Wutuluce 20
20
Malajilizo yikumi
(Kum 5:1-21)
1Mulungu yalonga zinghani zizi yakatya, 2“Ane yo nene Muwaha Mulungu, u Mulungu wako, mono nakuwusa mu yisi ya Misili, kono wali wuli mu wuwanda. 3Wulece kuwa na milungu yinji, langa nene du. 4Wulece kwinozeza cihwani ciseswe, hamba cihwani cinji co cose cono cili ku wulanga kucanyha, hamba cono cili mono yinze, hamba cono cili mu malenga kusi ye yisi. 5Wulece kuvihemba hamba kuvitumamila, hambi ane no Muwaha Mulungu, u Mulungu wako, nha nili Mulungu wo wivu, Nane nghuwalipiciza wana wubi we walezi wawo, sunga ku lulelo lwe kadatu na lwe kane lwa wono wasulile.” 6Ninga nghuwawonela lusungu maelufu na maelufu, wawalya wono webate malajilizo gangu.
7“Wulece kulitumamila litagwa lyo Muwaha Mulungu wako mu zinzila zimbi. Hambi Muwaha Mulungu nha komulipiciza munhu wowose mono yakulitumamila litagwa lyakwe mu zinzila zimbi. 8Weze kulikumbucila lizuwa lye Sabato wulisiwanule. 9Mu vilo mutandatu weze kwituma no kukondelezeza lukulu milimo yako yose. 10Ninga lizuwa lyo mupunghati, yo Sabato yo Muwaha Mulungu, u Mulungu wako. Holeka mwi'zuwa lilyo wulece kwituma mulimo wunji, gwegwe, hamba mwanago we cilume, hamba we cicekulu, hamba wetumami wako we cilume hamba we cicekulu, hamba mitugo zako, hamba mujenzi wako mono yali hako. 11Hambi Muwaha Mulungu, nha yawumba wulanga ne yinze, hamonga ne lilenga na vyose vyono vili mugati, kwa vilo mutandatu. Na mwi'zuwa lyo mupunghati yakawa kuceha. Holeka Muwaha Mulungu yakalilugutiza lizuwa lyo mupunghati yakalyeza.
12“Wogopaje sogo no nyina yako, vilo vyo wikale wako ho viwe vinji mu yisi yono yakukupela Muwaha Mulungu, u Mulungu wako.
13“Wulece kuwulaga munhu.
14“Wulece kusenyha.
15“Wulece kuhiza.
16“Wulece kulavya wuhomelezi wo wulambi kuli muyago.
17“Wulece kuyisulumila nyumba yo muyago. Wulece kumusulumila mucekulu wo muyago, hamba mwitumami wakwe we cilume hamba we cicekulu, hamba ng'ombe yakwe, hamba ndogowe yakwe, hamba cinji co cose co muyago.”
Woga we wanhu
(Kum 5:22-33)
18Nawo Waisilayeli wali weza kulihulika libalalusi, no kugawona ne mamuli gakoleye, hamonga ne lizi yiwaha lye ndulele mumo mwi'tunda mucanyha, sunga ne lyosi lyono lyafunghaga, hodu wose wakenjilwa no woga, wakawa kucicima muno, ninga wose wali wemile kutali. 19Wakamulonjela Musa wakatya, “Gwe Musa, agwe yo gwegwe du mono weze kulongana nase, nase cokuhulika du, ninga Muwaha Mulungu yalece kulongana nase, ho cilece kufwa.” 20Nayo Musa yakawatya, “Ale mulece kogopa, hambi Muwaha Mulungu nha kamuzizenyi ho yamujelenyi, ho yamunozenyi muwe ne cogopo kuli mwene nhondo zose, ho mulece kwituma zo wubi.”
21Ne wanhu wose, wali wemile kutali, lono Musa yalisejelelaga livunde lililya lizito, kono kwali ko yuli Mulungu.
Wulajilize we cikumbicilo
22Muwaha Mulungu yakamulonjela Musa yakatya, “Wuwalonjele Waisilayeli wutye nhavi, ‘Alu mwakondya kwiwonelela nyenye nyo weneco vyono nongana nanye ku wulawa ku wulanga. 23Holeka mulecele lukulu kwinozeza vihwani vye milungu ya fweza cihanje nane, hamba milungu ye zahabu. 24Anye langa munzenjele cikumbicilo ce malongo. Nanye mondavizya mumo i vilavywa vinyanywe, hamonga ne vilavywa vyo mulamu, nha cinji zo ngholo zenyu, hamonga ne zing'ombe zenyu. Nane hanhu ho hose hono nohahagula nene, baho ho mukalombele mwi'tagwa lyangu, nane nomuzizenyi, kanyhi nomulugutizenyi. 25Na hono munzenjele cikumbicilo ce mabwe, mulece kwitumamila mabwe masese. Hambi lono mukwitumamila vitwalo vyo kuseseza mabwe gago, nha mowa mwakondya kucitajila wavufywe cikumbicilo cico. 26Kanyhi mulece kwitumamila ngazi lono mukubita mucanyha ye cikumbicilo, ho mulece kucikalila cipwi cikumbicilo cangu.’ ”
Currently Selected:
Wutuluce 20: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
