NKUMBUYE WA UVAVASO 6

Ivavaso Iniini

1Yaa nng'u mavavasyo na usumanu loose shaasa Nndumi Iruva, Iruva waany aleshivavasya shimuniinge naambo mukooye ilatya indo kulya urukeny elo mukeenda, 2naambo mwiinndye Nndumi Iruva, Iruva waany, neelatya mavavaso akwe moose, yoo nkeemuvia, yewe na mwana wafo na vashuku vafo, fyeeri fyoose fya muu wafo, naambo kufumbutyo mikonu yafo. 3Naasa arannyany yewe Israeli naambo kutani indo, naambo kuwoni iviiri, neefumbuka shaasa Nndumi Iruva, Iruva wa vande vafo alekuvikya kyaasa, elyi kukee efo urukeny yelo lwa malela na wuki.

4Arannya, Ewe Israeli, Nndumi Iruva, Iruva weeru ni Nndumi Iruva umwi nsi. 5Naasany kunda Nndumi Iruva, wafo na ngoo yafo shoose, na nrima wafo moose na finya tafo shoose. 6Na marero yaa shaasa nkekuvia inu, atire efo nriminy wafo, 7kuvealosha na vana vafo nisha, na yaarera efo kyeny, neefo shia, na kyeeri kwafika ilala na elyi kwiifo kukwiipoo. 8Areiye kwuafinngye efo maakony neefo fisanguny. 9Kuveareiya efo mbee ya mwaango wa mmba yafo.

Wiikyimbi lwa Vandu Valatiri Wiindi

10Na kyeeri Nndumi Iruva, Iruva wafo ammaa ikufita efo urukeny yelo alevikya vakuu vafo kyaasa, wo Abrahamu na Isaki na Yakobo sheelyi ashevaniingaa, lutiri miri miniini misha kulaitannyi yewe, 11na mmba tiishwe findo kulasummyi yewe, na firori fya mura kulasunyi yewe, na marema a misabibu na a miri ya mafura kulavaaye yewe, kukooyeny ikulyiiya neewuura, 12llyo kukwiise nnu, kulasheerekyo Nndumi Iruva yeu alekuuta kulya Misri kwekee ushingeny. 13Inndya Nndumi Iruva we Iruva wafo, nawe mmbwe kundundya neesenda irina lyakwe. 14Mulalatye maruva engyi-fo, 15mashika Nndumi Iruva, Iruva wafo ni Iruva nalasisiryaa maruva engyi, lola unyafi lwakwe lulasheerwa nakumamite kuuke yaa ulaniny. 16Mulaese Nndumi Iruva, Iruva waany-fo, shaasa muletana alya Masa. 17Tireny mavavaso a Nndumi Iruva, Iruva waany, na ukureekyi lwa vayo, na mavavasyo a vayo. 18Kutani mesha na fya usumanu mbee ya Nndumi Iruva naambo kuwoni iviiri na yaanga urukeny yelo usha Nndumi Iruva aleniinga vande vafo, 19na yuumbuta vakiduva vafo shaasa llya alekuvia.

20Neelyi numa elyi vana vafo vashekuvesaa, “A llyo ukureekyi na mavavasyo Nndumi Iruva, Iruva weeru alemuvavasya?” 21Naasa llyo kuviaa vana vafo, Mwiishi, mmbo lwekee mashinga kulya Misri, Nndumi Iruva kalwaauwa-fo na woko lwa finya; 22Nndumi Iruva kaora-fo ngyende na wiidimi uniini, na findo firoo efo Misri na kwa Farao na urukeny lwakwe loose, neese lukalollya paa; 23kaluuta-fo naambo nalweende kunu, naambo naluniinge uruka yelo alevikya vande veru kyaasa. 24Nndumi Iruva kaluvavasya iindya mavavaso akwe, lumwiinndye, naambo luwone iviiri kyeeri kyoose, luvewona na muu mwaasha. 25Nakyo mmbo kiluviiyaa ngoma kwakooya lwalatya mavavaso yaa a Nndumi Iruva, Iruva weeru, shaasa aleluvavasya.

Currently Selected:

NKUMBUYE WA UVAVASO 6: MAS2

Highlight

Compare

Copy