NKUMBUYE WA UVAVASO 7
7
Vandu va Ndumi
(Yuu 34:11-16)
1Naasany kyeeri Nndumi Iruva, Iruva wafo ashekufitaa efo urukeny yelo kukeendetira, na yuumbuta-fo vandu va masanga maniini mfungare na vawore finya ngota yeni; Vahiti, na Vagirgashi na Vaamori, Vakanaani, Vaperisi Vahivi na Vayebusi. 2Elyi Nndumi Iruva ashevanta-fo lwiilollye, neewe kuvakape, neewoota-fo deny, lyo kulashesanga nawo-fo, nta ivalyillya-fo, nta mulakwaalyike nawo-fo, 3nta vana vafo valakoore nawo-fo. 4Mashika vakakoora mmbo vashefullwaa vana vany vare valashilatya, veenndye maruva engyi unyafi lwa Nndumi Iruva lumusheye neemumamita. 5Kyasia fishefisheny fitara fyawo fyeerasya neefisammbwa deny na mafwanu yoo awo mwaarumate na muro.
6Yeni mmbo mukee vandu veele va Nndumi Iruva, Iruva alemusauwa muve vakwe deny, muve torya kwakwe ngeta vandu va masanga engyi moose. 7Nndumi Iruva nshi alemukunda yeni neemusauwa mashika elyi mukee veengyi-fo, mashika lyo yeni mmbo mweekee vaangu deny ngota vandu vengyi woose. 8Lyo nkimaruma kya elyi Nndumi Iruva alelanga imukunda na kyaasa kilya alevikya vande valya vany kakunda ikiinutya, na nkyo kileenngye kamuuta kulya Misri na woko lwa finya, kulya mmba ya ushinga maakony a Farao we mangyi ya Misri. 9Naasa ulaalu Mangyi Nndumi Iruva, mmbwe Iruva wa dede, mwiinutya fyaasa fyakwe na isarya lyakwe kwa yewo vankundye neeringa mavavaso akwe, nafike irika lya kyiku; 10nawe mmbo ava mwiitaiya yewo vansuuye paa veelollye. Nnasheraa yeto ansuuye-fo. 11Kyasian-te, tireny mavavaso akwe na usumanu lwakwe shaasa shikemuvia inu.
Mbora ta Wiindi
(Nku 28:1-14)
12Neeni kwankooya mwatira mavavaso yaa na ufundo yelu llyo na Nndumi Iruva, Iruva wafo asheinutyaa kwafo kyaasa llyo na isarya elyo shaasa alearya vakuu vafo, 13nawo mmbo ashekukundaa neekuvikya mbora neekufumbuta yewe na vana vafo numa yafo, na uruka lwafo na fimu fyafo, na findo fyafo fyeevikya, mfyo ng'umbe na moonri efo urukeny yalo aleniinga vakuu vafo. 14Mmbo kusheonaa iviiri ngota vandu va masanga engyi moose, nta kwafo nkushekaafo nndu kyuumba kava nndumi ao nka-fo, nta efo findony fyeevikya-fo. 15Nawe Nndumi Iruva ashekuutaa ndwari shoose shikasha kuletilollya uka kulya Misri, natirwaaye vakiduva vafo. 16Neewe mamita yewo woose Nndumi Iruva alevavika maakony afo, nta kulavalyillye-fo, nta kulainndye maruva awo-fo, naambo alasheeva nsindara kwafo. 17Neewe kwakooya kweereya elyi kulollye wo vakee veengyi ngota yeni na yaamba, “A mmbo luvafunaa inda?” 18Lyo yewe kulavaereye-fo, kukummbwe shaasa Nndumi Iruva wafo aletannya Farao na uruka loose lwa Misri. 19Kummbwa efyo fyoose miso afo alelollya na ngyende yeto ta yaawuta fya woko lwa Iruva lwa finya nawe kakuwouwa-fo, nawe Nndumi Iruva niindo ashevatannyaa, yewo woose kuveereiye. 20Nawe Nndumi Iruva wafo mmbo asheva mataa, neewo vasaau kuvamamite naakwa woovya kwi. 21Kulavainndye-fo, mashika Nndumi Iruva, Iruva wafo yeto aeresye mmbo akee neewe. 22Nawe Nndumi Iruva, Iruva wafo mmbo asheumbutaa vandu yewo mbee yafo umwi umwi, nta nshi kuvamamitaa na lyimwi-fo, naambo ando awo nalasheeshau mafisi a ngoroshony. 23Nndumi Iruva mmbo ashevaantyaa nyinyira na weerei veereve kutani vasia piny. 24Na vamangyi vawo mmbo vashevikwaa maakony afo, na irina lyawo lyireke kulu, na nkwiifo nndu ashekyaa mbee yafo-fo. 25Mafwanu awo eepasha amamiteny na muro, nta kulalange fesa ao sahabu ya vayo-fo, mashika mmbo ishevaa nsindara wafo mashika elyi ikee kindo kitefusu kwa Nndumi Iruva, Iruva wafo; 26na findo fitefusu kulafivike mmba kwafo-fo mashika mmbo kishekutefusaa neewe. Yefyo fyoose fisue deny, mashika mfindo fitefusu.
Currently Selected:
NKUMBUYE WA UVAVASO 7: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
