NKUMBUYE WA UVAVASO 27
27
Mavavaso a Iruva Mareiye Mawee-u
1Naasa Mose na vamiku va Israeli vakavia vandu, Mmbo musoraa nisha efi fyoose shamuvavasya inu. 2Na nkonu yeto musheangaa urukeny yelo mukilye Yordan, urukeny yelo Nndumi Iruva wafo akuniinga, mmbo kushesaleesaa mawe avii maniini kuaambe yeela, 3kureiyeny mavavaso yaa moose, llo uruka yelo lwiishwe malela na wuki, shaasa Nndumi Iruva wa vande vafo alekuvikya kyaasa 4Shaasa mumaa ikillya Yordan saleeseny mawe yoo, yoo ifumbuny lya Ebali kuaambe yeela. 5Na yoo nng'u kutannyaa Nndumi Iruva kitara kyeerasya kya mawe, kulasande-fo minya-fo. 6Tana kitara ekyo kyeerasya Nndumi Iruva wafo kukitani na mawe alakee mabashe, kuutye nng'u Nndumi Iruva wafo firaso fyeekora na muro. 7Yoo maweny kureiyeny marero a mavavaso yaa kuvike na firaso fya ufoo, neewe kulyeny shoonga neefura mbee ya Nndumi Iruva wafo. 8Yoo maweny yoo kureiyeny nisha mavavaso yaa moose.
9Mose na makohani wo Valevi vakavia vana va Israeli, Syen-do mwaarannye yeni Israeli, Inu mmbo mwava vandu va Nndumi Iruva waany. 10Nkyo mmbo mushiindyaa unyanga lwa Nndumi Iruva waany mkutani, shaasa nkeemuvia mavavaso akwe.
Kidengo kya Ira Kuleindya
11Nkonu yeto mweni Mose kavia vandu, 12vandu yeva vasalale yaa ifumbuny lya Gerisimu vavikyony mbora, mukammaa iruuka Yordan mmbo Simion na Levi na Yuda na Iskari na Yosefu, na Benyaminy; 13neeva vasalale uwe ya ifumbu lya Ebali kyeeri kya usakiro, ni Ruben na Gadi, na Aseri na Sabulon na Dani na Naftali. 14Na Valevi varouwe vavie vandu na unyanga uniini,
15Nndu moose ashesongosyaa ifwanu lyeebasha nadengwa ao ya yuumba, mmashora a maako avavisaa Nndumi Iruva. Na vandu woose varouwe na yaamba: Amen!
16Neeto mwiimina ndeye na maye, nadengwa. Na vandu woose varouwe, Amen.
17Neeto asembera nnyanu wa ungyi, nadengwa, Varouwe, Amen
18Neeto aretaa nndu mfu miso shia, nadengwa, Varouwe, Amen.
19Neeto asheevetaa usumanu lwa muny mwana wa ngwera ao nka wa ding'u na vandu woose, Varouwe Amen.
20Neeto mwiilala na nka wa ndeye, nadengwa, mashika mmbo asukwa ndeye. Na vandu woose varouwe, Amen.
21Neeto alalaa na ifisi lya ngata shoose, nadengwa, woose vaambe, Amen.
22Neeto alala na mwana wa maye, ao wa ndeye, woose varouwe, Amen!
23Neeto alalaa na maye wa nkaakwe, Woose vaambe Amen.
24Neeto alaaya ungyi nenkapa, nadengwa, Woose vaambe Amen.
25Neeto awarya weesi lweewaa nadengwa, Woose vaambe Amen
26Neeto alavangisaa marero a uvavaso yelu, nadengwa, Woose vaambe, Amen.
Currently Selected:
NKUMBUYE WA UVAVASO 27: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
