ISAYA 40

Marero a iviirya muu

1Viireny vandu vakwa muu,

viireny vandu vakwa muu.

2Rereny na Yerusalemu kwa ufoo vavyeny sheelyi

ushinga lwakwe lwammisya,

uravi lwakwe lwamfwaayo

ni elyi ammbwarya kyuuka kwa Nndumi Iruva

ngapo tiilanyi uravi lwakwe loose.

3Aranyiny ni nndu ashonisaa unyanga kulya kasa koomu ashambaa;

“Deesyeny shia ya Nndumi,

oroteny miko yakwe.

4Wo imungo lyeeremutwa

na wo ifumbu lyishefwa-fwalwa;

na alya kwevekye kusheorotwaa;

na alya kutefusu kusheeremutwaa.

5Na usuri lwa Nndumi Iruva lusheorwaa paa,

na woose veefo na muu vashelollya

kimmba kana kya Nndumi Iruva kyarera mbony eti.”

6Aranya ni unyanga lwa nndu lweetio eshambaa;

“Ilya, shaamba, ‘Shaiya kimaruma kyeekyi?’”

Woose veefo na muu nsha mare da

na usuri lwa vayo loose nsha kivaro.

7Mare ashuumaa, na fivaro finaa

kimaruma kya elyi mumuyo wa Nndumi Iruva waira uwe ya vayo,

kya dede vandu eva nsha mare da.

8Mare ashuumaa, na fivaro finaa,

kya indi irero lya Nndumi Iruva llisalalaa llung'anu.

9Ewe kukee yaamba nrumi shisha ya nsia efo Sioni,

saama uwe ya ifumbu lyaasha,

Yewe kukee yaamba nrumi ya nsia Yerusalemu,

loota unyanga nnu

loota unyanga nta kulairyeefo,

via miri ya Yuda:

“Loleny Nndumi Iruva waany!”

10Loleny, Nndumi Iruva waany ashaa na ukaari,

na woko lwakwe ni ushilyi.

Ashaa nataiye kya usumanu.

11Ashiisaa ironda lyakwe sha mwiisi asanyirye mburu takwe maakony akwe, navavike ng'undeny takwe, na tilya tikeota vana tisheteterwa kwa waarya.

Israeli na Iruva

12A ndesa ni vi alemmiidima yeesa mura na woko lwakwe naakwa ni yeesa kiluulyi naakwa ni mafu? 13A ndesa ni vi aleruma mumuyo wa Nndumi Iruva, na iulosha aye nteteri wakwe? 14A nnyalefisha kyama navi, na mmbowi alenlosha shia ya uvingo kanniinga urango lwa imoora namanyi iitumuso? 15Lola, vandu va masanga nsha irony lya mura efo ndoony, nsha kiluulyi kisiise efo meseny ya eesya findo. Lolate, we aidima ipoo maruva sha kindo kinnywa nsele. 16Lebanoni nato mmbumaa iva ngwifo nta mafisi eefo nnyamaa iva kirasofo. 17Vamasanga woose nshi kindo kwakwe-fo, mmbo vakee kindo kinnywa nsele deny; ni kindo kya nguya. 18Naasany, mmbo llushiidimaa yaananisa Nndumi Iruva navi? Ao lumwananise neekyi? 19Maruva mmbo asongosyoo maako a vandu avaa yaalasha akakorwa na muro, akaeka na isongosya fyindo fyingyi. 20Na vandu ngwera yewo valashidimaa iwonisa findo fya usuri mmbo varuuya nri nsha vakapasha maruva awo. 21A ndesa mmulemanya? Mmulemiita? Mmulevio-se ukya mapookyony? Mmulemanya ukya llya ulana luleumbwa? 22We mmbwe akee rembo uwe ya fyoose na yewo vakee efo ulaniny vakee sha nre; we mmbwe aallye ngina sha shonyi na itiororrwa sha yeema lyekaya. 23Mmbwe aalasha vashilyi na ilema vamangyi va ulana vakava nshi kindo-fo. 24Ni dede mmbalevaakyo uteriny sha mbeu-fo, nta mmbakutiri tapu efo uteriny-fo, vakanaa, uraato lukavaipoo sha mare moomu. 25A mmbo mushiinanisaa navi naambo shiinani nawe? Aamba Nndumi Iruva mweele. 26Inweny miso mulole efyo; mmbi aletana eto? Ashendee nsemu wakwe auekennye, ativaanga toose marina a vayo. 27A nkyikyi elyi kuleamba ewe Yakobo kwaamba ewe Israeli, shia yakwa yansurumwa Nndumi Iruva nalailollye na uvingo lwakwa Iruva nnyalulollyaa-fo? 28A ndesa yewe nkwiishi? A ndesa nkuleitye? We Iruva wa llung'anu, Nndumi Iruva, yeto aletana ulana nnyaraa nta nnyalalaa-fo wiidimi lwakwe na finya takwe ntivaa isavaiya-fo. 29Mmbo aniinga finya yewo vaaraye, kaviirya muu yewo vafwafwa. 30Naakwa ni vakoo vashearaa na ilemwa, na vomi vakoo vatiri finya vashewoo na ilemwa. 31Kya indi ewo vavereye Nndumi Iruva mmbo vashewonisaa finya shiiya, vasherumbuka sha ngoru, naakwa varisha, mmbashearaafo, vasheendaa na marende nta mmbashevinaafo.

Currently Selected:

ISAYA 40: MAS2

Highlight

Copy

Compare