NKUMBUYE WA UVAVASO 28

Mbora ta Wiindi

(Val 26:3-13; Nku 7:12-24)

1Kwakooya kwaarannya unyanga lwa Nndumi Iruva, Iruva wafo na nrima umwi nsi, neesora mavavaso akwe yaa nkeekuvavasya inu, llyo Nndumi Iruva wafo ashekung'anisaa ngota masanga engyi moose a ulaniny; 2na mbora eti toose mmbo tikusoraa elyi kwaarannya unyanga lwa Nndumi Iruva, Iruva wafo. 3Mmbo kushevikyoo mbora efo muriny kwafo neefo mareminy afo. 4Ngyeeri tafo mmbo vashevikyoo mbora, na fimu fya uruka lwafo, na findo fyafo fyeevikya, ng'umbe na moonri afo. 5Na kikapu kyafo na kiiya kyafo kyeevika nswa. 6Mmbo kuvikyoo mbora kwiishangaa na kwiisomukaa. 7Nawe Nndumi Iruva, Iruva mmbo ashekyaa naambo vakiduva vafo vakapwa kwiilollye; mmbo vakusheyaa na shia imwi lyo varishe na shia mfungare. 8Na Nndumi Iruva, mmbo ashallwaa mbeshe tafo, titire shoonga kyeeri kyoose, na mashoreny afo moose na uruka elo Nndumi Iruva, Iruva wafo akuningaa. 9Neeni Nndumi Iruva ashekwaallwa isanga yeele shaasa alekulyiyya mboo, elyi kusheringaa mavavaso a Nndumi Iruva, Iruva wafo neelatya shia takwe. 10Na masanga moose mmbo vashekwereyaa kimaruma kya irina lya Nndumi Iruva. 11Nndumi Iruva, mmbo ashekuniingaa ngoma yewe na vana vafo na findo fyafo fyeevikya, na findo fya uruka lwafo, efo urukeny yelo Nndumi Iruva, alevikya vande vafo kyaasa. 12Nndumi Iruva mmbo ashekuboromuyaa masaa efo iruveeu, kuwone mmbwa kyeeri kya vayo, navikye mbora mashora moose a maako afo, neewe kwiidimi yaakuya vengyi findo, lyo yewe kulashakua. 13Nndumi Iruva, ashekuvikaa nsongoru nta nshi wa numa-fo, neewe mmbo kusheroswaa uwe nta kulashoolokaa, kwakooya kwaarannya mavavasyo a Nndumi Iruva, Iruva wafo yaa nkeekuvia ulaalu, naambo kwaaringe, 14Mukanra mulamina marero yaa nkeemuvia inu nta yeevekya kunu ao kulya, ilatya maruva engyi.

Ngapo ta Ira Kuleindya

(Val 26:14-46)

15Lyo kwankooya kulore kwaarannya unyanga lwa Nndumi Iruva, Iruva wafo neetana shaasa mavavaso akwe akoora, llyo fidengo efi fyoose fishekusheyaa. 16Mmbo kushevaa ndenge efo muriny wafo kiwo neefo mareminy afo. 17Na kyikapu kyafo na kiiya kyafo kyevika nswa mmbo fishedengwaa. 18Na ngyeeri yafo kiwo, na uruka lwafo, ng'umbe tafo na moonri afo mmbo fishedengwaa. 19Kuveva nndenge kwishaangaa na kwiisomukaa. 20Nndumi Iruva, mmbo akwengyee kidengo na nyinyira na isakirwa mashoreny a maako afo, llyo kurumakaa neereka uviny kyeendwa ni uravi lwafo. 21Na Nndumi Iruva mmbo ashekureeyaa ndwari shuumu kutani akuuta deny efo urukeny yelo alekuniinga. 22Nawe Nndumi Iruva, mmbo ashekweenngye ndwari tishaambukyaa mabubu, homa, iwa mmbwa. Uraato wiingyi fishelyamaraa fimu fyafo. Ngapo eti mmbo tikaa neewe kutani kwafwa. 23Ngina mmbo ishevaa sha minya kiwo na kunu si. 24Nndumi Iruva ashealwaa mmbwa ya uruka ivake kiluulyi na nsanga ikurumate.

25Kweenda fireny Nndumi Iruva, mmbo ashekwaallwa kukapwa m-mbakiduva vafo, kuvasore na shia imwi, lyo kurishe kwishiiraa shia mfungare, kunyanyake efo ngyumangyiny toose ta masangeny engyi ulaniny. 26Na minying'a yaany mmbo ishelyiwaa nndeye na mafisi engyi-da, kulashekaa-fo nndu mwioombuta. 27Nawe Nndumi Iruva mmbo ashekukapaa na moore alya a Misri, na woye kukusuve kuleefo yiimuya. 28Nndumi Iruva nakweenngye ukwale, kuvefwa miso, na mirima yaany ive itondo 29kweende kwiwara-waraa nsanyiny kuvake nndu mfu miso ireeminy, nta nkuvesyoo findony fyafo-fo, neewe kukapwa wo nkonu neekamarwa mifungwa nta kulaona nndu mwikweekya.

30Kwafinga tindi mmbo kushesokwaa ni nndumi ungyi, kwatana mmba nkushekaafo-fo, kwavaaya misabibu nkushelyaa ndunda ta vayo-fo. 31Ng'umbe tafo mmbo tishishwaa mbengyi kwiilollye indi, kure kulalyany nyama, mmbo nndu ashaa nakusoke nshungu wafo nalakikuviiryaa-se, na moonri afo aniingyo vakiduva vafo, nta mwiikweekya nalaonikaa. 32Vana vafo va kyuuni na va kika vaniingyo vandu va masanga engyi, nalyo miso afo arumike kwiilangaa ivalollyo, l'yo kulatiri kyeetana. 33Ando amwi na ivina lyafo ndunda ta uruka lwafo mmbo tishelyiwaa mmbeny, mmbo vashekusisyaa neekufota. 34Neefyo fyoose kushelollya mmbo fishekulyamaraa nrwe. 35Nndumi Iruva mmbo ashekweenngyee moore, uka uvayo fika urony nang'u alavaa nta ivavara. 36Nndumi Iruva mmbo ashekusamiraa yewe na mangyi yafo mweende urukeny weny, neefo murunndye maruva a wongo a firi na mawe. 37Neewe mmbo kushevaa kindo kyeeseta, na wa uraawe na wa yiing'shwa mbee ya vandu va masanga efo Nndumi Iruva ashekuumbutyaa. 38Mmbo kuvaayaa mbeu nkuka lyo kwiilule fyaangu kimmba fishelyiwaa ni nrye. 39Mmbo kushevaayaa misabibu na yiiremmya nisha, lyo nkushelyaa ndunda ta vayo-fo, nta iyaya-fo, mmbo tilyiwaa mmakuru. 40Kushekooyaa kutiri mikuu ya ndunda lyo kuture mafura a vayo, mashika mmbo ushaangaraa. 41Mmbo kusheiraa vana va kyuuni na va kyika lyo nkushevalollyaa vave vafo-fo kimmba vashekamarwaa ushengeny. 42Miri myoose na fimu fyafo mmbo fishekaywa ni nrye. 43Muny akee kwafo mmbo ashesaamaa uwe yafo, neewe kweengere yaanngwa. 44We mmbo ashekwaakuya lyo yewe kulatiri kyeemwaakuya, we nave ni nrwe neewe kuve nkya.

45Na fidengo efyo fyoose mmbo fishekusheyaa fikukaye, neekurumata, elyi kwara kulaarannya unyanga lwa Nndumi Iruva we Iruva wafo, neesora mavavaso akwe yaa. 46Nang'u mmbo avaa sha wende kwafo na vana vafo llung'anu; 47mashika elyi kushevaa kularunndya Nndumi Iruva wafo kwiitiri ifura na kyaanu kya findo efyo fyoose akulyimyi; 48Kuve mwiirundya vakiduva vafo yewo Nndumi Iruva ashekurikyaa, kuwoni shaa, na nyura na yaanguyo mfyeeraa, kwaanguyo mfindo fyoose, kuve sheelyi kurye iryo lya minya efo singony kutani kwamamika. 49Nawe Nndumi Iruva ashekurikya vandu wooka kwaasha vashe sha uviri nta kulamanyaa kishomu kyawo; 50Nawo yewo mmbo vaeresye efo kisangu valasaryaa nta nndu ukuu nta ukoo. 51Nawo mmbo vashemaa ng'umbe tafo na findo fyafo fyeevikya fya uruka lwafo, nakumaa deny nalakureeyaa nta mbeu ta uruka lwafo, nta mfinyo nta mafura, nta ngashe ta ng'umbe nta moonri, nakumaa piny. 52Nawe mmbo ashekuringityaa taari toose lla shaasa masimamba yafo irooye uwe ikaringityo kwaivika nsia, nayo isheolotwa-si taari toose uruka loose Nndumi Iruva wafo alekuniinga. 53Neewe elyi kusheringitywa mmbakiduva vafo nayaatarwa mmbo kushelyaa vana vafo kumuni yewo Nndumi Iruva, wafo akuniingye. 54Neeto akee nndu nsha efo kwany mmbo ashevaa uravi kwa vengyi, na kwa nka wakwe muni, na kwa vana vakwe yewo vasaayeny. 55Nta nnyashekundaa vawone nyama yeyo ya vengyi akeelya-fo, mashika kishennyiyaa, kimaruma kya ishingillyo nnu mbakiduva. 56Naakwa ni nka yeto asennyi deny kava mmamiri, nawe mmbo ashesuaa mmi wakwe muni na vana vakwe va kyuumi na va kyika. 57Navesua na vayan kyeku vakwe na vana vakwe, navevalya kimaruma kya shaa shiroo na yaanguyo elyi asheshingilywa mmbakiduva.

58Kwakooya kwara iringa mavavasyo yaa akeemareiye kyitabuny ekyi, kwiinndye ivina elyi lya itumbe lyeeresye lya Nndumi Iruva wafo. 59Llyo Nndumi Iruva ashekufumbutyaa ngapo teerese, na kwa vana vafo, na ndwari shiroo tilashuukaa, 60Nawe nashekuviirya ndwari tilya ta Misri kuteereiye, tikukaye. 61Na wo ndwari na wo ngapo filakeefireiye kunu Nndumi Iruva mmbo ashevekweengyee kutani kwasia deny, 62Neeni mweevakye nyinyiri ta nginii-u mushesaan vaangu nnu elyi mwara mulaita unyanga lwa Nndumi Iruva wafo. 63Na shaasa Nndumi Iruva eetirwa ni nsia kya wiingyi lwany neemutannya mesha niindo ashefuraa mwiisarummyaa, muutwan yoo urukeny yelo 64Nndumi Iruva mmbo ashekunyanyataa masangeny, uka mbai yei fika mbai ilya, kuverunndya-fo maruva engyi kulaeeshi yewe nta vande vafo, mawe na firi. 65Ntankushewonaa-fo ifura-fo nta nkushewonaa kiimuyo-fo, nafo Nndumi Iruva nashekuniinga irerema na yuuta pa. 66Na muu wafo kyeeri kyoose uve wa usau na weerei kio na nsanyiny, nta nkushekaa-fo ivika nsia-fo. 67Ngama mmbo kushaamba, “A nkyeema ulaalu ni nkwaany,” na nkwaany kwaambe, A nkyeema ulaalu ni ngama. 68Nawe Nndumi Iruva mmbo ashekuviira-se na Misri na ngalava kwiishiraa shia ilya kulandeilollye. Neefo mmbo mushekukumbaa kwa vakiduva vany muve mashinga awo na fishinga fyawo, nta mmushelollyaa mwiimuwarya-fo.

Currently Selected:

NKUMBUYE WA UVAVASO 28: MAS2

Highlight

Compare

Copy