NKUMBUYE WA UVAVASO 8

Uruka Usha lwa Isamya

1Ivavaso elyi nkemuniinga inu mmbo mulyilatyaa, naambo mukie muu neefumbuka, mundeanga kulya urukeny yelo Nndumi Iruva alevikya vande vany kyaasa. 2Neewe kummbwa marero a Nndumi Iruva moose, shaasa alekusongoya ando a myaaka yei myoose makumi aana kunu kasa neewe kwakaa kyeesyony nalole kwakooya kwawaranaa na mavavasyo akwe. 3Fyeeri fingyi kakureya shaa, numa kakulela na mana kulayiishi yewe nta vande vafo, nkyo kakoora sheelyi nndu nshi akaa na muu kyeendwa nshoonga tupu-fo, kyeendi nkimaruma kya ekyo kyoose kishukaa kaniny kya Nndumi Iruva. 4Masara afo nta nnyalenkwa-fo, nta nkulefumba marende ando a myaaka yei makumi aana-fo. 5Neewe manyaany sheelyi nndu avavasa mwana wakwe kyeellosha niindo na Nndumi Iruva, Iruva wafo ashekutannyaa. 6Warana na mavavaso a Nndumi Iruva wafo, kullatye neemwiinndya. 7Mashika Nndumi Iruva mmbo akeekwaata urukeny usha lutiri ngyusoka ta mura na firori fisheetyaa mura efo mamungony, 8nalo ni uruka lwa nganu na misabibu na mikuu, na mikomamanga, ikavetira miri ya ndunda tikamwaa mafura, kuveifo na ukyi. 9Mmbo kushelyaa shoonga yafo kulaifo usau nta kulashaanguyoo nkindo, na mawe a vayo mminya, na mafumbu a vayo akatira minya ya arera. 10Urukeny yelo mmbo kushelyaa neewuura, kuveana Nndumi Iruva, Iruva wafo kya uruka yelo usha indo alekuniinga.

Wiikimbi lwa Irekywa Nndumi

11Kukwiise nnu deny naambo kulasherekywa Nndumi Iruva, Iruva wafo na mavavaso akwe yaa nkeekuvia inu. 12Kyeeri kulyaa neewuura neetana mmba shisha, 13na maronda afo a ng'umbe na maonri afumbuke, na fesa yafo na sahabu, na fyoose efyo kutiri fifumbuke, 14naasany kulasheekurosa efo nriminy wafo kurekywa Nndumi Iruva, Iruva wafo yeu alekuuta kulya Misri ushingeny; 15yeu alekusongoya kulya kasa koomu keeresye, kundo kwiifo shoka na nguluva, nafo nta nkweifo mura-fo, kakuwonisya mura wuuka efo iweny. 16Niwe alekulela na mana ilya vande vafo valayiishi kakweesa naambo nashefurummya ikuwonisya mesha. 17Yoo kulasheamba, Finya yakwa na wiidimi lwakwa mfyo fyashiwonisya usimba yelu. 18Mmbo kushekummbwa Nndumi Iruva wafo kimmba mmbwe yeto akuniinga finya yewona usimba yelo, naambo neengere ivangisa kyaasa kilya alevikya vande vafo fika inu. 19Lyo kwakooya kwarenkyo neesora maruva engyiy na yaarunndya neeyiinndya, mmbo shamuvia kya dede nkuti murumake. 20Mmbo mushevaa sha vandu yewo Nndumi Iruva akeevamamita mwiilollye, neeni mushetannyo indo mashika elyi mwalema yaarannya unyanga lwa Nndumi Iruva, Iruva waany.

Currently Selected:

NKUMBUYE WA UVAVASO 8: MAS2

Highlight

Compare

Copy