MWIILOSHA 11

Mashora a nndu nnrango

1Kapa mbusha naakwa yaangwa,

Naambo numa kuiiluule-fo mbusha mmwasi.

2Ava waavi lwafo kwa vandu mfungare ao nyanya,

Mashika nkwiishi kindo kishiidima iwoya ulana ndesi-fo.

3Ifishi lyikammishwa mura, ni mmbwa ikeesha,

Nri ukawa-si ulella taari ya sinde ao ndoo,

Yoo uwoyaa nng'u ando ushelalaa.

4Mwiivereya uraato, nnyavaaya mbeu-fo,

Na mwiivereya mafishi avivitwa, nnyashuululaa kindo-fo.

5Ndesa kuleeshi ngata muu waanga efo mafweny a mwana akee nsangeny wa maye-le, niindo nkushiidimaa imanya mashora a Iruva eto atanaa wo kindo-fo. 6Vaaya mbeu ngama na nkwaany kulalemi ivaaya-fo, mashika nkwiishi ntingati timmya-fo nta ngama nkwaany, ao shoose tishekooya iva shisha. 7Mwi ni nsha na ilollya nkyeere kyikasennya miso. 8Nndu kawonisywa myaaka miingyi afure kya myaaka eyo myoose, lyo akummbwe sheelyi yiifo mikonu mikasha ikeesha nayo mmbo ivaa miingyi, neefyo fyoose ni maariso.

Ivavaso kwa vakoo

9Fura yewe mwana nkoo fura kya ukoo lwafo. Kyesa nrima wafo kyeeri ekyi kya ukoo lwafo. Niinga ekyo nrima na miso afo akunndye, lyo kummbwa sheelyi Iruva mmbo ashekuutya uvingo kyuuka na mitannyi yafo. 10Era neefo maariso a nrima wafo kwiise mwiili wafo ulashevavywa mashika ukoo na mafurumyony a muu yeu fyoose ni maariso.

Currently Selected:

MWIILOSHA 11: MAS2

Highlight

Copy

Compare