ISAYA 42

Nndundi wa Nndumi Iruva

1Lola ishinga lyakwa shansauwa, nsauwe wakwa, ngoo yakwa yansennywa kyakwe, shammbika mumuyo wakwa kwakwe, nawe ashengyee ulana usumanu. 2Nnyasheongoraa nta ikaba weele neetiva efo shia-fo. 3Irere lyifwafwa nnyashelyifishaafo, na utambi lutiri nsu nnyashelurumyaa-fo; asheniingyaa uleti kwa waarya. 4Nnyashaaraa nta ifwa nrima-fo, kutani asalallya uleti ulaniny koose naakwa ni ngyuruka ta mbaambaa mmbo tiveraa usumanu lwakwe.

We Nndumi Iruva

5Iruva aamba, yeto aumbye ngina kataala, we alaala ulana na fyeilula fyoose, we aniingye vandu muu veefo woose, we aniingye mumuyo woose vakee ulaniny. 6Yeny ni Iruva shilekuvaanga na usumanu lwakwa, na yeny nshekutiraa woko, shikuringe, shikuvike kuve kyaasa kya vandu vakwa na sa ya vamasanga. 7Ishiisa vafu miso na yaauwa yewo vakee kifingyony, na yuuta yewo vakee ireeminy efo mmba ya kifingyony. 8Yeny ni Nndumi Iruva llyo irina lyakwa na itumbe lyakwa nshisheningyaa ungyifo nta nshiniingaa maruva tikisi yakwa-fo. 9Lola, mbony ta mbee tilemmaa iira, na yeny mmbo nkeamba mbony kulaore tansha, nshikemuvia mbony tavayo.

Kyiimbo kya yaarafuma

10Imbyeny Nndumi Iruva kyiimbo kiiya.

Na tikisi yakwe kya ufishony lwa ulana:

eni musholokaa yeeveny na fyoose fiifo,

na maruva na woose veefo

11Ando kuumu na miri ya vayo yoongore,

myuungo ilya vakaa Vakedari,

vandu va Sela veembe;

vaongore uka kidoorony kya mafumbu.

12Vaitikise Nndumi Iruva,

vavambise usuri lwakwe urukeny

13Nndumi Iruva asheshaa na ukaari,

ashetirwaa nkififi sha nndu wa fira,

asheiyaa, ee da asheongoraa,

Asheoraa vakiduva vakwe wiidimi lwakwe.

Iruva avika kyaasa kya yeekya vandu vakwe

14Fyeeri fyaasha shilewika urilalyi, shilemalallya shasisirya, ulaalu shisheongoraa sha nndu nka kyeeri kya iira mwana shivavyoo na irooyo ni uuwo. 15Shishelyamaraa mafumbu na fidooro, shisheumisaa fyoose fyamya-fo. Mira isheumya na marrwa asheumyaa. 16Mmbo shisheendee vafu miso vaire shia valaishi, shivatetere shieny valaishi. Shisheallwaa ireema lyive sa mbee yaawo, na ando a imungo ave kurambalalyi. Efi shishevatannyaa nta nshivaraafo. 17Vashevirwaa numa, vashesutwa deny, yewo vakuvavye na mafwanu a mawe a uuru uniini veavyaa, “Eni ng'u maruva eru.”

Vaisraeli valemwa ikufunda

18Arannyiny, eni vafu maarwi, loleny eni vafu miso naambo mulollye. 19A mmbi akee mfu miso kulaore ni ishinga lyakwa? Ao akee mfu maarwi sha nrumi wakwa shanruma? A mmbi mfu miso sha nndu atiri ufoo? Ee da mfu miso sha ishinga lya Nndumi Iruva? 20Kulollye mbony shiingyi llyo nkukeitumuso-fo. Kulootye maarwi lyo nkwiitye-fo. 21Nndumi Iruva kasennywa kimaruma kya usumanu lwakwe, iindya mavavaso na ialatya. 22Kya indi vandu eva ni vandu vakee veeve na itirwa mifungwa; woose mmbakee vatirye efo marineny, mbakee vasurumi efo kifingyony vakakamarwa mifungo nta kuleefo wa imwauwa, nta mwiamba vaviirwa. 23A mmbi nnang'ani yaany aloota maarwi naitye mbony eti? Naarannyi na iitya kyeeri ekyo kishaa? 24A mmbi aleuta Yakobo nakamarwa mifungwa na ivika Israeli maakony a vasokyi? Nshe we Nndumi Iruva? Ulya lulellyamarya llya valelema ilatya shia takwe nta iindya mavavaso akwe. 25Kimaruma kya efyo, kaolota unyafi lwakwe uwe yaawo na finya ya fira ikaata muro taari toose, nta mmbalemanya-fo. Vakasarumya nta mmbalesununda mbony yeyo efo miriminy yaawo-fo.

Currently Selected:

ISAYA 42: MAS2

Highlight

Copy

Compare