1 MBONY TA FYEERI 16
16
1Nalyo vakaata isanduku lya Iruva, vakalyivika kulya ulaleny lulya mangyi Davidi emma idesya. Naasa vakawuya iniingya firaso fya imamitwa na urilalyi mbee ya Iruva. 2Davidi ekimaa iniingya firaso yefyo fya imamita na urilalyi kavikya vandu mbora kwa irina lya Nndumi Iruva, 3kawuya yaavya Vaisraeli woose, vomi na vaka wo umwi kanninga nkate, kyenga kya nyama na nkate wa sabibu
4Kilanya ya fyoose Davidi kasauwa-se Valevi maata vave vefurukanya isanduku lya Nndumi Iruva, vanndumishe, vamuutye kiraso na yaarafuma Nndumi Iruva, Iruva wa Israeli. 5Kasauwa Asafu, nave nsongoru waawo esheekywa ni Sekaria. Yeieli, Shemiramoti, Metitia, Eliabu, Benaya, Obed-edomu na Yehieli, kavasauwa vave vekapa finada na fivale. Asafu kava mwikapa matowasi, 6nawo makohani Benania na Yaharieli, vakasauwa vave veekapa mbembe kyeeri kyoose mbee ya isanduku lya kyaasa lya Iruva.
7Naasa ukava yeto nto nkonu wa mbee, Davidi eniingya Asafu na vana va maye Valevi mashora a yiimbya Nndumi Iruva fiimbo fya imwaarafuma.
Kyiimbo kya irumisha
(Saburi 105:1-15; 96:1-13; 106:1, 47-48)
8Niingyeny Nndumi Iruva kiraso,
ambeny uniini lwakwe,
vieny masanga findo atannyi!
9Kapeny nndoro, murumishe Iruva, mumwiimbyeny,
ambeny kya mitannyi yakwe ndesa ing'ani!
10Fureny kya irina lyakwe yeele;
vafure yewo veiindya Nndumi-Iruva.
11Latyeny Nndumi-Iruva, yeto atiri finya,
latyeny Nndumi-Iruva kyeeri kyoose.
12Kummbweny mitannyi yakwe ndesa ing'ani,
weeresi lwa vayo, na mirumbuye ya usumanu,
13yeni va mmba ya Abrahamu, nndundi wakwe,
yeni va mmba ya Yakobo, vasauwe vakwe.
14We Nndumi-Iruva, mbwe Iruva weeru;
mirumbuye yakwe mmbo itiri finya ulaniny koose.
15We kyaasa kyakwe nkya llung'anu,
kaindya mbony yakwe, kwa ngyeeri fiku.
16Katira kyaasa kyakwe na Abrahamu,
na mbony alevia Isaki.
17Katannya Yakobo ndesa alemmbia,
kamoora mma ya llung'anu.
18Aamba, “Shimuniinga uruka lwa Kanaani,
nayo isheva masaa any muveni.”
19Yeekyena lyany lyekee idu,
mwekee vaangu na veny kunu urukeny lwa Kanaani,
20mwiraaraa masanga na masanga,
uka urukeny fika urukeny lungyi,
21Iruva kava nringyi waany;
kavavasa vamangyi:
22“Mulashepaana vasauwe vakwa;
mulakape vakisuku vakwa!”
23Imbyeny Nndumi-Iruva, ulana loose.
Ambeny mikonu myoose mitannyi yakwe ya ukiro.
24Ongoyeny masanga usuri lwakwe,
vieny vandu woose mitannyi yakwe ndesa ing'ani.
25Mashika Nndumi-Iruva ni mmwasi kailannya,
ni kuti nainndyo kilanya ya maruva engyi moose.
26Maruva a masanga engyi, nshi kindo-fo;
indi Nndumi-Iruva kaumba nginii-u.
27Usuri na umasi taari toose,
ushilyi na ifura fikaishura mmba yakwe.
28Indyeny Nndumi-Iruva, yeni vandu woose,
indyeny usuti na wiidimi lwakwe.
29Indyeny Nndumi-Iruva, na usuri lwa irina lyakwe,
endeny firaso yefo mmba yakwe,
Fiireny-ndi yefo kweele kwa Nndumi-Iruva.
30Ee ulana loose; ereyeny mbee yakwe!
Mmbwe asaleesye ulana lukasalala lulasingasingaa.
31Fureny yeni nginii-u na ulana!
Vieny masanga, “Nndumi-Iruva ni mangyi!”
32Yeeve na fyoose fiifo, fyoorongye,
Fureny yeni marema na fyoose fii-fo!
33Llyo miri myoose ishekoyaa yiimba kwa ifura
mbee ya Nndumi-Iruva, yeto asheshaa,
ee, isha yuutya ulana uvingo.
34Aniny Nndumi-Iruva, kimmba akee mfoo,
mashika isarya lyakwe ni lya llung'anu!
35Vieny Nndumi-Iruva;
lukire, woi Nndumi wa ukiro lweru,
kulumbye ando amwi, na iluuta nnang'ani a masanga,
luidimi irumisha irina lyafo yeele,
36Lurumishe Nndumi-Iruva, Iruva wa Israeli,
kupookya llung'anu na llung'anu!
Na vandu woose vakaamba, “Amen!” Vakarumisha Nndumi-Iruva.
Mwiindye efo Yerusalemu na Kibeoni
37Nalyo mangyi Davidi kavika-u Asafu, na vana va maye Valevi ando alya kweevika isanduku lya kyaasa lya Nndumi Iruva, kimaruma kya iniingya ndumwa ngata kikundikye mbee ya isanduku yelyo wo nkonu. 38Obed-edomu, mwana wa Yeduthuni, amwi na vaoroye makumi arindaru na nyanya vaimweekya, Obed-edomu mwana wa Yeduthuni na Hosa vekee vandu va iringa alya mwaangony. 39Mangyi Davidi kavika-u nkohani Sadoki amwi na vakohani vengyi va imweekya iniingya ndumwa wa mmba ya Nndumi Iruva, ando alya kweyaatya mwiindye kulya Kibeoni 40naambo vaniingye Nndumi Iruva firaso fya imamitwa uwe ya kitara kya irasya wo nkonu ngama na nkwaany shaasa Nndumi Iruva emmbavasya vana va Israeli, ngata kyemmaireiywa yefo fitabuny fya mavavaso a Nndumi Iruva. 41Kweifo Hemani na Yeduthuni, vakaengerywa na vandu vengyi va mmwasi varumisha Nndumi Iruva na imwiindya kimaruma kya isarya na ikunda lyakwe lya llung'anu. 42Hemani na Yeduthuni mmbo vekevasauwe vesalallya na ikapa mbembe na matowasi kyeeri kyeiimba fiimbo fyeele; vana va Yeduthuni mbo vekee vasauwe veeringa alya mwaangon. 43Numa ya vayo, wo nndu kakwipoo iwuya na kyeny kwakwe; Davidi nawe keenda indesanga na va kyen kwakwe.
Currently Selected:
1 MBONY TA FYEERI 16: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
