NKUMBUYE WA UVAVASO 29

Kyaasa kya Nndumi na Israeli Kulya Moabu

1Yaa nng'u marero a kyaasa kya Nndumi Iruva, alevavasya Mose navike na Israeli kulya Moabu na alya Horebu. 2Mose llyo alevaanga Israeli woose, kavavia, Yeni mmbo mulelollya fyoose shaasa Nndumi Iruva, aletannya Farao kulya Misri na vandu vakwe, 3na ngapo niini, firingisyo na ngyende niini eto mulelollya na miso any. 4Lyo Nndumi Iruva, Iruva nnyalevaidimisya imanya-fo, nta miso alollyaa-fo, nta maarwi ashiitaa-fo, na kufike inu. 5Neeny shavasongoya kulya kasa ando a myaaka makumi aana, soori tany nta ntekkwa-fo, nta kyaaru-fo. 6Nta mwulelya nkate nta ina mfinyo-fo nta kinangaa-fo, naambo mumanyi Nndumi Iruva, mmbwe Iruva waany. 7Na llya lulefika yaa mangyi ya Heshboni we Sihoni kakunda ikapana neese, na Ogu wa Bashani lyo lukavakapa; 8Lukaipoo uruka lwawo lukaniingya ngyufyari ta Ruben na Gadi na kyenga kya ufyari lwa Manase luve lwawo. 9Kyasia arannyiny marero a kyaasa ekyi, naambo muvikyo mbora mashoreny any.

10Inu mmbo mukee yaa mbee ya Nndumi Iruva, Iruva waany moose, vaniini vany, na ngyufyari tany na vamiku vany, na vashilyi vany, womi woose va Israeli 11vana vany vakoo na vaka vany na veny vany, pookya yewo vaparaa ngwi kukooye mwiiraa mura 12woose naambo valungwa na kyaasa kya Nndumi Iruva, Iruva wafo, alekyivika neewe, 13naambo nakufumbute yewe shaasa alekuvia, na shaasa alevikya vande vafo kyaasa, we Abrahamu na Isaki na Yakobo. 14Nta kyaasa ekyi nshi kyavikwa neeni muvenida-fo, 15ni ando amwi na yeto moose asalalyi yaa mbee ya Iruva Nndumi Iruva, Iruva weeru, sanda na yeto nalaiyoo yaa, 16(Kimmba mwiishi shaasa lulekaa kulyaa Misri, na shaasa lulesha Lushiiraa nnang'ani ya vandu va masanga yoo lulevavara urukeny Lwawo, 17mukalollya na maruva awo nooravi lwawo Miri, mawe, fesa, sahabu yefyo fyeekee kwawo.) 18Nkyo kulasheekaa-fo nta nndu umwi nnang'ani yaany, wo ave nndumi ao nka nta mfyari nalare Nndumi Iruva, Iruva weeru nanderunndya maruva engyi-fo, kilasheelukya-fo kindo kisheendee kidengo na urumato. 19Neeto moose aitye marero a fwaa yei naambe, “Mmmbo nshewonaa ufoo, naakwa nrima wakwa weenda uretiny.” Kikava indo mmbo kisherumataa vesha na vakasha. 20Nndumi Iruva, Iruva nnyashesaryaa nndu wa ngata yeyo-fo, llyo unyafi lwakwe lusherwaa sha nsu kwa nndu yeto, na urumato elu lwaambawa kyitabuny yekyi lunsheye, nawe Nndumi Iruva, naangate irina lyakwe ulaniny. 21Nndumi Iruva mmbo ashemmbikaa kwaasha na vana va Israeli, kyeenndwa ni kidengo ekyi kunu kyitabuny, ekyi kya uvavaso. 22Na ufyari lwany lwa numa, na muny waany auka kwaasha, elyi vashelollyaa ngapo tishe, llyo vashaamba, 23“Uruka lwakwe loose mmuro na shumbi, mmbo lukeeya, kulaifo ivaaya nta yuulula, nta mare nalammyaa-fo, lukavaka sodoma na Gomora, Adima na Seboimu, kulya Nndumi Iruva, alelyamara kyeendo ni unyafi lwakwe.” 24Na vandu va masanga woose mmbo vashaambaa, “A nkikyi elyi Nndumi Iruva, atannya uruka elu indi?” A unyafi yelu na muro llweekyi ndesa? 25Llyo vandu vasherouwaa vaambe, “Mashika elyi valera kyaasa kya Nndumi Iruva wa vande vawo, kilya alevika nawo llya alevauta kulya Misri.” 26Nawo vakanra neenderunndya maruva engyi valaeeshi, 27llyo unyafi lwa Nndumi Iruva, lukarwa urukeny yelu, na yeende urumato elo lukeewaambe kunu uvavasony yelu. 28Nawe Nndumi Iruva, kavaillwa tushu urukeny lwawo kya unyafi lwakwe, kandeveera urukeny weny shaasa kikee inu. 29Mbony ta kirika ni ta Nndumi Iruva, Iruva weeru, lyo tilya tikee shisukwe n'teru yese na vana veru llung'anu, naambo lwiinutye marero a uvavaso elu.

Currently Selected:

NKUMBUYE WA UVAVASO 29: MAS2

Highlight

Compare

Copy