1 MBONY TA FYEERI 15

Ikudeesya Isamisa Isanduku lya Kyaasa

1Davidi katana mmba takwe muni kulya muriny wa Davidi, kavika-u na ando kwaivika isanduku lya Iruva, kalyitannya yeema uwe ya vayo. 2Llyo Davidi kaamba, “Nkwiifo muumu wa nndu kuuta Valevi-nsi mmbo vashiidimaa ikurika isanduku lya Iruva, mashika mmbo vakee vasauwe ni Nndumi Iruva na indundya llung'anu.” 3Naasa Davidi kasangirya vandu woose Vaisraeli kulya Yerusalemu, naambo vanderwaa isanduku lya Nndumi Iruva ando kwa vayo alya ensongosya. 4Naasa Davidi kasangirya ando amwi na vana va Aron, na Valevi 5na vana va Kohati, na Uriel vasongoru waawo, na vana va maye iyana na makumi avii. 6Va vana va Merari; Asaya nsongoru waawo, na vana va maye iyana na makumi avii 7va vana va Gershoni, Yoeli nsongoru waawo, na vana va maye iyana na makumi araru; 8va vana va Elsafani, na Shemaya nsongoru waawo, na vana va maye mayana avii; 9va vana va Hebron, Elieli nsongoru waawo; na vana va maye makumi nyanya; 10va vana va Usieli, Aminadabu, nsongoru waawo, na vana va maye iyana na ikumi na vavii.

11Naasa Davidi kavaanga vakohani vavii Sadoki na Abiatari, na valya va Valevi, Urieli, Asaya, Yoeli, Shemaya, Elieli na Aminadabu, 12kavavia, “Yeni ni mirwe ya mmba ta vande va Valevi, kwiilyiseny, yeni na vana va maye vany, naambo mundesaamisa isanduku lya Nndumi Iruva wa israeli mundelyifita ando alya shilemma ideesya. 13Mashika yeni kyeeri kilya kya mbee mmulelyipoo-fo; Nndumi Iruva, Iruva weeru alelusakira kimaruma kya ilemwa imwiindya ndesa kikwaani.” 14Naasa vakohani na Valevi, vakakwiilyisa naambo vaidimi ikurika isanduku lya Nndumi Iruva, Iruva wa Israeli. 15Na Valevi, vakalyikurika rare meeveny awo ndesa vemmbavasyo ni Mose kyuukana na irero lya Nndumi Iruva. 16Nawe Davidi kavavasya vasongoru va Valevi, vasauwe vandu nnang'ani yaawo yeva veeshi yiimba na ikapa nisha mbembe, fivale na findo fingyi naambo vakooye yiimba na ifina. 17Nawo vakasauwa vandu yeva wooka yefo ngyufyariny ta vandu valya veeshi yiimba na ifina mbasa; Hemeni mwana wa Yoeli, Asafu ulya ekee mwanamaye wa Berekia na vana va Merari, vana va maye va Ethani mwana wa Kushaya. 18Numa kasauwa-se Valevi yeva vengyi vawe vandu vawo vakavii vaivaekya: Sekaria, Yaasieli, Shemiramoti, Yehieli, Uni, Eliabu, Benaya, Maaseya, Matitia, Elifelehu, na Mikaya, na veeringa alya mwaangon: Obed-edomu, na Yeieli. 19Hemani, asafu na Etani vakasawuwa ikapa matuwasi arera. 20Sekaria, Asieli, Shemiramoti, Yehieli, Uni, Eliabu, Maaseya na Benaya, vekee vekapa finubi fya unyanga lwa Alamoti. 21Indi Matitia, Elifelehu, Mikneya, Obed-edomu, Yelieli na Asasia mmbo vasongoru mbee veerye finubi fya unyanga lwa Shemeniti. 22Nawe Kenania kyeendwa ni wiidimi lwakwe lwa mmbony ta wiimbi, vakamwaalwa nave nsongoru wa woose. 23Berekia na Elkana wo mmbo vekee veeringa isanduku lya kyaasa. 24Shebania, Yoshafati, Netanaeli, Amasai, Sekaria Benaya na Eliseri, yeva mmbo vekee vakohani vekapa mbembe vesongoye isanduku lya Iruva.

Isanduku lya kyaasa lyarawa Yerusalemu

(2 Sam 6:12-22)

25Naasa mangyi Davidi we na vamiku va Israeli, amwi na vasongoru fiku na fiku vakeenda ikurika isanduku lya Nndumi Iruva lyuuka kulya kyeny kwa Obed-edomu vefuraa. 26Vakautya Iruva kiraso kya ngoleta mfungare na suva mfungare, kimaruma kya iniingwa Valevi valya vakaveekya ikurika isanduku llya lya Nndumi Iruva. 27Davidi mmbo eree ikoti lya wuuru unini nnu, kiwo na Valevi valya woose vekurikye isanduku, veembi na Kenania nsongoru waawo, Mmwasi ya ikoti yelyo Davidi mmbo eree kisubau kya wuuru uniini mmwasi. 28Naasa Vaisraeli woose vakakuumbya amwi ikurika isanduku lya kyaasa lya Nndumi Iruva fika Yerusalemu ando amwi vefuraa. Vakalyiimya veefinaa na yiimba na unyanga lwa wo ngata. (Barangumu, tarumbeta, matoasi finanda na finubi) 29Kyeeri isanduku lya kyaasa lya Nndumi Iruva, lyekeyaanga muriny, muriny wa Davidi, Mikali mfu wa Sauli kaamaiya na itirisheny kalolyi mangyi Davidi eefinaa na ikushela kamwiipala nriminy wakwe.

Currently Selected:

1 MBONY TA FYEERI 15: MAS2

Highlight

Compare

Copy