ISAYA 41

Iruva akureekya Israeli

1Malallyeny mbee yakwa eni vandu va mbaambaa ya uruka naambo vamasanga vawone finya shiiya; vashe kufii varere naambo shivaniinge uleti. 2A mmbi aleinwa umwi uka taari ya ngama, ulya alevaangwa kasha marendeny akwe kimaruma kya usumanu? Kanniingya umangyi nashillye na ivamamita na usu lwakwe vave sha kiluulyi na muulu uvivitwaa ni uraato mbee yakwe. 3Kavaikyimba vakaira kyipwa. Marende akwe nta nnyapanaa sumbai-fo. 4A mmbi alemmidima itana indo? Mmbi alevaanga ngyeeri shoose ukya elyo mapookyony? Ni yeny, Nndumi Iruva, shikee wa mbee, mapookyony na llung'anu, yeny mmbwe.

5Mbaambaa ya yeeve valelollya vakairyaa; ufishony lwa ulana lukarerema, vakaserikya vakasha kufii. 6Wo umwi keekya ungyi enkarisaa eshambaa, “Kaarya, kulairyeefo.” 7Nseremala kakaarisa mwitana findo fya saabu, na ulya mfuru wa minya kakaarisa mwifukuta emmbyaa, mashora afo ni mesha nnu, nawe kainangisa na misumari ilaringine.

8Neewe Israeli, ishinga lyakwa, Yakobo shilekusauwa, mwana wa Abrahamu, mbuya yakwa. 9Ni yewe shilekutira ukya masiyyony a ulana shikuviaa, “Yewe ni ishinga lyakwa shilekusauwa nta nshikuraafo.” 10Kulairyee mashika yeny shikee ando amwi neewe, kulasavae, mashika yeny ni Iruva wafo. Shikuniingaa finya, eeda, shikwekyaa, ee shikutiraa na woko lwakwa usha lutiri wiidimi.

11Lolate, woose valetirwa unyafi kimaruma kyafo vashewoo na isuka, valya vakwesaa neewe nta nkushevalollyaafo, mmbashemamikaa. 12Kusheruuya yewo vekabana neewe nta nkushevalollyaafo; mmbo vashemamitwaa vave nshi kindo-fo. 13Mashika yeny Nndumi Iruva, Iruva wafo shikutiraa woko lwafo usha shikuviaa, “Kulairyee, Yeny shikwekyaa.”

14Kulairyee Yakobo kukee sha ikuru, neeni vandu va Israeli, yeny nshamweekyaa, “Ni Nndumi Iruva aamba; na nkira vafo ni mweele wa Israeli. 15Lolate, shishekwalwaa kisha kyaami kiiya kya isa; kitiri mayoo, kusese mafumbu na iamamita nave sha muulu. 16Kusheveela, na uraato luvavite, lushevanyanyata, neewe kushefura kya Nndumi Iruva, kusherumisha mweele va Israeli.

17“Ngwera na vaturi vakeruuya mura, nawo mmbakewonisa-fo; ngyulumi tavo mmbo tamuuma pony. Yeny Nndumi Iruva shishevaaranyaa, Yeny Iruva wa Israeli nshishevara-fo. 18Shisheruyaa mira yuuka efo mafumbuny na ngyusoka nnang'ani a mamungo, shishealashaa ando oomu pony ave maruva na ando asheekaa mira. 19Shishemiisaa ando oomu mieresi, nshita mhadasi na miri ya mafura. Efo kasa shishemiisa fisile mtidhari na mteashuri. 20Naambo valollye, vamanye, vakusare na iitumuso sheelyi woko lwa Nndumi Iruva lwatana indo. Mweele wa Israeli mmbwe atannyi fyoose.”

Nndumi Iruva amina maruva a wongo

21“Oshony, endeny marero any, Nndumi Iruva aamba, Veseny na ngeta, Mmangyi Yakobo aamba”. 22Vakabe weele vaambe na iluvia mbony tishaa, luore na filya filemmaa iira ni mbony ta ngata kyi lutimanyi na nshusshwa iitumuso ufishyony lwa vayo awo valuvie fya fishaa numa. 23Luvieny efyo fishaa numa naambo neese lumanyi dede yeni ni maruva a dede a kyetaniny mesha ao makasha naambo lwereye na isaukwa. 24Lolente eni mmukee ruu parany na mashora any nruu, eto alemusauwa ni nravi. 25Shileinwa nndu taari ya ndoo nawe ansha, ukya ifuma lya kyeendesa ansha asendaa irina lyakwa nawe ashevavaraa vamangyi sha iposhi. 26A mmbi alekureekya mbony eti ukya mapookyony naambo lusongwe imanya kasha lwaambe, “We ni wa dede?” Ee-da, nkwiifo umwi alekureekya-fo. Nta umwi alevambisa nta umwi aleita marero any-fo. 27Yeny mbele mmbo shakureekya Sioni; na shiniinge Yerusalemu mwivambisa rumi ya nsia. 28Na shallollya nkwiifo nndu, nnang'ani ya vandu yewo nkwiifo nsongoru umwi shimmbesa naidime ishirouwa-fo 29Naasa woose ni ruu parany. Mafwanu awo nshi kindo-fo, ni urumato na tangalu.

Currently Selected:

ISAYA 41: MAS2

Highlight

Copy

Compare