1 MBONY TA FYEERI 17

Rumi ya Davidi yuuka kwa Natani

(2 Sam 7:1-17)

1Kukasha nkonu umwi mangyi Davidi ekee yefo mmba yakwe ya kimangyi, kavaanga nkisuku Natani, kammbia, “A nkye lola yeny mmbo shikee kunu mmba yei ikee shitani nisha nnu, indilyo isanduku lya kyaasa lya Nndumi Iruva ni kunu yeemeny lyikai,” 2Nkisuku Natani kammbia, “Kusare kindo kushiidima itana yewe kumuni, mashika Nndumi Iruva akee neewe.” 3Na kio kilya kyeni Iruva karuma nkisuku Natani kammbia, 4“Enda kwa Davidi ishinga lyakwa, kumbie, ‘Nndumi Iruva aamba indi Nshi yewe kusheshitannya mmba yakwa ya mwiindye-fo. 5Ukya nkonu shoota vana va Israeli kulya Misri kufike nkonu wa inu nshilaange mmba-fo, kyeeri kyoose mmbo sheenda yefo na yefo. 6Mikonu myoose yei shilenkaa na vana va Israeli, nshilekooye ivesa vasongoru va Israeli nkyikyi yelyi kulare valenshitannya mmba ikee shitani na meresi-fo.’” 7Kweekyo via ishinga lyakwa Davidi indi, “Yeny Nndumi Iruva, munifinya, akuvia, Mmbo shekwiipo kulya kasa kushiisa moonri, shakuvika kuve mangyi ya vandu vakwe Israeli.

8Shakaa na yewe wo ando kuleenda, shakweekya kwavinga vakiduva vafo, wo ando kulefika: Mmbo shikwaallwa nndu kutiri finya na wiidimi sha vamangyi vengyi va ulana. 9Mmbo shamma isauwa ando kwa ivika vandu vakwa Israeli, vandekaa-u kulare kwiifo nndu ashevapaana-se lyingyi, ukya vansamya kunu urukeny yelu, mmbo valembonisa ngapo shiingyi, indi ulaalu mmbakikaa vapaanwa lyingyi-fo. 10Mmbo shikapaa vakiduva vafo woose na vandu vafo vasheengereka. 11Nayelyi kushefwaa na irikwa ni vandu vafo mmbo shisheseleesa nsero vafo, nnang'ani ya vasero vafo nave mangyi na umangyi lwakwe lutiraa finya. 12Yeto mmbwe asheshitannya mmba yakwa, na umangyi lwakwe lushekaa llung'anu. 13Yeny mmbo shishevaa ndeye wakwe, nawe nasheva mwana wakwa, weekyi lwakwa llushaalashika sha llwa lwa Sauli ulya shemwaanta naambo yewe kukooye iva mangyi-fo. 14Mmbo shishemwallwa nshilyi uwe ya vandu vakwa na umangyi lwakwa fyeeri fyoose.” 15Natani kavia Davidi findo fyoose filya Iruva ensukuya.

Kiterewo kya kyaanu kya Davidi

(2 Sam 7:18-29)

16Naasa mangyi Davidi kaanga kulya Yeemeny lya Nndumi Iruva, kakaa-fo rembo katereva kaamba, “Yeny mmbo vi na vandu va mmba yakwa mmba-kyi nshikwaani findo yefyi fyoose kwakunda ishitannya Nndumi Iruva, naakwa ni yewo va kyeny kwakwaa! 17Kilamii, kweengera-se ishitannya na fya mmwasi, kwashivikya fyaasa kya vana va mmba yakwa, na lyingyi, Nndumi Iruva mmbo kukeshaallwa sha nndu nsuri deny. 18A nkyokyi nshiidima ikuvia mmwasi! Mmbo kushiishi na nshushwa, indilyo kweengera ishiindya tupu yen ishinga lyafo. 19Yewe Nndumi Iruva, mmbo kuletannya ishinga lyafo findo yefyi fyoose kwa ikunda lyafo kumuni fikalollyo. 20Nkwiifo ungyi sha yewe-fo Nndumi Iruva; kyeeri kyoose mmbo lwiishi yewe mmbwe Iruva. 21Nkwiifo isanga lyingyi ulaniny koose sha Israeli-fo, yewo kulewoota ushingeny na ivaallwa vandu vafo kumuni. Findo finiini kulevatannya mbo fikwaani ulaniny koose. Mmbo kuloota vandu vafo ushingeny kulya Misri, kwaanta-fo masanga engyi moose. 22Kwaallwa vana va Israeli vandu vafo llung'anu, na yewe Nndumi Iruva, kwava Iruva waawo.

23“Na ulaalu, Woi Nndumi Iruva, inutyany filya fyoose kulekooya ishivikya kyaasa yeny na vana vakwa naambo fikooye iutika ndesa kwaambaye. 24Na irina lyafo lyishaarafumwaa llung'anu na vandu woose vaambe, ‘Nndumi Iruva, muni finya mmbwe Iruva wa Israeli shoose!’ Na wiidimi lwafo lushesalala fyeeri fyoose. 25Mmbo shavika kiterewo yekyi mbee yafo shiikuvikye nsia yewe Iruva wakwa, mashika mmbo kwanshoora na ishimanyisya findo fyoose yefyo kukunndye ishitannya yeny, na vana vakwa kushevaallwa vamangyi. 26Na ulaalu Nndumi Iruva, yewe mmbwe Iruva, ni yewe kulevika kyaasa na ishitannya findo yefyi fing'ani indi. 27Mmbo shakutereva kuvikye mbora yewo va mmba yakwa, naambo vakukaye yefo maakony afo atiri mbora fyeeri fyoose kuleefo umando.”

Currently Selected:

1 MBONY TA FYEERI 17: MAS2

Highlight

Compare

Copy