MWIILOSHA 12

1Kummbwa muumbi wafo kyeeri kya ukoo lwafo kulaore mikonu na myaaka eyo mikasha yansha, kyeeri kushaamba shammariswa, nkukyiifo kindo shikivikye nsia-fo. 2Kulaore kyeeri, sa, mwiiri na nyinyiri, fyammbuya iva ireema nalyo ifishi lyammbuya kyeeri mmbwa yammanda. 3Finya ya ikweekya llya kwiikee nkoo na yo ulaalu yammisya. Marende alya etiri finya ya isalala ulaalu ammba mafwafwa na mayoo eerafuna shoonga ammaangwa na miso ammeende ireema. 4Maarwi afo amma ifwa alakiidimaa yiita ngyunyanga teefo shia naakwa ni fiimbo na maseve esheesa na fiimbo fishiimbwa na ifina nkukeita-fo. Lyo kyikava ni ndeye ikeerera mmbo ishiidima ikwaanta kwiilele rony. 5Kyeeri ekyo mmbo kusheereyaa isaama ando a uwe yeenda kumuni kundo kwaasha mmbo kivaa kindo kyuumu kwafo. Fii ta nrweny mmbo tifwanaa shaa pyai nkukyiidima isalala na marende afo kumuni-fo, nta lango ta ngata shoose tikyikee efo makusarony afo-fo. Nndu mmbo akeewuuya neefo kwakwe kundo kwa yiimuya llung'anun. Vandu veyiira shia vashekapa kyiiyo. 6Nse wa arera ulekeye na taa ya saabu iwe-si iparike, sanda na kyikombe kyeena mura nakyo kiparike. 7Miili yeeru mmbo iwuyaa neefo sumbai kiluulyiny kundo luukye, na muu yeu uwuye neefo kwa Iruva yeto aluniinngye. 8Mwiilosha kaamba; efyo fyoose ni maariso, ni maariso, shaamba ni maariso.

Kya mafurumyony

9Kimmba Mwiilosha akee nndu atiri urango, keengera ilosha vandu findo efyo eeshi. Mmbo ekee nndu eeshi fyaaso, nawe kasununda mmwasi naidimi imanya udede lwavayo. 10Mwiilosha karuuya marero mesha eefwerisa vandu na marero yoo evalosha mmbo ekee a usumanu. 11Seu ta vandu varango mmbo tivavaa sha mbiiri ya mwiitetera moonri, neeto mwiireiya fyaaso fikavaka nndu akappya nsumari ukananga siny. Fyoose mmbo fyuukye kwa Iruva; yeto mwiisi wa woose. 12Mwanakwa, kwiise nnu ngata kusheendaa mashika mareiyo nnyatiraa umando-fo. Neelyi kwasoma kwailannya mwiili mmbo ushushukaa. 13Kindo kyeefurummya; efyo kwavywa fyoose mmbo kwamma yiita. Ereya Iruva na yiinndya mavavaso akwe mashika ni indo kyikundinkye kwa nndu wa vandu mbee ya usangu lwa Iruva. 14Mashika Iruva mmbo asheluutya uvingo kya mitannyi yeeru myoose, sanda na alya aletanwa kirika ave mesha ao makasha.

Currently Selected:

MWIILOSHA 12: MAS2

Highlight

Copy

Compare