NKUMBUYE WA UVAVASO 9

Uriiti lwa Vandu (Yuu 32:1-35)

1Kyasia aranyany yewe Israeli kimmba kulangye iruuka Yordan kundeshilya ngyumangyi titiri finya ngota yewe kumuni, na miri miikare nnu, 2kundekwaanannya na vandu vaasha vatiri finya mmbo vana va Vaanaki, yewo kulemmiita mbony tawo. Ndesa mmbi yeto ashiidimaa ikapana nawo? 3Kyasia manyaany inu sheelyi Nndumi Iruva mmbwe akeekusongoya eevakye muro ukoraa, navamamite neewoombuta yoo mbee yafo, vasye piny shaasa Nndumi Iruva alekuvia. 4Naasany kyeeri Nndumi Iruva, Iruva wafo amaa ikweekya indo kulasheekushopa kwaambe, “Ni usumanu lwakwa iwonisa uruka yelu, mashika elyi vandu yewo vengyi vekee varavi Nndumi Iruva kawoombuta.” 5Nshi kimaruma kya usumanu lwafo-fo, nta kya usha lwafo kutani Nndumi Iruva oombutafo vandu yewo kwaangefo, navevangisa na kyaasa kilya alevia Abrahamu na Isaki na Yakobo-fo, kimmba yeni mukee vandu va ngoo shuumu. 6Kwekyo sheelyi Nndumi Iruva, Iruva waany nyakeeimuniinga uruka yelu luve lwany kyimaruma kya usongovisi lwaany-fo; mashika mmbo mukee vandu variiti. 7Kummbwa shaasa kuleengye Nndumi Iruva unyafi kulya kasa uka shaasa kuleuka kulya Misri fika yaa mukai, mukava valyang'a kwa Nndumi Iruva 8Mukafuluta Nndumi Iruva alya Horebu, Nndumi Iruva kasua neekunda imumamityau 9Na llya shilesaama na ifumbuu shandeniingyo mapoo alya a mavavaso alya akee kyaasa Nndumi Iruva alevika neeni, fo shakaa ando a mikonu makumi aana kio na nsanyiny kulore shalya nta ina. 10Nndumi Iruva kashiniingya mapoo alya avii areiye na woko lwakwe muni, filya alemuvia alya ifumbuny nnang'ani ya muro. 11Ando a mikonu makumi aana kyio na msanyiny, llya Nndumi Iruva aleshirambikya mapoo alya avii a kyaasa. 12Naasa Nndumi Iruva kashivia, “Oloka uviny kweende, mashika vandu valya kulevauta kulya Misri vankureveesa, vakaimmbwa shia ilya shilewoora elyi valekuvikya veni ifwanu lya ngashe vakalyiindya.” 13Naasa Nndumi Iruva keengera ishivia, “Yeva ni vandu vatiri ngoo shuumu, 14Shira shivarumate ulaalu indi na irina lyawo lyireke kulu, shikufumbute yewe kuve vandu veengyi ngota wo.” 15Naasa shooloka shiirye mapoo alya avii wokony, ifumbu lyiishaakaa muro. 16Llya shilesha shakooya shaasa mwallyamarya Nndumi Iruva, Iruva waany, llya mulesongosya ifwanu lya ngashe, mukalyamarya Nndumi Iruva uviny indo. 17Naasa llyo shileipoo mapoo alya avii shaatuula yoo si akafika-fika mwiilollye. 18Neeny shawa yoo si shiifikye kisangu si, shalalan ando a mikonu makumi aana shilakomba nta kindo, kyeendwa ni uravi lwany, elyi mulelyamarya Nndumi Iruva nemfuluta na unyafi. 19Neeny mmbo shileereya nnu kimaruma kya unyafi lwa Nndumi Iruva elyi mulemfuluta indo, nawe kakunda imurumata. Lyo Nndumi Iruva kawuya ishaarannya lyingyi. 20Unyafi lwa Nndumi Iruva lukarwa kimaruma kya Aron kakunda ivarumata, kyeendi shaterevya Aron nawe nkonu yeto. 21Naasa sheepoou ulyamari lwany, nnyo ngashe yeyo, shaimamita na muro, shaisa ikava sha laami na nsongoso neeny shaufwallya efo mfongony weesoka wuuka efo ifumbuu. 22Na alya Tabera na Masa na Kibrot-hataava mmbo mulefuluta Nndumi Iruva na unyafi. 23Na alya Kadesh-barnea llya Nndumi Iruva alemuvia musaami mundetira uruka elo alemuniinga, mmbo mulerenga mukara shaasa alemuvavasya, mmulemwiinndya nta yaarannya unyanga lwakwe-fo. 24Uka elyo shaasa shimwiishi mmbo mukee filemi kwa Nndumi Iruva. 25Naasa llyo shilewa si yoo mbee ya Nndumi Iruva mikonu ilya makumi aana, mashika elyi Nndumi Iruva eekunndye ivamamita 26Shafuuya Nndumi Iruva shammbia, “Woi Nndumi Iruva wakwa, kulasheemamita vandu vafo-fo, mashika ni vaya ding'u vafo kulevawouwa na woko lwa finya kwawoota kulya Misri. 27Nkyekummbwa mashinga afo wo Abrahamu na Isaki na Yakobo kure kulalola uravi lwa vandu yeva na ulyamari lwawo, 28naambo kulya Misri valasheita nawo vaambe, ‘Ni elyi Nndumi Iruva waawo alelemwa ivafita urukeny yelo alevaarya kyaasa, nawe kavasua, kawoota-fo naambo nandevarumatya efo kasa. 29Lyo wo ni vandu vafo kulevasauwa kumuni, kulevawouwa na woko lwafo lwa finya kwavauta kulya Misri.’”

Currently Selected:

NKUMBUYE WA UVAVASO 9: MAS2

Highlight

Compare

Copy