mwamfikia iwalwa ana iiritwa usao ndi. 5Lingi mwanrekio̱ wikimbi lua lureraa neeni sha vana: ”Mwana wakwa, manya kutaile iseṛeeswa ni Nndumi ana manya yuta ba ili kwakandarwa yye. 6Amu ulya Nndumi artkundie, yye anseṛeesaa na ikaba mwana ulya woose awwaria ave wamwi. 7Sisirień mwiseṛeeswaa. Iṛuva akee imutania sha vana. Amu mmwana ungau ndee atankabaa? 8Kake kwakooya mutaseṛeeswa sheeli vengi woose vakee itanio̱, mukee vana va maketi, ana nta mukee vana vaya diṅu ndi. 9Na andu emwi na ifo tiikee na vaande yeru va kivvili vakee itiseṛeesa neese tikavaindia, kyasia kyatiwara se kya mmwasi ikaa kwa si ya Nde wa mirima yeru na ikooya muu? 10Amu nkya dede iwo vandetifunda kyeeri kyaangu sheeli vandelolia veni nkinuru, kake ye akee itiseṛeesa kiimba kya itisongosia, amu tifikie usongori lwamwi. 11Iseṛeeswa lyoose ili liifo lilolikaa sheeli nkindo kya ifura ndi, kake llya ukiva. Kake numa lyendee iwo vandefundwa nalyo usumani na unambwe.
12Kwa ikyo kaariseń maako akee matanyaṛi na nri titaare finya. 13Na marende anu muasongosie shia shisaaṛi, amu valya va siṛi vakee vatanyaṛi ana veeṅana vatarete shia ya dede, kake vashie. 14Ruyeń utomari lwa iva na unambwe na vandu woose na usongovisi; amu nta nndu umwi aloliaa Nndumi kitaare aluwore. 15Lleń nnu nndu ataanguywa ni uwoo lwa Iṛuva. Manya ”nrarii wa kivawwo“ utamie na imutuṛua, na vandu vengi vataniingwa ukasha ni ikyo. 16Manya atakaa-fo mwaaisi ana mubiṛa Iṛuva sha Esau andekunda diṅu yamwi ya uvele kiimba kya imutu limwi. 17Amu mwishi sheeli na akwaa ni ili andetiṅwa numa irwaa mboṛa ilya, andeleeka (amu andekooya mwaanya wa yaṛuka nrima ndi), lla kasa andeṛuya na masoru.
18Amu nta mundefikia uro lwa ibaaya lwikee yaka muro ana iṛumbe yuu na llema na mburaato 19na kiiyo kya mbembe na ununga lwa firero. Amu valya vandeita vakatereva vataio̱ nta kirero kingi, 20amu nta vandemakii isisiria kirero kilya kindevavaswa ndi sheeli: ”Na akwaa ni ifisi libaayaa uro lo likabwa na mawe lifwe“. 21Na ifo ili findelolika sheeli mfa yeṛeese na akwaa mMose kanumbua: ”Nawarwa wweṛei na irerema“. 22Kake ini mwanserikia uro lwa Sion na muṛi wa Iṛuva muni muu, nto Yerusalemu ya iṛuvewu, na iserikia isyamu lya vamalaika fiku fiingi 23na nkwanio nnini wa siṛi ya vavele vakee vatisiṛe iṛuvewu mukaserikia na Iṛuva mwumisia vandu woose na mirima ya vandu vasumani vakee vaawutie 24mukaserikia na Yesu munnde mma ilya shiiya na usao lua lwa ifwalia lureraa kisumani kita lua lwa Abeli.
25Lleń mutalee ulya akee irera neeni. Amu kwakooya valya kitaare vandemakii ikia, ili vandelea ulya andekumanyisa kwawo kunu isangeń, kya mmwasi nnu ise tikiaa tikankwava nae mutiikimba akee iṛuvewu ndi. 26Amu ununga lwamwi lundereremisa isanga kyeeri kilya. Kake alli anrekia eenumbuaa: ”Llimwi lingi nreremisaa isanga da ndi, kake nna iṛuvewu deń“. 27Kake kirero kilya ”limwi lingi“ kikee irambua, sheeli filya fivaa ireremiswa fiilashikaa, fulya mfindo fitane, amu findo fitavaa ireremiswa fikaa. 28Kyasia ili tikee iwaria umangi lutavaa ireremiswa, taane Iṛuva tiindundiaa mashoṛa ansenye tiworwa ni ukunyiisi na windi. 29Amu Iṛuva weru mmuro ulyaa na imaa.
Currently Selected:
Barua ya Vaebrania 12: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
